موبائل ایپ، جو سعودی عرب میں حاجیوں کی مدد کرے گی

سعودی عرب کی کنگ عبدالعزیز یونیورسٹی کے طلبہ نے ایک انقلابی موبائل ایپ تیار کی ہے جو حج کے دوران عازمین کو راستہ تلاش کرنے میں مدد دے گی۔

اس ایپ کا نام “مساعد” ہے، اور اسے یونیورسٹی کے طلبہ کی ایک ٹیم نے حسن السلمی کی قیادت میں تیار کیا ہے۔ اس ایپ کا مقصد حج کے دوران عازمین کو اپنے کیمپ تک پہنچنے، بھیڑ بھاڑ والے مقامات سے بچنے اور منزل پر آسانی سے پہنچنے میں مدد فراہم کرنا ہے۔

عرب نیوز کے مطابق، حسن السلمی کا کہنا ہے کہ اس ایپ کا تصور پہلی بار 2022 میں اس وقت سامنے آیا جب وہ اور ان کی ٹیم حج کے دوران یہ مشاہدہ کر رہے تھے کہ کئی عازمین اپنے کیمپوں کا راستہ بھول جاتے ہیں، جس سے انہیں شدید پریشانی کا سامنا کرنا پڑتا ہے۔ بعض اوقات اس الجھن کے باعث وہ حج کے اہم ارکان بھی ادا نہیں کر پاتے۔

مساعد ایپ نہ صرف راستہ بتاتی ہے بلکہ مختلف فیچرز کے ذریعے عازمین کے تجربے کو مزید آسان بناتی ہے۔ یہ ایپ ایک بار ڈاؤن لوڈ کرنے کے بعد آف لائن بھی کام کر سکتی ہے، جس سے انٹرنیٹ کی دستیابی کا مسئلہ ختم ہو جاتا ہے۔ ایپ کے اہم فیچرز میں فون کے کیمرے کی مدد سے کیمپ کی سمت معلوم کرنا شامل ہے، بالکل ویسے ہی جیسے قبلہ تلاش کیا جاتا ہے۔ اس کے علاوہ ایپ میں زبانی اور بصری ہدایات شامل ہیں جو عازمین کو منزل تک پہنچنے میں ذاتی رہنمائی فراہم کرتی ہیں۔

مساعد ایپ یہ بھی بتاتی ہے کہ کون سے راستے میں رش کم ہے اور کون سا راستہ اختیار کرنا زیادہ بہتر ہوگا۔ رش والے علاقوں کے بارے میں ایپ صارفین کو نوٹیفیکیشن کے ذریعے بروقت خبردار بھی کرتی ہے۔ ایک اور نمایاں خصوصیت یہ ہے کہ ایپ صارفین کو سپروائزر یا متعلقہ حکام سے براہ راست رابطے کی سہولت بھی فراہم کرتی ہے، جو حفاظتی اعتبار سے نہایت اہم ہے۔

فی الحال یہ ایپ آزمائشی مراحل میں ہے اور اسے مکمل طور پر فعال ہونے کے لیے سرکاری منظوری درکار ہے۔ تاہم، اس منصوبے نے یہ ظاہر کر دیا ہے کہ سعودی نوجوان نہ صرف تخلیقی صلاحیت رکھتے ہیں بلکہ جدید ٹیکنالوجی کے ذریعے حج جیسے بڑے اجتماع کو آسان بنانے میں بھی کلیدی کردار ادا کر سکتے ہیں۔

ہر سال دنیا بھر سے 10 لاکھ سے زائد عازمین حج کے لیے سعودی عرب آتے ہیں، اور اس طرح کی ایپس ان کے لیے قابلِ عمل، محفوظ اور آسان سفر کو ممکن بنانے میں مددگار ثابت ہوں گی۔ یہ اقدام سعودی عرب کے اس وژن کا بھی حصہ ہے جس کے تحت وہ عازمین کو جدید ٹیکنالوجی کے ذریعے بہترین سہولیات فراہم کرنے کے لیے کوشاں ہے۔