یومِ آزادی کی تقریب اس لحاظ سے بھی خصوصی اہمیت کی حامل رہی کہ ترکیہ میں برسرِ اقتدار جسٹس اینڈ ڈیولپمنٹ پارٹی کے قیام کی سلور جوبلی کی تقریبات کے باعث پاکستان کا یومِ آزادی ایک روز قبل ہی انقرہ میں بھرپور انداز میں منایا گیا۔
تقریب کے مہمانِ خصوصی ترکیہ کے نائب صدر جودت یلماز تھے، جن کی شرکت نے پاکستان اور ترکیہ کے درمیان موجود دیرینہ برادرانہ تعلقات کی اہمیت کو مزید اجاگر کیا۔
پاکستان ہاؤس کے وسیع و خوب صورت احاطے میں منعقد ہونے والی تقریب میں ترکیہ کے وزیر قومی دفاع یاشار گولر، چیف آف جنرل اسٹاف جنرل سیلچوق بایراکتار اولو، ترک بحریہ کے کمانڈر ایڈمرل ارجمند طاطلی اولو، بری فوج کے کمانڈر جنرل متین توکل اور فضائیہ کے کمانڈر جنرل ضیا جمال قادی اولو سمیت دیگر اہم شخصیات نے شرکت کی۔
تقریب میں ترکیہ کے سابق نائب وزیراعظم بلند آرنچ، سابق وزیر دریا یانک، جسٹس اینڈ ڈیولپمنٹ پارٹی کے نائب چیئرمین اول افکان اعلیٰ، ارکانِ پارلیمنٹ، ہولوسی آقار، پاکستان میں ترکیہ کے سفیر عرفان نذیر اور دیگر اعلیٰ ترک حکام بھی موجود تھے۔
مختلف ممالک کے سفیروں، سفارتی مشنز کے نمائندوں، پاکستانی کمیونٹی کے ارکان اور صحافتی حلقوں کی شرکت نے تقریب کو مزید اہم بنا دیا۔
تقریب کا آغاز تلاوتِ کلامِ پاک سے کیا گیا، جس کے بعد پاکستان اور ترکیہ کے قومی ترانے بجائے گئے۔ قومی ترانوں کے دوران شرکاء نے دونوں ممالک کے ساتھ اپنی وابستگی اور احترام کا اظہار کیا۔
طلبہ کا ثقافتی پروگرام، پاکستانی رنگ نمایاں
پاکستان ایمبیسی انٹرنیشنل اسٹڈی گروپ اسکول کے طلبہ و طالبات نے تقریب میں ملی نغمے پیش کیے جبکہ روایتی رقص کے ذریعے پاکستان کی ثقافت کے مختلف رنگ اجاگر کیے گئے۔
طلبہ کی جانب سے پیش کیے گئے ثقافتی پروگرام کو تقریب میں شریک ترک اور پاکستانی مہمانوں نے بھرپور سراہا۔ پروگرام کے دوران پاکستان کی ثقافتی روایات، قومی جذبے اور نوجوان نسل کے ٹیلنٹ کی عکاسی ہوئی۔
تقریب کے دوران پاکستان کے حوالے سے ایک خصوصی دستاویزی فلم بھی پیش کی گئی، جس میں پاکستان کی تاریخ، تہذیبی ورثے، ثقافتی تنوع، قدرتی حسن اور سیاحتی مقامات کو نمایاں کیا گیا۔
دستاویزی فلم میں پاکستان کی معاشی ترقی، مختلف شعبوں میں ہونے والی پیش رفت اور ملک کے وسیع سیاحتی امکانات کو بھی اجاگر کیا گیا، جس سے شرکاء کو پاکستان کے مختلف پہلوؤں سے آگاہی حاصل ہوئی۔
پاک ترک تعلقات صرف سفارتی روابط نہیں: جودت یلماز
ترکیہ کے نائب صدر جودت یلماز نے تقریب سے خطاب کرتے ہوئے صدر رجب طیب اردوان اور ترک عوام کی جانب سے پاکستان کی حکومت اور عوام کو یومِ آزادی کی مبارکباد پیش کی۔
جودت یلماز نے کہا کہ پاکستان اور ترکیہ کے تعلقات محض سفارتی روابط تک محدود نہیں بلکہ دونوں ممالک کے عوام کے درمیان تاریخی اور جذباتی وابستگی موجود ہے۔ دونوں ممالک کے درمیان تعلقات مشترکہ اقدار، باہمی احترام اور مشکل وقت میں ایک دوسرے کے ساتھ کھڑے ہونے کی روایت پر قائم ہیں۔
ترک نائب صدر نے جنگِ آزادیِ ترکیہ کے دوران برصغیر کے مسلمانوں کی جانب سے ترک عوام کے ساتھ اظہارِ یکجہتی کو بھی یاد کیا اور کہا کہ تاریخ نے دونوں اقوام کے درمیان تعلقات کو ایک مضبوط بنیاد فراہم کی ہے۔
انہوں نے کہا کہ پاکستان اور ترکیہ خطے میں امن، استحکام اور خوش حالی کے لیے مشترکہ کوششیں جاری رکھیں گے۔ دونوں ممالک کے درمیان اسٹریٹجک تعاون کو مزید وسعت دینے کے لیے بھی اقدامات کیے جائیں گے۔
جودت یلماز نے دوطرفہ تعلقات کے مختلف شعبوں میں تعاون بڑھانے کی ضرورت پر زور دیتے ہوئے کہا کہ تجارت، سرمایہ کاری، دفاع، تعلیم اور عوامی روابط سمیت متعدد شعبوں میں تعاون کے نئے امکانات موجود ہیں۔
انہوں نے علاقائی تعاون کے حوالے سے ترکیہ، پاکستان اور سعودی عرب کے درمیان سہ فریقی تعاون کو مزید فروغ دینے کی اہمیت بھی اجاگر کی۔
پاکستانی سفیر کا قائداعظم کو خراجِ عقیدت
اس سے قبل ترکیہ میں پاکستان کے سفیر ڈاکٹر یوسف جنید نے استقبالیہ خطاب میں بانیٔ پاکستان قائداعظم محمد علی جناح کو خراجِ عقیدت پیش کیا۔
پاکستانی سفیر نے کہا کہ پاکستان کا قیام ایک طویل جدوجہد، غیر معمولی قربانیوں اور قائداعظم کی مدبرانہ قیادت کا نتیجہ ہے۔ برصغیر کے مسلمانوں نے ایک آزاد وطن کے حصول کے لیے بے شمار مشکلات برداشت کیں اور اپنی جانوں کے نذرانے پیش کیے۔
ڈاکٹر یوسف جنید نے کہا کہ آزادی ایک عظیم نعمت ہے اور پاکستانی قوم کو ملک کی ترقی، خوش حالی اور استحکام کے لیے قومی اتحاد کو مزید مضبوط بنانا ہوگا۔
انہوں نے کہا کہ پاکستان اور ترکیہ کے تعلقات کئی دہائیوں پر محیط ہیں اور یہ رشتہ صرف حکومتوں تک محدود نہیں بلکہ دونوں ممالک کے عوام کے دلوں میں بھی گہری جڑیں رکھتا ہے۔
سفیرِ پاکستان کا کہنا تھا کہ پاک ترک شراکت داری وقت کے ساتھ ساتھ مزید مضبوط اور وسیع ہورہی ہے۔ دفاع، تجارت، سرمایہ کاری، تعلیم، ثقافت اور عوامی روابط سمیت مختلف شعبوں میں دونوں ممالک کے درمیان تعاون جاری ہے۔
انہوں نے اس امید کا اظہار کیا کہ مستقبل میں پاکستان اور ترکیہ کے درمیان اقتصادی اور تجارتی روابط کو مزید فروغ ملے گا جبکہ عوامی سطح پر تعلقات بھی مزید مضبوط ہوں گے۔
150ویں سالگرہ، خصوصی تصویری نمائش کا افتتاح
تقاریر کے اختتام پر ترک نائب صدر جودت یلماز، پاکستانی سفیر ڈاکٹر یوسف جنید اور دیگر معزز شخصیات نے یادگاری گروپ فوٹو بنوایا۔
بعد ازاں ترک نائب صدر نے پاکستان کے سفارت خانے کی جانب سے قائداعظم محمد علی جناح کی 150ویں سالگرہ کے حوالے سے منعقد کی گئی خصوصی تصویری نمائش کا افتتاح کیا۔
نمائش میں قائداعظم محمد علی جناح کی زندگی، سیاسی جدوجہد، قائدانہ صلاحیتوں اور برصغیر کے مسلمانوں کے لیے ایک آزاد ریاست کے حصول کی جدوجہد کے مختلف مراحل کو تصاویر کے ذریعے اجاگر کیا گیا۔
نمائش میں قائداعظم کے سیاسی سفر اور تاریخی خدمات کے مختلف پہلوؤں کو بھی نمایاں کیا گیا، جبکہ تحریکِ پاکستان سے وابستہ اہم تاریخی لمحات کی تصاویر نے شرکاء کی خصوصی توجہ حاصل کی۔
پاکستان ہاؤس میں روایتی عشائیہ
تقریب کے اختتام پر پاکستان ہاؤس کے باغات میں عشائیے کا اہتمام کیا گیا، جہاں مہمانوں کی پاکستانی روایتی کھانوں سے تواضع کی گئی۔
عشائیے کے دوران ترک اور پاکستانی شخصیات نے باہمی دلچسپی کے امور پر تبادلہ خیال کیا اور دونوں ممالک کے درمیان موجود دوستانہ تعلقات کو مزید آگے بڑھانے کے عزم کا اظہار کیا۔
انقرہ میں ہونے والی یومِ آزادی کی یہ تقریب پاکستان کے قومی دن کی خوشیوں کے ساتھ ساتھ پاک ترک دوستی کی مضبوطی کی بھی عکاس رہی۔ تقریب میں شریک اعلیٰ ترک قیادت کی موجودگی نے اس امر کو اجاگر کیا کہ پاکستان اور ترکیہ کے درمیان تعلقات سیاسی اور سفارتی سطح سے آگے بڑھ کر عوامی اور تاریخی رشتوں میں تبدیل ہوچکے ہیں۔
تقریب کے مختلف مراحل میں پاکستان کی ثقافت، تاریخ اور قومی تشخص کو نمایاں کیا گیا جبکہ ترک قیادت کی جانب سے پاکستان کے لیے نیک خواہشات کا اظہار بھی کیا گیا۔
انقرہ کی اس تقریب نے ایک مرتبہ پھر واضح کیا کہ پاکستان اور ترکیہ مشکل اور خوشی کے مواقع پر ایک دوسرے کے قریب کھڑے رہنے والے دیرینہ دوست اور برادر ممالک ہیں، جبکہ دونوں ملک مستقبل میں دوطرفہ، علاقائی اور عالمی سطح پر تعاون کو مزید وسعت دینے کے خواہاں ہیں۔
