واٹس ایپ نے 2025 کے پہلے چھ ماہ میں دنیا بھر سے 68 لاکھ اکاؤنٹس حذف کیے ہیں۔ یہ اکاؤنٹس منظم جرائم پیشہ گروپوں کے زیر استعمال تھے اور مختلف ممالک میں لوگوں کو دھوکہ دینے کے لیے بنائے گئے تھے۔
میٹا کے مطابق یہ جعلی اکاؤنٹس زیادہ تر جنوب مشرقی ایشیا کے ممالک جیسے میانمار، کمبوڈیا اور تھائی لینڈ میں سرگرم اسکیم سینٹرز سے متعلق تھے۔
میٹا نے اس اقدام کے ساتھ واٹس ایپ پر نئی حفاظتی خصوصیات بھی متعارف کرائی ہیں۔ ان میں ایک خصوصیت یہ ہے کہ جب کوئی نامعلوم شخص کسی صارف کو گروپ چیٹ میں شامل کرتا ہے تو اس صارف کو فوری طور پر الرٹ نوٹیفکیشن موصول ہوگا۔
مزید براں یہ اقدامات جعلی سرمایہ کاری اسکیموں کے فروغ کو روکنے کے لیے کیے گئے ہیں، جو کہ جعل ساز واٹس ایپ اکاؤنٹس کے ذریعے یا گروپ چیٹس میں ہائی جیک کیے گئے اکاؤنٹس کے ذریعے پھیلائی جا رہی تھیں۔
میٹا نے یہ بھی انکشاف کیا ہے کہ کچھ اسکیمرز نے مصنوعی ذہانت کے ٹولز کا استعمال کیا تاکہ لوگوں کو دھوکہ دینے والے پیغامات تیار کیے جا سکیں۔
جنوب مشرقی ایشیا کے مختلف ممالک میں حکام نے عوام کو خبردار کیا ہے کہ وہ شکوک و شبہات والے پیغامات سے بچیں اور اپنے واٹس ایپ اکاؤنٹس کی حفاظت کے لیے دو مرحلہ تصدیق جیسے حفاظتی فیچرز فعال کریں۔
واضع رہے کہ کہ ان اقدامات کا مقصد ان بڑھتے ہوئے رجحانات کو روکنا ہے، جہاں جعلی اکاؤنٹس اور اسکیموں کے ذریعے عوام کو نقصان پہنچایا جا رہا ہے۔
