چائلڈ پروٹیکشن افسر سے مجرم تک، برطانوی رکن پارلیمنٹ کمسن بچوں سے جنسی زیادتی کے الزام میں گرفتار
برطانوی حکمران جماعت لیبر پارٹی کے رکن پارلیمنٹ ڈین نورس کو کمسن بچوں سے جنسی زیادتی کے سنگین الزامات میں گرفتار کر لیا گیا۔ نجی نشریاتی ادارے سماء نیوز کے مطابق غیر ملکی میڈیا رپورٹس میں کہا گیا ہے کہ لندن پولیس نے رکن پارلیمنٹ ڈین نورس کے گھر پر چھاپہ مار کر انہیں حراست میں لیا۔ پولیس کا کہنا تھا کہ نورس پر کم عمر بچوں سے جنسی زیادتی کا الزام ہے، جس کی تحقیقات جاری ہیں۔ ترجمان کے مطابق متاثرہ فریق کی جانب سے 2024 میں شکایت درج کرائی گئی تھی، تاہم الزامات کا تعلق زیادہ تر واقعات سے ہے جو سن 2000 کی دہائی میں پیش آئے۔ پولیس 2020 میں پیش آنے والے ایک اور مبینہ واقعے کی بھی تفتیش کر رہی ہے۔ مزید پڑھیں: برطانیہ کے شہزادے ہیری پر ہراسانی کے الزامات کیوں لگائے جا رہے ہیں؟ رپورٹس کے مطابق ڈین نورس، رکن پارلیمنٹ بننے سے قبل ٹیچر اور چائلڈ پروٹیکشن آفیسر کی حیثیت سے فرائض انجام دے چکے ہیں۔ واضح رہے کہ لیبر پارٹی نے فوری کارروائی کرتے ہوئے ڈین نورس کی جماعتی رکنیت معطل کر دی ہے، جب کہ معاملے کی حساسیت کے پیش نظر تحقیقات مکمل ہونے تک پارٹی ان سے لاتعلقی کا اعلان کر چکی ہے۔
سندھ میں غیر قانونی افغان تارکین وطن کے خلاف کارروائیاں، 307 افراد کو ملک بدر کر دیا
سندھ حکومت نے غیر قانونی طور پر ملک میں مقیم افغان تارکین وطن کے خلاف کارروائی کرتے ہوئے 307 افراد کو امین ہاؤس ٹرانزٹ کیمپ سے ملک بدر کر دیا۔ وزیر اطلاعات سندھ شرجیل انعام میمن نے اس کارروائی کی تفصیلات فراہم کرتے ہوئے بتایا کہ ابتدائی طور پر 313 افراد کی فہرست مرتب کی گئی تھی، تاہم جانچ پڑتال اور تصدیق کے بعد 307 افراد کو قانونی کارروائی مکمل کرنے کے بعد افغانستان واپس بھیج دیا گیا۔ وزیر اطلاعات سندھ کا کہنا ہے کہ ملک بدر کیے جانے والوں میں 79 بچے، 37 خواتین اور 191 مرد شامل ہیں۔ ان کا کہنا تھا کہ یہ افراد غیر قانونی طور پر پاکستان میں مقیم تھے، جس کی وجہ سے انہیں واپس بھیجا جا رہا ہے۔ شرجیل انعام میمن نے مزید کہا کہ غیر قانونی تارکین وطن کے انخلا کی مہم جاری رہے گی اور اس عمل میں عالمی قوانین اور ضابطوں پر عمل درآمد کیا جا رہا ہے۔ انہوں نے کہا کہ دنیا بھر میں غیر قانونی تارکین وطن کے حوالے سے جو قوانین موجود ہیں، پاکستان بھی اسی اصول کے تحت ان افراد کو ان کے وطن واپس بھیج رہا ہے۔ وزیر اطلاعات سندھ نے کہا کہ حکومت سندھ انسانی ہمدردی کے اصولوں کو مدنظر رکھتے ہوئے قانون کے مطابق اقدامات کر رہی ہے۔ انہوں نے واضح کیا کہ حکومت سندھ کی یہ مہم آئندہ بھی جاری رہے گی تاکہ غیر قانونی طور پر مقیم افراد کے خلاف مؤثر کارروائی کی جا سکے۔ شرجیل انعام میمن نے اس عزم کا اظہار کیا کہ غیر قانونی تارکین وطن کے انخلا کی مہم کے ذریعے سندھ میں امن و امان کی صورتحال کو بہتر بنانے اور غیر قانونی طور پر مقیم افراد کے خلاف سخت کارروائی کی جائے گی۔
پاک افغان سرحد پر سیکورٹی فورسز نے دراندازی کی کوشش کو ناکام بنا دیا، آٹھ دہشت گردہلاک
پاک افغان سرحد پر شمالی وزیرستان کے مقام پر سکیورٹی فورسز نے خوارج کی دراندازی کی کوشش کو ناکام بنا دیا جس میں آٹھ دہشت گرد ہلاک ہو گے۔ انٹر سروسز پبلک ریلیشنز (آئی ایس پی آر) کے مطابق، سیکیورٹی فورسز نے 5 سے 6 اپریل کی درمیانی شب شمالی وزیرستان کے ضلع حسن خیل کے جنرل علاقے میں عسکریت پسندوں کے ایک گروپ کی نقل و حرکت کو پکڑ لیا، جو پاک افغان سرحد سے دراندازی کی کوشش کر رہے تھے۔ سکیورٹی فورسز نے خوارج کی دراندازی کی کوشش ناکام بنائی اور کارروائی کے دوران 8 خوارج مارے گئے جبکہ دراندازی کی کوشش میں 4 خوارج زخمی بھی ہوئے۔ آئی ایس پی آر کا کہنا ہے کہ پاکستان مسلسل افغان عبوری حکومت سے مؤثر بارڈر منیجمنٹ کا مطالبہ کرتا آیا ہے، توقع ہے افغان عبوری حکومت اپنی ذمہ داریوں کو پورا کرے گی۔ آئی ایس پی آرنے بتایاکہ توقع ہے افغان حکومت پاکستان کیخلاف افغان سرزمین کے استعمال کی اجازت نہیں دے گی، سکیورٹی فورسز اپنی سرحدوں کو محفوظ بنانے اور دہشتگردی کے خاتمے کےلیے پرعزم ہیں۔ وزیراعلیٰ سندھ مراد علی شاہ نے پاک افغان سرحد سے دراندازی ناکام بنانے پر سیکیورٹی فورسز کو مبارکباد دی۔ وزیر اعلیٰ سندھ نے پاک فوج کو خراج تحسین پیش کرتے ہوئے کہا کہ پاک افواج سرحدوں کی حفاظت کےلئے ہر لمحہ چوکنا ہیں،سکیورٹی فورسز کے جوان بہادری سے دشمن کے ہر وار کو ناکام بنا رہے ہیں۔ انہوں نے مزید کہا کہ وطن کی حفاظت کیلیے اپنی جانیں داؤ پر لگانے والوں کو پوری قوم کا سلام ہے۔
کے پی حکومت نے رمضان پیکج کے نام پر 10 ارب پارٹی میں بانٹ دیے:عظمیٰ بخاری کا بیرسٹر سیف کے بیان پر ردعمل
وزیر اطلاعات پنجاب عظمیٰ بخاری نے خیبر پختونخواہ کی حکومت پر الزام لگایا ہے کہ کے پی حکومت نے اپنے پارٹی کے افراد کو 10 ارب روپے رمضان پیکج کے نام پر بانٹ دیے، لیکن وہاں ایک بھی رمضان بازار نہیں لگایا جا سکا۔ عظمیٰ بخاری نے بیرسٹر سیف کے پنجاب میں رمضان پیکج اور سہولت بازار کے بیان پر شدید ردعمل ظاہر کرتے ہوئے کہا کہ ان کے دعوے بے بنیاد ہیں اور وہ یا تو کم علم ہیں یا پھر ان کی ٹیم نالائق ہے۔ انہوں نے کہا کہ پنجاب میں رمضان پیکج اور سہولت بازاروں کی کامیابی کو نظرانداز کرنا حقیقت سے چشم پوشی ہے۔ عظمیٰ بخاری نے بتایا کہ پنجاب کے رمضان سہولت بازاروں سے عوام کو 1 ارب 31 کروڑ روپے کی بچت ہوئی، جو کہ ایک بڑی کامیابی ہے۔ انہوں نے کہا کہ مریم نواز کی زیر نگرانی قائم خصوصی سہولت بازاروں میں عوام کو اوپن مارکیٹ سے 31 فیصد زیادہ ریلیف ملا، جو کہ ایک اہم کامیابی ہے۔ انہوں نے مزید کہا کہ ان رمضان سہولت بازاروں سے 3 ارب 11 کروڑ روپے کی تاریخ ساز خریداری ہوئی، جو کہ عوام کے لئے ایک بڑا ریلیف تھا۔ وزیر اطلاعات پنجاب نے یہ بھی کہا کہ مریم نواز کے منصوبوں پر ایک سال گزرنے کے باوجود کوئی ایک دھیلے کی کرپشن کا الزام بھی ثابت نہیں ہو سکا۔ انہوں نے کہا کہ پنجاب میں ہر منصوبہ شفافیت اور میرٹ کی اپنی مثال ہے، اور عوام کے لئے یہ ایک واضح پیغام ہے کہ حکومت کے اقدامات مکمل طور پر عوامی مفاد میں ہیں۔ عظمیٰ بخاری نے اپنے بیان میں کہا کہ پنجاب حکومت نے رمضان پیکج اور سہولت بازاروں کے ذریعے عوام کو بہترین ریلیف فراہم کیا اور یہ کام پورے پاکستان کے لئے ایک مثال بن چکا ہے۔
لکی مروت میں سفاکیت کی انتہا، بکری کا بھٹکنا بچے کے لیے وبالِ جان بن گیا
لکی مروت کے علاقے بخمل احمد زئی میں دل دہلا دینے والا واقعہ پیش آیا، جہاں ایک ظالم زمیندار نے معمولی بات پر 11 سالہ خالد گل کو قتل کر دیا۔ نجی نشریاتی ادارے سماء نیوز کے مطابق بچہ اپنے والد کے کہنے پر کھیتوں کے قریب جانے والی بکری کو واپس لانے گیا تھا کہ اسی دوران زمیندار طیش میں آگیا اور کلاشنکوف سے فائرنگ کر دی۔ مزید پڑھیں: ہنی ٹریپ اسکینڈل، راولپنڈی پولیس کے اہلکار اسلام آباد میں اغوا برائے تاوان میں ملوث شدید زخمی بچے کو فوری طور پر اسپتال منتقل کیا گیا تاہم وہ راستے میں ہی دم توڑ گیا۔ پولیس نے بچے کے والد کی مدعیت میں تھانہ تجوڑی میں مقدمہ درج کر لیا ہے، جب کہ ملزم کی گرفتاری کے لیے چھاپے مارے جا رہے ہیں۔
امریکی اسٹاک مارکیٹ کریش جبکہ پاکستان کی ایک لاکھ 20 ہزار سے اوپر چلی گئی : وزیر دفاع کا دعویٰ
وزیر دفاع خواجہ آصف کا کہنا ہے کہ کسی کے وہم و گمان میں بھی نہیں تھا کہ افراط زر 38 فیصد سے کم ہوکر ڈیڑھ فیصد رہ جائے گی، یہ سب معجزے ہیں، امریکا کی سٹاک مارکیٹ کریش ہوئی ہے اور پاکستان کی سٹاک مارکیٹ ریکارڈ سطح پر چلی گئی ہے، یہ نیک نیتوں کا پھل ہے۔ سیالکوٹ میں تقریب سے خطاب کرتے ہوئے خواجہ آصف کا کہنا تھا کہ کہا جارہا تھا کہ ڈالر 500 پر پہنچ جائے گا، پاکستان دیوالیہ ہوجائے گا اور سری لنکا بن جائے گا، کوئی سوچ نہیں سکتا تھا کہ اس ملک میں بجلی سستی ہوجائے گی، انٹرسٹ ریٹ 10 فیصد کم ہوجائے گا۔ پاکستان تحریک انصاف پر تنقید کرتے ہوئے وزیردفاع کا کہنا تھا کہ خیبرپختونخوا میں پی ٹی آئی کے وزیر کے خلاف 78 کروڑ کی کرپشن کے خلاف تحریک پیش کی گئی ہے، پی ٹی آئی والوں نے ایک دوسرے کو چور کہنا شروع کردیا ہے۔ خواجہ آصف نے کہا کہ تحریک عدم اعتماد کے ذریعے پی ٹی آئی سے اقتدار حاصل کیا تھا جس کے بعد پی ڈی ایم کے رہنماؤں نے مل کر پاکستان کے لیے امید کی کرن پیدا کی۔ ان کا کہنا تھا کہ عمران خان جیب کترا تھا، جنرل فیض اور جنرل باجوہ سکیورٹی کی میٹنگ میں ہمیں بریفنگ دینے آتے تھے تو یہ ہمارے ساتھ نہیں بیٹھتا تھا، ابھی نندن والے واقعے کے بعد تین سکیورٹی میٹنگز ہوئیں، جنرل باجوہ کہتا رہا کہ آ کر میٹنگ کی صدارت کرو مگر یہ نہیں آیا۔ وزیر دفاع نے کہا کہ اب عمران خان کہتا ہے کہ جب تک مجھے سکیورٹی میٹنگ میں نہیں لے کر جاؤگے تو میری پارٹی نہیں جائے گی۔ خواجہ آصف کا مزید کہنا تھا کہ خیبرپختونخوا اوربلوچستان دہشت گردی کی زد میں ہیں، پاک فوج کے جوان قربانیاں دے کر ملک کی حفاظت کر رہے ہیں، تحریک انصاف ٹکڑوں میں تقسیم ہوچکی ہے، مسلم لیگ(ن)کےکارکن نوازشریف کا ہراول دستہ ہیں۔
ہنی ٹریپ اسکینڈل، راولپنڈی پولیس کے اہلکار اسلام آباد میں اغوا برائے تاوان میں ملوث
تھانہ سنگجانی کی حدود میں راولپنڈی پولیس کے اہلکاروں کی ہنی ٹریپ کے ذریعے شہریوں کے اغوا میں ملوث ہونے کا انکشاف ہوا ہے، پولیس نے مقدمہ درج کر کے ایک ملزم کو گرفتار کر لیا، جب کہ دیگر کی تلاش جاری ہے۔ نجی نشریاتی ادارے ایکسپریس نیوز کے مطابق پولیس اہلکاروں نے ایک خاتون ساتھی کی مدد سے دو شہریوں، مزائن اور ملوک کو اغوا کیا۔ ایف آئی آر میں بتایا گیا ہے کہ اغوا کار عورت کو استعمال کرکے شہریوں کو ملاقات کے بہانے بلا کر اغوا کرتے تھے۔ پولیس نے کارروائی کرتے ہوئے ملزم شاہد اقبال کو گرفتار کر لیا ہے، جب کہ دیگر مفرور ملزمان میں پولیس اہلکار زائد عثمان، آفاق طارق طاہر اور ان کی ساتھی خاتون نادیہ شامل ہیں۔ وااضح رہے کہ پولیس نے فرار ملزمان کی گرفتاری کے لیے مختلف مقامات پر چھاپے مارنے کا آغاز کر دیا ہے۔ واقعے کی سنگینی کے پیش نظر اعلیٰ حکام نے بھی نوٹس لے لیا ہے۔
حافظ نعیم الرحمن کا فلسطینیوں کے حق میں 11 اپریل کو امریکی قونصل خانے کی طرف مارچ کرنے کا اعلان
امیر جماعت اسلامی پاکستان، حافظ نعیم الرحمان نے فلسطین کی موجودہ صورتحال پر گہری تشویش کا اظہار کرتے ہوئے کہا کہ رمضان المبارک اور عید کے موقع پر بھی فلسطینیوں پر ہونے والے مظالم میں کوئی کمی نہیں آئی ، انہوں نے 11 اپریل کو امریکی قونصل خانے کی طرف مارچ کرنے کا اعلان کیا ہے۔ حافظ نعیم الرحمان نے لاہور میں پریس کانفرنس کرتے ہوئے کہا کہ 11 اپریل کو امریکی قونصل خانے کی طرف مارچ کریں گے، 13 اپریل کو کراچی اور 20 اپریل کو اسلام آباد میں مارچ کریں گے۔ انہوں نے اس بات پر بھی زور دیا کہ اسرائیل کی دہشت گردی کا سب سے بڑا حامی امریکہ ہے، جو انسانی حقوق کے دعوے کے باوجود فلسطینیوں کے حقوق کے خلاف کام کر رہا ہے۔ حافظ نعیم الرحمن نے کہا کہ اسرائیل کی حمایت کرنے والے ممالک خاص طور پر امریکہ، برطانیہ اور دیگر مغربی طاقتیں فلسطین میں قتل عام کے خلاف خاموش ہیں اور اس عالمی خاموشی کے باعث فلسطینیوں کی حالت زار پر پردہ ڈال دیا گیا ہے۔ انہوں نے کہا کہ امریکہ کے اندر اور یورپ میں کئی بار احتجاج ہوئے ہیں، لیکن عالمی طاقتوں کی خاموشی فلسطینیوں کے حقوق کی پامالی کو جاری رکھنے کی وجہ بن رہی ہے۔ انہوں نے پاکستان اور دیگر مسلم ممالک کی خاموشی کو بھی فلسطینیوں کی مشکلات میں اضافے کا سبب قرار دیا۔ حافظ نعیم الرحمن نے مسلم ممالک کی قیادت سے اپیل کی کہ وہ اسرائیل کی حمایت کو مسترد کرتے ہوئے فلسطینیوں کی حمایت میں آواز بلند کریں۔ انہوں نے فلسطین کے مسئلے کو صرف ایک جغرافیائی یا سیاسی مسئلہ نہ سمجھتے ہوئے اسے ایک اسلامی مسئلہ قرار دیا اور کہا کہ پاکستان کے لیے فلسطین کا مسئلہ ایک ایمانی معاملہ ہے۔ حافظ نعیم نے کہا کہ پاکستان نے کبھی اسرائیل کو تسلیم نہیں کیا اور یہ اس کا اصولی موقف ہے جو قائداعظم محمد علی جناح نے بھی اپنایا تھا۔ حافظ نعیم الرحمن نے اس بات پر زور دیا کہ پاکستان کی حکومت اور اپوزیشن کو اس مسئلے پر اپنے اختلافات کو ایک طرف رکھتے ہوئے مشترکہ طور پر فلسطین کے لیے آواز اٹھانی چاہیے۔ انہوں نے کہا کہ پاکستان کی قومی سیاست کو فلسطین کے مسئلے پر یکجہتی دکھانی چاہیے اور ہر مسلمان ملک کو فلسطینی عوام کی مدد کرنی چاہیے۔ انہوں نے مزید کہا کہ پاکستان کی حکومت کو چاہیے کہ وہ اس عالمی مسئلے پر اپنی پوزیشن واضح کرے اور اسرائیل کی حمایت کرنے والے ممالک کے ساتھ اپنے تعلقات پر نظر ثانی کرے۔ جماعت اسلامی اس مہم کو عالمی سطح پر بھی پھیلائے گی اور عالمی تنظیموں، ڈاکٹرز اور پارلیمنٹرینز کو ساتھ لے کر ایک عالمی تحریک شروع کرے گی تاکہ فلسطینی عوام کی حمایت میں عالمی سطح پر دباؤ ڈالا جا سکے.
امریکی وفد کا اسلام آباد دورہ کیا اثرات مرتب کرے گا؟
امریکی محکمہ خارجہ کے سینئر عہدیدار ایرک میئر کی قیادت میں ایک اعلیٰ سطحی وفد 8 سے 10 اپریل 2025 کے دوران اسلام آباد کا دورہ کرے گا۔ اس دورے کا مقصد پاکستان منرلز انویسٹمنٹ فورم میں شرکت اور معدنیات کے شعبے میں امریکی مفادات کو فروغ دینا ہے۔ یہ فورم او جی ڈی سی ایل، حکومت پاکستان اور دیگر سٹریٹجک پارٹنرز کے اشتراک سے 8 اور 9 اپریل کو جناح کنونشن سینٹر میں منعقد ہو رہا ہے۔ یہ ایونٹ عالمی سرمایہ کاروں کے لیے پاکستان کے معدنی وسائل، خاص طور پر نایاب اور قیمتی دھاتوں کے شعبے میں سرمایہ کاری کے امکانات کا جائزہ لینے کا ایک اہم موقع فراہم کرے گا۔ امریکی وفد پاکستان میں امریکی کاروباری مواقع کو فروغ دینے اور اقتصادی تعلقات کو مزید مضبوط بنانے کے لیے اعلیٰ پاکستانی حکام سے ملاقاتیں کرے گا۔ دورے کے دوران ایرک میئر انسداد دہشت گردی سے متعلق تعاون کی اہمیت پر بھی بات کریں گے، جو دونوں ممالک کے درمیان سیکیورٹی شراکت داری کا اہم ستون ہے۔ یہ پیش رفت اس وقت سامنے آئی ہے جب امریکا نے پاکستان سمیت مختلف ممالک پر درآمدی ڈیوٹی عائد کی ہے۔ صدر ٹرمپ کے اعلان کے مطابق پاکستان پر 29 فیصد درآمدی محصولات لاگو کیے گئے، حالانکہ پاکستان کی برآمدات کا امریکی درآمدات میں حصہ انتہائی محدود ہے ،صرف 0.16 فیصد۔ پاکستان کی امریکہ کو سالانہ 6 ارب ڈالر کی برآمدات میں سے 75 سے 80 فیصد ٹیکسٹائل مصنوعات پر مشتمل ہوتی ہیں، جنہیں خطے کے دیگر ممالک کے ساتھ سخت مسابقت کا سامنا ہے۔ وزیر اعظم شہباز شریف متعدد مواقع پر معدنیات کے شعبے کو پاکستان کی معیشت کی بحالی کے لیے ایک بنیادی ستون قرار دے چکے ہیں۔ حالیہ برسوں میں ریکوڈک کے سونے اور تانبے کے ذخائر میں غیر ملکی سرمایہ کاری پر بھی توجہ دی جا رہی ہے۔ سعودی کمپنی منارا منرل اس سلسلے میں بارک گولڈ کے اشتراک سے بلوچستان میں سرمایہ کاری پر غور کر رہی ہے۔ پاکستان منرلز انویسٹمنٹ فورم اسی کوشش کا حصہ ہے کہ ملک اپنے قدرتی وسائل کو مؤثر انداز میں عالمی منڈی سے جوڑے اور پائیدار اقتصادی ترقی کی بنیاد رکھے۔
وہ مناظر جب اسرائیلی فوج نے فلسطین میں 15 امدادی کارکنوں کو شہید کیا
23 مارچ کے واقعے کی ایک نئی موبائل فون ویڈیو نے اسرائیل کے اس مؤقف کو چیلنج کر دیا ہے جس میں کہا گیا تھا کہ ایمبولینسوں اور فائر ٹرک پر گولیاں چلانے کا جواز موجود تھا۔ اس واقعے میں 15 امدادی کارکن شہید ہوئے تھے۔ ویڈیو فلسطین ریڈ کریسنٹ سوسائٹی (پی آر سی ایس) نے جاری کی ہے، جو اندھیرے میں چلتی گاڑیوں کو دکھاتی ہے جن پر ہیڈلائٹس اور ایمرجنسی فلیشنگ لائٹس روشن تھیں، جس کے کچھ ہی دیر بعد ان پر حملہ ہوتا ہے۔ پی آر سی ایس کا کہنا ہے کہ یہ فوٹیج ایک پیرامیڈک کے فون سے ملی، جسے بعد میں مردہ پایا گیا۔ ویڈیو میں واضح طور پر دکھایا گیا ہے کہ نشان زدہ گاڑیاں سڑک کنارے رکی ہیں، ان کی لائٹس جل رہی ہیں اور کچھ امدادی کارکن رضاکاروں کا لباس پہنے باہر نکلتے ہیں۔ جس موبائل سے یہ ویڈیو بنی، اس کی ونڈ اسکرین پر گولیوں کے نشانات بھی نظر آتے ہیں، اور پس منظر میں فائرنگ کی آوازیں کئی منٹ تک سنائی دیتی ہیں۔ ویڈیو بنانے والے کی آواز میں دعا کی جا رہی ہے، اور اسے بعد میں مارے گئے پیرامیڈکس میں سے ایک سمجھا گیا۔ یہ فون ایک ہفتے بعد اس کی لاش کے ساتھ ایک اتلی قبر سے ملا۔ مجموعی طور پر آٹھ پیرامیڈیکس، چھ سول ڈیفنس کے کارکن، اور اقوام متحدہ کا ایک ملازم مارے گئے، اور ان کی لاشیں تباہ شدہ گاڑیوں کے قریب ریت میں دبی ہوئی پائی گئیں۔ اسرائیلی فوج آئی ڈی ایف نے پہلے دعویٰ کیا تھا کہ ان گاڑیوں پر کسی قسم کے ایمرجنسی سگنلز موجود نہیں تھے، لیکن ویڈیو کے سامنے آنے کے بعد آئی ڈی ایف نے کہا کہ وہ اس واقعے کی مکمل اور گہرائی سے تحقیقات کرے گی۔ اسرائیل نے دعویٰ کیا کہ اس واقعے میں عسکریت پسند مارے گئے، لیکن نہ کوئی ثبوت دیا، نہ مزید تفصیل پیش کی کہ فوجی کن خطرات کا سامنا کر رہے تھے۔ واقعے کے ایک زندہ بچ جانے والے، پیرامیڈک منتھر عابد نے خبر رساں ادارے بی بی سی کو بتایا کہ گاڑیاں مکمل طور پر شناخت شدہ تھیں، اور ان پر اندرونی و بیرونی لائٹس روشن تھیں۔ انہوں نے کسی عسکریت پسند تنظیم سے تعلق کی سختی سے تردید کی اور کہا کہ ان کا کام صرف لوگوں کی جان بچانا ہے۔ اقوام متحدہ میں پی آر سی ایس کے صدر ڈاکٹر یونس الخطیب نے اس واقعے کو ظالمانہ جرم قرار دیتے ہوئے آزاد اور شفاف تحقیقات کا مطالبہ کیا۔ انہوں نے ایک شہید پیرامیڈک کے آخری الفاظ کا حوالہ بھی دیا: “ماں مجھے معاف کر دو، میں صرف لوگوں کی مدد کرنا چاہتا تھا، میں جان بچانا چاہتا تھا۔” اس واقعے کے بعد سے ایک پیرامیڈک ابھی تک لاپتہ ہے۔
