کراچی: ون وے کی خلاف ورزی پر 15 ہزار روپے جرمانہ عائد کرنے کا فیصلہ
کراچی میٹروپولیٹن کارپوریشن نے شہر کی اہم شاہراہوں پر ون وے کی خلاف ورزی کرنے والوں کے خلاف سخت اقدام اٹھاتے ہوئے 15,000 روپے جرمانہ عائد کرنے کا فیصلہ کر لیا۔ یہ اقدام میئر کراچی بیرسٹر مرتضیٰ وہاب اور کراچی ٹاسک فورس کی ہدایت پر اٹھایا گیا ہے تاکہ ٹریفک قوانین کی خلاف ورزیوں پر قابو پایا جا سکے اور شہریوں کی جان و مال کے تحفظ کو یقینی بنایا جا سکے۔ نجی نشریاتی ادارے 24 نیوز کے مطابق جرمانے سٹی وارڈنز کے ذریعے نافذ کیے جائیں گے، جب کہ اس حوالے سے باقاعدہ قرارداد آئندہ کونسل اجلاس میں پیش کی جائے گی تاکہ قانونی عمل مکمل کیا جا سکے۔ مزید پڑھیں: موٹروے حادثہ: سوتے ٹرک ڈرائیور کی پٹرولنگ موبائل کو ٹکر، انسپکٹر شہید میئر کراچی کا کہنا ہے کہ شہریوں کی حفاظت اور سڑکوں پر نظم و ضبط کے لیے سخت فیصلے ناگزیر ہیں۔ اُنہوں نے عوام سے اپیل کی کہ ٹریفک قوانین کی پاسداری کریں اور شہر میں محفوظ سفر کے لیے انتظامیہ سے تعاون کریں۔
راولپنڈی اور جہلم میں طوفانی بارشوں سے تین افراد جاں بحق، آٹھ زخمی
جہلم کی تحصیل سوہاوہ میں چاردیواری لوڈر گاڑی پر گرنے سے دو افراد جاں بحق اور چار زخمی ہو گئے۔ زخمیوں کو راولپنڈی کے ہسپتال منتقل کر دیا گیا جہاں دو کی حالت تشویشناک ہے۔ پنڈی اور سہالہ کے قریبی علاقوں میں دیوار گرنے کے مزید دو واقعات پیش آئے۔ درویسہ میں خاتون شدید زخمی جبکہ سہالہ میں ملبہ گرنے سے بچہ اور نوجوان شدید زخمی ہو گئے۔ راولپنڈی کے علاقے رتہ امرال میں مسجد کی دیوار گرنے سے ملبے تلے دب کر 24 سالہ نوجوان جاں بحق ہوگیا۔ وہ ہزارہ کالونی کا رہائشی تھا۔ لاش کو مزید کارروائی کے لیے مقامی ہسپتال منتقل کر دیا گیا۔ مقامی حکام نے موسم کے مسلسل اتار چڑھاؤ سے خبردار کیا ہے اور مکینوں سے محتاط رہنے کی اپیل کی ہے، خاص طور پر طوفان سے متاثرہ اور ساختی طور پر کمزور علاقوں میں ، تا کہ مزید اس طرح کے حادثات سے بچا جائے۔ اسلام آباد اور گرد نواح علاقوں میں شدید بارش اور اولے گرنے سے گاڑیوں کے شیشے ٹوٹ گئے جس سے شہریوں کو نقصان کا سامنا کرنا پڑا۔ متعدد مقامات پر بارش کے باعث ٹریفک بھی جام ہو گئی جس مسافروں کو مشکلات سے دو چار ہونا پڑا۔
ہم نےاختلاف رائےکو دشمنی بنالیا، اسی وجہ سے ملک میں انتشار ہے: شاہد خاقان عباسی
سابق وزیراعظم اور عوامی پاکستان پارٹی کے سربراہ شاہد خاقان عباسی نے ملک میں انتشار کی وجہ بتاتے ہوئے کہا کہ ہم نےاختلاف رائےکو دشمنی بنالیا، اسی وجہ سے ملک میں انتشار ہے۔ راولپنڈی میں پارٹی کے ویمن کنونشن سے خطاب میں شاہد خاقان عباسی نے کہا کہ اپوزیشن بھی آپس میں اتفاق نہیں پیدا کرسکی، جے یو آئی اور پی ٹی آئی کے اختلاف دور کرنے کی ضرورت ہے۔ سابق وزیراعظم نے مزید کہا کہ اپوزیشن الائنس کےلیے تحفظات کو دور کرنے کی ضرورت ہے، ملک میں جمہوریت کی بنیاد قانونی کی حکمرانی ہے۔ اُن کا کہنا تھا کہ وزیراعلیٰ خیبر پختونخوا اپوزیشن جماعت جے یو آئی کے خلاف بات کردیتے ہیں، جس کی بالکل بھی ضرورت نہیں۔ شاہد خاقان عباسی نے یہ بھی کہا کہ وزیراعظم شہباز شریف کہہ رہے ہیں کہ تیل کی قیمت اس لیے کم نہیں کر رہے بجلی سستی کریں گے۔ انہوں نے کہا کہ اب وزیراعظم نے کہا ہے کہ تیل کی قیمت کم نہ کرکے بلوچستان میں سڑکیں بنائیں گے، پوچھتا ہوں یہ کونسی پلاننگ ہے؟ اگر کل پیٹرول کی قیمت بڑھ گئی تو سڑکیں کیسے بنیں گی؟ سابق وزیراعظم نے کہا کہ لیوی ایک حد تک بڑھا سکتےہیں اس کےلیےاسمبلی سے اجازت لینا پڑے گی، خام خیالی سے ملک نہیں چلا کرتے، مستقل پالیسی سے چلا کرتے ہیں۔ حکومت پر تنقید کرتے ہوئے انہوں نے کہا کہ یہ عوام کی منتخب حکومتیں نہیں ہیں، اس خام خیالی سے ملک نہیں چلا کرتے بلکہ مستقل پالیسی سے چلا کرتے ہیں، ملکی مسائل کے بارے میں ہم تجربہ رکھتے ہیں اتنی صلاحیت ہے کہ ان مسائل کو حل کر سکیں۔ سابق وزیراعظم نے کہا کہ وسائل کی تقسیم، بجلی، معیشت بہتر کرنے اور احساس محرومی ختم کرنے کی صلاحیت رکھتے ہیں۔ انہوں نے کہا کہ حالات کانفرنسز سے بہتر نہیں ہوتے ہیں، آئین کہتا ہے منرلز صوبوں کے اختیار میں ہیں، وفاق ان پر قبضہ نہیں کر سکتا، ممکن نہیں وفاق اپنی پالیسی بنا کر معدنیات نکالنے کی کوشش کرے، یقینناً صوبوں کو اپنی صلاحیت میں اضافہ کرنا پڑے گا یہ کانفرنسز وفاق اور صوبوں کو مل کر کرنا پڑیں گی۔
ہارورڈ نفرت اور جہالت سکھا رہی ہے، ڈونلڈ ٹرمپ
امریکی صدر ڈونلڈ ٹرمپ نے ہارورڈ یونیورسٹی پر شدید تنقید کرتے ہوئے کہا ہے کہ ہارورڈ کو اب معیاری تعلیمی ادارے کی فہرست میں شامل نہیں کیا جاسکتا۔ ہارورڈ ایک ایسا مذاق بن چکی ہے، جو نفرت اور جہالت سکھاتی ہے۔ امریکی صدر ٹرمپ نے اپنے سوشل میڈیا پلیٹ فارم “ٹروتھ سوشل” پر بیان جاری کرتے ہوئے کہا کہ ہارورڈ کو اب معیاری تعلیمی ادارے کی فہرست میں شمار نہیں کیا جا سکتا اور نہ ہی اسے دنیا کی صفِ اول کی یونیورسٹیوں کی کسی فہرست میں شامل ہونا چاہیے۔ ان کا کہنا تھا کہ ہارورڈ ایک ایسا مذاق بن چکی ہے، جو نفرت اور جہالت سکھاتی ہے، اس لیے اسے مزید سرکاری مالی امداد نہیں دی جانی چاہیے۔ نجی نشریاتی ادارے جیو نیوز کے مطابق ٹرمپ انتظامیہ اور ہارورڈ کے درمیان تناؤ اُس وقت بڑھا جب یونیورسٹی نے حکومتی دباؤ کے باوجود اپنے تعلیمی اور انتظامی معاملات میں مداخلت قبول کرنے سے انکار کر دیا۔ مزید پڑھیں: حماس کی دنیا بھر کے مسلمانوں سے امریکی سرپرستی میں اسرائیلی مظالم کے خلاف ہفتہ یکجہتی منانے کی اپیل ٹرمپ کی ہدایت پر ہارورڈ یونیورسٹی کی 2.2 ارب ڈالر مالیت کی وفاقی امداد منجمد کر دی گئی ہے، جب کہ صدر ٹرمپ نے ادارے کی غیر منافع بخش حیثیت کا ٹیکس استثنیٰ ختم کرنے کی بھی دھمکی دی ہے۔ صدر ٹرمپ کا مطالبہ ہے کہ ہارورڈ یونیورسٹی اپنی داخلہ پالیسی، بھرتیوں اور تعلیمی شعبہ جات کی ساخت پر نظرثانی کرے، اور تعلیمی پروگرامز کا آڈٹ کرانے کی اجازت دے۔ ضرور پڑھیں: 27 اپریل کو مینارِ پاکستان پر اسرائیل کے خلاف مردہ باد ملین مارچ ہوگا، مولانا فضل الرحمان کا اعلان دوسری جانب ہارورڈ یونیورسٹی کے صدر، ایلن گاربر نے مؤقف اختیار کیا ہے کہ “ہم اپنی خودمختاری اور آئینی حقوق پر کوئی سمجھوتہ نہیں کریں گے۔” یاد رہے کہ ٹرمپ انتظامیہ کا الزام ہے کہ بعض یونیورسٹیاں، بالخصوص ہارورڈ، ’یہود مخالف جذبات‘ کو فروغ دے رہی ہیں، خاص طور پر اسرائیل کے غزہ پر جاری حملوں کے خلاف طلبہ کے احتجاجی مظاہروں کے تناظر میں یہ موقف سامنے آیا ہے۔
حماس کی دنیا بھر کے مسلمانوں سے امریکی سرپرستی میں اسرائیلی مظالم کے خلاف ہفتہ یکجہتی منانے کی اپیل
فلسطین کے علاقے غزہ میں جاری صیہونی جارحیت اور نسل کشی کے خلاف اسلامی مزاحمتی تحریک “حماس” نے دنیا بھر کے مسلمانوں بشمول عرب اقوام اور حریت پسندوں سے ہفتہ بھر پر مشتمل عالمی یکجہتی مہم میں بڑھ چڑھ کر حصہ لینے کی اپیل کی ہے۔ حماس کے جاری کردہ اعلامیے میں کہا گیا کہ غزہ میں فلسطینی عوام کے خلاف جاری صہیونی بربریت اور نسل کشی کی امریکی حمایت اور بین الاقوامی خاموشی کے تحت ارتکاب کیا جائے، اسلامی مزاحمتی تحریک (حماس) عرب اور مسلم اقوام اور دنیا بھر کے آزاد لوگوں سے ایک ہفتہ طویل عالمی یکجہتی میں بڑھ چڑھ کر حصہ لینے کی فوری اپیل کرتی ہے۔ حماس نے زور دیا ہے کہ آئندہ ہفتے غزہ کی حمایت میں تمام صلاحیتوں اور کوششوں کو متحرک، دارالحکومتوں اور شہروں میں ریلیوں اور دھرنوں سمیت یکجہتی کی سرگرمیوں کی تمام اقسام کو تیز کرکے جاری نسل کشی کے خاتمے کے لیے دباؤ ڈالا جائے۔ مزید پڑھیں: فلسطین پر اسرائیلی قبضہ: تاریخ کے اوراق میں کیا لکھا ہے؟ جاری کردہ اعلامیے میں کہا گیا ہے کہ حماس دنیا بھر میں عوامی یکجہتی کے لیے عوامی اور ٹریڈ یونینوں کے مطالبات کو سراہتی ہے، غزہ اور اس کے محصور لوگوں کی حمایت میں دنیا بھر کی تمام یونیورسٹیوں اور تعلیمی اداروں میں منگل (22 اپریل) کو عالمی عام ہڑتال کی اپیل کرتی ہے۔ حماس نے مطالبہ کرتے ہوئے کہا ہے کہ آنے والے جمعہ، ہفتہ اور اتوار (اپریل 18، 19 اور 20) کو غیر قانونی قبضے، امریکی مداخلت اور بین الاقوامی بے عملی کے خلاف عالمی غصے کے دنوں کے طور پر اعلان کیا جائے۔ یہ بھی پڑھیں: ’وہ امتحان کی تیاری کر رہے تھے‘ تیونس میں اسکول کی چھت گرنے سے تین طلبا جاں بحق حماس کا کہنا ہے کہ اس عوامی دباؤ کے ذریعے صیہونی جارحیت کو روکا جا سکتا ہے اور دنیا کو غزہ کے نہتے اور مظلوم عوام کی حمایت پر مجبور کیا جا سکتا ہے۔ حم نے دنیا بھر کے آزاد ضمیر افراد سے اپیل کی ہے کہ وہ اس یکجہتی مہم میں بھرپور حصہ لے کر انسانیت کا ساتھ دیں۔
پاکستان ویمنز ٹیم نے ویمنز ورلڈ کپ 2025 کے لیے کوالیفائی کر لیا
پاکستان ویمنز کرکٹ ٹیم نے رواں سال کے آخر میں انڈیا میں شیڈول آئی سی سی ویمنز ورلڈ کپ 2025 کے لیے باقاعدہ کوالیفائی کر لیا ہے۔ پاکستان کے ساتھ ساتھ بنگلہ دیش کی ٹیم بھی میگا ایونٹ میں شرکت کی اہل قرار پائی ہے۔ نجی نشریاتی ادارے اے آر وائی نیوز کے مطابق لاہور میں جاری ورلڈ کپ کوالیفائر ٹورنامنٹ میں بنگلہ دیش نے اسکاٹ لینڈ کو شکست دے کر نہ صرف اپنی مسلسل تیسری کامیابی حاصل کی بلکہ پوائنٹس ٹیبل پر چھ پوائنٹس کے ساتھ پاکستان کے برابر بھی آگئی۔ رن ریٹ کے فرق کی بنیاد پر بنگلہ دیش پہلے اور پاکستان دوسرے نمبر پر موجود ہے۔ دونوں ٹیموں نے اب ورلڈ کپ 2025 میں شرکت یقینی بنا لی ہے۔ اگرچہ ٹورنامنٹ میں اب بھی پانچ میچز باقی ہیں، تاہم ان کے نتائج پاکستان اور بنگلہ دیش کی پوزیشن میں معمولی رد و بدل تو کر سکتے ہیں، مگر کسی اور ٹیم کی کوالیفائی کرنے کی امید باقی نہیں رہی۔ مزید پڑھیں: چھکوں کی بارش مگر تماشائی غائب، پی ایس ایل کی رونق کہاں گئی؟ پاکستان ویمنز ٹیم نے کوالیفائر میں اپنے ابتدائی تینوں میچز میں شاندار فتوحات حاصل کیں، جب کہ بنگلہ دیش بھی اب تک ناقابل شکست ہے۔ واضح رہے کہ آئی سی سی ویمنز کرکٹ ورلڈ کپ کا یہ 13واں ایڈیشن ہوگا، جو 29 ستمبر سے 26 اکتوبر تک انڈیا میں کھیلا جائے گا۔ بھارت چوتھی بار اس ایونٹ کی میزبانی کرے گا، جب کہ 31 میچز پر مشتمل اس میگا ایونٹ میں آسٹریلیا ٹائٹل کے دفاع اور آٹھویں بار ٹرافی اپنے نام کرنے کی کوشش کرے گا۔ یہ پہلا موقع ہوگا جب ورلڈ کپ کے کسی ایڈیشن میں صرف آٹھ ٹیمیں حصہ لیں گی، اس سے قبل 1978، 1997 اور 2013 کے ایونٹس میں بھی یہی فارمیٹ اپنایا گیا تھا۔ یہ بھی پڑھیں: پی ایس ایل سیزن 10: چھ ایسے بالر جو سب سے زیادہ وکٹیں لے سکتے ہیں دوسری جانب انڈیا میں ورلڈ کپ کی میزبانی کے باوجود پاکستان کے میچز انڈیا میں نہیں کھیلے جائیں گے۔ گرین شرٹس کے تمام میچز کسی نیوٹرل وینیو پر ہوں گے۔ یاد رہے کہ پی سی بی اور بی سی سی آئی کے درمیان ایک معاہدہ طے پایا تھا، جس کے مطابق 2027 تک پاکستان اور انڈیا کسی بھی آئی سی سی یا اے سی سی ٹورنامنٹ میں ایک دوسرے کے ملک میں میچز نہیں کھیلیں گے۔ اسی معاہدے کے تحت انڈین ٹیم نے حال ہی میں پاکستان کی میزبانی میں ہونے والی چیمپئنز ٹرافی کے تمام میچز دبئی میں کھیلے تھے۔
پی ایس ایل 10: اسلام آباد یونائیٹڈ کی ملتان سلطانز کو 47 رنز سے شکست
پی ایس ایل (ایڈیشن 10) کے ساتویں میچ میں ملتان سلطانز نے اسلام آباد یونائیٹڈ کے مابین کھیلا گیا، جہاں یونائیٹڈ نے سلطانز کو 47 رنز سے شکست دے دی۔ ملتان سلطانز نے ٹاس جیت کر اسلام آباد یونائیٹڈ کو بلےبازی کی دعوت دیتے ہوئے فیلڈنگ کا فیصلہ کیا، یونائیٹڈ نے مقررہ 20 اوورز میں 6 وکٹوں کے نقصان کے عوض 202 رنز بنائے اور سلطانز کو جیت کے لیے 203 رنز کا ہدف دیا۔ پاکستان سپر لیگ 10 کے اہم مقابلے میں اسلام آباد یونائیٹڈ کے بلے بازوں نے شاندار کھیل کا مظاہرہ کرتے ہوئے ملتان سلطانز کے خلاف نمایاں کارکردگی دکھائی۔ اسلام آباد یونائیٹڈ کی جانب سے صاحبزادہ فرحان نے 53 رنز کی شاندار اننگز کھیلی، جب کہ کولن منرو نے 48، حیدر علی نے 33 اور جیسن ہولڈر نے 32 رنز کا قابلِ ذکر اضافہ کیا۔ ملتان سلطانز کی جانب سے کرس جارڈن نے عمدہ بولنگ کرتے ہوئے 2 کھلاڑیوں کو پویلین کی راہ دکھائی۔ اسلام آباد یونائیٹڈ کے 203 رنز کے ہدف کے تعاقب میں ملتان سلطانز کی پوری ٹیم 19ویں اوور میں 155 رنز بنا کر پویلین لوٹ گئی۔ ملتان سلطانز کی جانب سے کپتان محمد رضوان نے 38، افتخار احمد نے 32، جب کہ عثمان خان نے 31 رنز بنائے، سلطانز کا کوئی بھی کھلاڑی بڑا سکور بنانے میں کامیاب نہ ہوسکا۔ یونائیٹڈ گیندبازوں کی جانب سے عمدہ گیندبازی کا مظاہرہ کیا گیا، جیسن ہولڈر نے 4، عماد وسیم نے 2، جب کہ نسیم شاہ، ریلی میرڈیتھ، شاداب خان اور محمد شہزاد کی جانب سے 1،1،1،1 کھلاڑی کو آؤٹ کیا گیا۔ واضح رہے کہ ملتان سلطانز نے اسلام آباد یونائیٹڈ کے خلاف ٹاس جیت کر پہلے فیلڈنگ کا فیصلہ کیا۔ راولپنڈی کے اسٹیڈیم میں ہونے والے میچ کا ٹاس بارش اور گیلی آؤٹ فیلڈ کے باعث تاخیر کا شکار ہوا۔ ایونٹ میں اسلام آباد یونائیٹڈ اب تک ناقابلِ شکست رہی ہے اور پوائنٹس ٹیبل پر 6 پوائنٹس کے ساتھ سرفہرست ہے، جب کہ ملتان سلطانز کو اب تک کوئی فتح حاصل نہیں ہو سکی۔ٓ یاد رہے کہ ملتان سلطانز کے لیے سیزن کا آغاز مایوس کن رہا ہے۔ اپنے پہلے میچ میں شکست کے بعد ٹیم دباؤ کا شکار نظر آ رہی ہے۔ اگرچہ کپتان محمد رضوان نے شاندار سنچری اسکور کی، تاہم بولنگ یونٹ 234 رنز کا دفاع کرنے میں ناکام رہا۔ ملتان سلطانز کو اپنی بولنگ حکمت عملی پر نظرثانی کرنا ہوگی اگر وہ فتح کی راہ پر واپس آنا چاہتے ہیں۔ یہ میچ ایک سنسنی خیز مقابلہ ثابت ہو سکتا ہے، جہاں دونوں ٹیمیں فتح کے لیے بھرپور تیاری کے ساتھ میدان میں اتریں گی۔ کیا اسلام آباد یونائیٹڈ اپنی فتوحات کا سلسلہ برقرار رکھ پائے گی یا ملتان سلطانز واپسی کرے گی؟ فیصلہ آج کے میچ میں ہو گا۔
صدارتی آرڈیننس: حکومت لیوی کی نئی شرح کسی حد کے بغیر مقرر کر سکے گی
حکومت نے پیٹرولیم مصنوعات پر لیوی کی حد ختم کرتے ہوئے پیٹرول، ڈیزل اور دیگر مصنوعات پر لیوی کی شرح میں نمایاں اضافہ کر دیا۔ تفصیلات کے مطابق صدارتی آرڈیننس کے ذریعے ففتھ شیڈول ختم کر دیا گیا ہے، جس کے بعد حکومت اب پیٹرولیم لیوی کی کوئی بھی حد مقرر کر سکتی ہے۔ ففتھ شیڈول کے مطابق حکومت زیادہ سے زیادہ 70 روپے فی لیٹر لیوی لینے کی پابند تھی۔ مزید پڑھیں: فلسطین پر اسرائیلی قبضہ: تاریخ کے اوراق میں کیا لکھا ہے؟ پیٹرول پر لیوی 8 روپے 2 پیسے بڑھا کر 78 روپے 2 پیسے فی لیٹر کر دی گئی، جب کہ ڈیزل پر 7 روپے 1 پیسے کا اضافہ کرتے ہوئے نئی شرح 77 روپے 1 پیسے فی لیٹر مقرر کی گئی ہے۔ مٹی کے تیل پر پیٹرولیم لیوی 7 روپے 99 پیسے بڑھا کر 18 روپے 95 پیسے فی لیٹر کر دی گئی، جب کہ لائٹ ڈیزل آئل پر لیوی میں 7 روپے 62 پیسے اضافہ کر کے نئی شرح 15 روپے 37 پیسے فی لیٹر کر دی گئی ہے۔
سونا عوام کی پہنچ سے دور، 8600 روپے مزید مہنگا ہو گیا
پاکستان میں سونے کی قیمتیں مسلسل دوسرے دن تیزی سے بڑھنے کے بعد تاریخی بلند ترین سطح پر پہنچ گئیں، 24 قیراط سونے کی فی تولہ قیمت 8,600 روپے اضافے سے 348,000 روپے تک پہنچ گئی۔ آل پاکستان صرافہ جیمز اینڈ جیولرز ایسوسی ایشن کے مطابق 10 گرام سونے کی قیمت میں 7373 روپے کا اضافہ ہوا جو اب 298,353 روپے ہے۔ عالمی سطح پر بھی سونے کی قیمت میں 46 ڈالر کا اضافہ ہوا جو بین الاقوامی مارکیٹ میں 3310 ڈالر فی اونس پر ٹریڈ کر رہی ہے۔ گزشتہ روزعالمی اور مقامی دونوں بازاروں میں سونے کی قیمت میں اضافہ دیکھا گیا۔ بین الاقوامی بلین مارکیٹ میں فی اونس سونے کی قیمت 6 ڈالر اضافے سے 3224 ڈالر تک پہنچ گئی۔ مزید برآں، 10 گرام سونے کی قیمت میں 514 روپے کا اضافہ ہوا، جس سے یہ پاکستان میں 290,980 روپے ہو گئی۔ یاد رہے کہ گزشتہ روز فی تولہ سونے کی قیمت 600 روپے اضافے کے بعد 3 لاکھ 39 ہزار 400 روپے تھی۔
تجارتی جنگ: چین کا نجی ایئرلائنز کو امریکی بوئنگ طیارے نہ خریدنے کا حکم
چین نے تجارتی کشیدگی کے تناظر میں نجی ایئرلائنز کمپنیوں کو امریکا سے مزید بوئنگ جیٹ طیارے وصول نہ کرنے کی ہدایت جاری کر دی۔ بلومبرگ نیوز کی رپورٹ کے مطابق یہ فیصلہ امریکہ کی جانب سے چینی مصنوعات پر 145 فیصد ٹیرف عائد کیے جانے کے جواب میں کیا گیا ہے۔ رپورٹ کے مطابق بیجنگ نے چینی ایئر لائنز کو امریکی طیاروں کے پرزے اور آلات خریدنے سے بھی روک دیا ہے۔ چین کا شمار بوئنگ کے بڑے صارفین میں ہوتا ہے اور اس فیصلے کے بعد بوئنگ کے حصص کی قیمت میں کمی دیکھی گئی، جب کہ یورپی کمپنی ایئربس کی مارکیٹ پوزیشن مزید مضبوط ہو گئی ہے۔ رپورٹ میں بتایا گیا ہے کہ ایئر چائنا، چائنا ایسٹرن اور چائنا سدرن ایئر لائنز نے 2025 سے 2027 کے درمیان بوئنگ کے درجنوں طیارے حاصل کرنے کی منصوبہ بندی کی تھی، جن کی فراہمی اب متاثر ہو سکتی ہے۔ مزید پڑھیں: ٹرمپ کی حکومت بس اپنے امیر دوستوں کو اور امیر بنا رہی ہے، سابق امریکی صدر جو بائیڈن واضح رہے کہ بوئنگ پہلے ہی کئی چیلنجز کا سامنا کر رہی ہے، جن میں کارکنوں کی ہڑتال، سخت ریگولیٹری جائزہ اور سپلائی چین میں رکاوٹیں شامل ہیں۔ چین کی جانب سے ترسیل روکنے کا اقدام کمپنی کے لیے ایک اور جھٹکا ہے۔ عالمی خبررساں ادارے رائٹرز کے مطابق بوئنگ نے اس معاملے پر کوئی تبصرہ کرنے سے انکار کر دیا ہے، جب کہ کچھ تجزیہ کاروں کا کہنا ہے کہ کمپنی اپنی ترسیل دیگر ایئر لائنز کو منتقل کر سکتی ہے، لیکن طویل مدتی اثرات کو نظر انداز نہیں کیا جا سکتا۔ ماہرین نے خبردار کیا ہے کہ اگر چین نے امریکی ساختہ پرزوں کی درآمد بند کر دی تو اپنے مقامی تیار کردہ C919 طیارے کی تیاری اور پرواز بھی متاثر ہو سکتی ہے، کیونکہ ان میں بھی کئی امریکی پرزے استعمال ہوتے ہیں۔ یاد رہے کہ بیجنگ کی جانب سے یہ قدم ایک ایسے وقت میں اٹھایا گیا ہے، جب امریکہ اور چین کے درمیان تجارتی کشیدگی بڑھ رہی ہے۔ چینی حکومت اس وقت بوئنگ طیارے لیز پر لینے والی کمپنیوں کو مالی معاونت فراہم کرنے کے طریقوں پر بھی غور کر رہی ہے۔
