اپنے تہنیتی پیغام میں ایرانی صدر نے کہا کہ پاکستان کی عظیم قوم کی کامیابیوں کو خراجِ تحسین پیش کرنے کے لیے یومِ آزادی ایک قیمتی موقع ہے۔
مسعود پزشکیان کا کہنا تھا کہ پاکستان کا یومِ آزادی ایران اور پاکستان کے دیرینہ اور تزویراتی تعلقات کو مزید گہرا اور وسیع کرنے کے لیے ایک نیا موڑ ہے۔
انہوں نے کہا کہ ایران پاکستان کے ساتھ جامع تعلقات کو مزید مضبوط بنانے کے عزم پر قائم ہے اور باہمی اعتماد، احترام اور دونوں ممالک کی موجود وسیع صلاحیتوں سے فائدہ اٹھاتے ہوئے دوطرفہ تعلقات کے فروغ کے لیے مزید مؤثر اقدامات کرنے کو تیار ہے۔
ایرانی صدر کے مطابق ایران اور پاکستان کے درمیان مزید ہم آہنگی اور تعاون کی ضرورت پہلے سے کہیں زیادہ بڑھ گئی ہے۔
انہوں نے کہا کہ دونوں ممالک کے مشترکہ مفادات اور تقدیریں پہلے سے زیادہ ایک دوسرے سے جڑی ہوئی ہیں۔
مسعود پزشکیان نے پاکستان کی ترقی، خوشحالی اور سربلندی کے لیے نیک خواہشات کا اظہار کرتے ہوئے ایران اور پاکستان کے دیرینہ اور برادرانہ تعلقات کے مزید مضبوط اور مستحکم ہونے کی دعا بھی کی۔
