وزیراعلیٰ پنجاب مریم نواز شریف کندھے میں تکلیف کے باعث علاج کے لیے میو اسپتال لاہور پہنچیں، جہاں انہوں نے عام مریضوں کی طرح اسپتال کے کاؤنٹر پر جا کر خود اپنی پرچی بنوائی۔
نجی نشریاتی ادارے ایکسپریس نیوز نے ذرائع کا حوالہ دیتے ہوئے کہا ہے کہ وزیراعلیٰ کو چند روز سے کندھے میں درد محسوس ہو رہا تھا، جس کے باعث انہیں معائنے اور تشخیص کے لیے اسپتال لایا گیا۔ میو اسپتال میں ان کی ایم آر آئی کی گئی اور ڈاکٹرز نے ابتدائی معائنے کے بعد ادویات تجویز کیں۔
اس موقع پر سینئر صوبائی وزیر مریم اورنگزیب بھی ان کے ہمراہ موجود تھیں۔ مریم نواز نے کسی مہنگے نجی اسپتال کے بجائے سرکاری اسپتال میں علاج کروانے پر اصرار کیا۔
انہوں نے عام مریضوں کی طرح اسپتال کے کاؤنٹر پر جا کر خود اپنی پرچی بنوائی۔ انہوں نے کندھے کی تکلیف کے سبب چار انجکشن بھی لگوائے۔
واضح رہے کہ معائنے اور ضروری طبی کارروائی کے بعد وزیراعلیٰ اسپتال سے روانہ ہو گئیں۔
