جب سے وزیرِ داخلہ محسن نقوی نے فرمایا ہے کہ ملک کا نظام 'کولیپس' کر چکا ہے، تب سے ہر تجزیہ کار اپنی اپنی رسّی لے کر اس ملبے میں سے کچھ نہ کچھ باندھنے کی کوشش میں لگا ہے۔ کوئی کہتا ہے یہ نئے صوبوں کی نوید ہے، کوئی کہتا ہے یہ محض سندھ کو ڈرانے کی مشق ہے، اور کچھ دانشور فرما رہے ہیں کہ یہ سب اسٹیبلشمنٹ کے 'آئینی و جمہوری' ذوق کی تازہ کروٹ ہے۔ ہم البتہ عرض کرتے ہیں کہ یہ سب کچھ نیا نہیں، بس پیکنگ بدلی ہے۔