حکومت ہو یا اپوزیشن سب لائن لگائے کھڑے ہیں کہ ٹرمپ ہاتھ پھیرے اور ان کے دن بدل جائیں، حافظ نعیم الرحمان
امیر جماعتِ اسلامی حافظ نعیم الرحمان نے کہا ہے کہ حکومت ہو یا اپوزیشن سب لائن لگائے کھڑے ہیں کہ ٹرمپ کس پر ہاتھ پھیرے گا اور ان کے دن بدل جائیں گے اور اقتدار انہیں نصیب ہوجائے گا۔ مینارِ پاکستان لاہور پر منعقدہ دینی رہنماؤں کی اہم کانفرنس سے خطاب کرتے ہوئے امیر جماعتِ اسلامی نے کہا کہ فلسطینی اپنی جانوں کا نذرانہ دے رہے ہیں، معصوم بچوں کے جسم فضاؤں میں بکھر رہے ہیں، ان پر سفید فاسفورس بم برسائے جا رہے ہیں۔ انہوں نے کہا کہ فلسطینی جب خیموں میں پناہ لیتے ہیں تو ان کے خیمے بھی جلا دیے جاتے ہیں۔ اب تک 60 ہزار فلسطینی شہید ہو چکے ہیں جن کی شناخت ہو چکی ہے، جب کہ ہزاروں اب بھی ملبے تلے دبے ہوئے ہیں اور کوئی ان کی مدد کے لیے تیار نہیں۔ افسوس کا اظہار کرتے ہوئے حافظ نعیم الرحمان کا کہنا تھا کہ اسلامی دنیا کے 56 سے زائد ممالک ہیں، جن کی ریگولر آرمی کی تعداد 78 لاکھ سے زیادہ ہے۔ ہمارے پاس ٹینک، توپیں، بم، میزائل اور ایئر فورس موجود ہیں۔ ہمارے پاس جہاد کا تصور بھی موجود ہے، مگر بدقسمتی سے ہماری فوجی اور سیاسی قوتیں امریکا سے خوف کھاتی ہیں۔ انہوں نے کہا کہ آج امت مسلمہ کے سیاسی رہنما سمجھتے ہیں کہ اقتدار کا راستہ امریکا کے پاس ہے، اسی لیے سب کی نظریں امریکا پر لگی ہوئی ہیں۔ انہوں نے کہا کہ خدادادِ پاکستان بھی ایک نظریاتی ریاست ہے، جو کلمے کی بنیاد پر قائم ہوئی، لیکن یہاں حکومت ہو یا اپوزیشن سب لائن لگائے کھڑے ہیں کہ ٹرمپ کس پر ہاتھ پھیرے گا اور ان کے دن بدل جائیں گے اور اقتدار انہیں نصیب ہوجائے گا۔ امیر جماعت اسلامی نے خطاب میں کہا ہے کہ پاکستان میں اقتدار کی میوزیکل چیئر امریکا کی مرہون منت ہے۔ اسی لیے یہاں کی سیاسی قیادت امریکا سے خوف کھاتی ہے اورنعوذباللہ اسے خدا کا درجہ دے بیٹھی ہے۔ انہوں نے کہا کہ یہی ذہنیت ہے جو پاکستان کو حقیقی آزادی اور خودمختاری سے محروم رکھے ہوئے ہے۔ “یہی لوگ ہماری افواج اور عوام کو جہاد کے لیے تیار ہونے سے روکتے ہیں اور ہماری قومی طاقت کو مفلوج کر دیتے ہیں۔” حافظ نعیم نے زور دے کر کہا کہ “ہماری افواج ہماری شان اور ماتھے کا جھومر ہیں۔ ہمیں ان پر فخر ہے۔ مگر یہ قوت اللہ کی راہ میں لڑنے کے لیے ہے۔ ہمیں امید ہے کہ ہماری آرمی فلسطینیوں اور کشمیریوں کے لیے کھڑی ہو، انڈین جارحیت کا ڈٹ کر مقابلہ کرے۔” انہوں نے خبردار کیا کہ اگر یہ کردار ادا نہ کیا گیا تو عوام میں مایوسی، قوم پرستی اور فرقہ واریت جنم لیتی ہے، جس سے معاشرتی تفریق بڑھتی ہے۔ امیر جماعت اسلامی نے کہا کہ آج پوری دنیا میں مسلمانوں کے دو بڑے مسائل نمایاں ہیں، پہلا مسئلہ غزہ کا اور دوسرا کشمیر کا۔ غزہ نے دنیا کے باضمیر انسانوں کو جھنجھوڑ کر رکھ دیا ہے۔ 7 اکتوبر سے پہلے ہی 6 ہزار سے زائد فلسطینی اسرائیلی جیلوں میں قید تھے، ہر سمت سے غزہ کا محاصرہ تھا، ماؤں بہنوں کی تذلیل روز کا معمول تھا۔ حافظ نعیم نے کہا کہ حماس کے پاس کوئی دوسرا راستہ نہیں بچا تھا۔ ہر سمت سے غزہ کا محاصرہ تھا، ماؤں بہنوں کی تذلیل روز کا معمول تھا۔” انہوں نے کہا کہ قبلہ اول بار بار صیہونی جارحیت کا نشانہ بنتا ہے اور ہر سال سینکڑوں، ہزاروں فلسطینی شہید کر دیے جاتے ہیں، مگر عالمی برادری خاموش تماشائی بنی بیٹھی ہے۔ خطاب کے اختتام پر حافظ نعیم الرحمان نے مسلم دنیا کی قیادتوں کو بیداری اور عمل کی دعوت دی اور کہا کہ جب تک مسلمانوں کے حکمران اپنی ذمہ داری پوری نہیں کرتے، مظلوموں کا خون بہتا رہے گا۔
نارتھ ویسٹرن یونیورسٹی کے محققین نے چاول کے دانے کے برابر وائرلیس پیس میکر متعارف کروا دیا
نارتھ ویسٹرن یونیورسٹی کے محققین نے دنیا کا سب سے چھوٹا پیس میکر متعارف کرایا ہے ، ایک وائرلیس اور تحلیل ہونے والا آلہ جو چاول کے دانے کے برابر سائز کا ہے اور خاص طور پر پیدائشی دل کے عارضوں والے نوزائیدہ بچوں کے لیے عارضی کارڈیک پیسنگ فراہم کرنے کے لیے ڈیزائن کیا گیا ہے۔ اس کا سائز صرف 1.8 ملی میٹر چوڑا، 3.5 ملی میٹر لمبا اور 1 ملی میٹر موٹا ہے، اور یہ سرنج کے ذریعے انجیکٹ کیا جا سکتا ہے، جس سے جراحی کی ضرورت ختم ہو جاتی ہے۔ یہ بیٹریوں یا تاروں کے بغیر کام کرتا ہے، اور ایک گالوانک سیل کا استعمال کرتا ہے جو جسم کے مائعات کے ساتھ رابطے میں آکر ایک الیکٹریکل کرنٹ پیدا کرتا ہے جو دل کی دھڑکن کو متوازن رکھتا ہے۔ چسٹ پر لگانے والا ایک ویئربل پیچ دل کی دھڑکن کی نگرانی کرتا ہے اور جب بھی کوئی بے قاعدگی پائی جاتی ہے تو انفرا ریڈ روشنی کی پلسوں کے ذریعے پیس میکر کو متحرک کرتا ہے۔ یہ آپٹیکل چالو کرنے کا نظام روایتی ریڈیو فریکوئنسی سسٹمز کی جگہ لیتا ہے، جس سے ایک چھوٹے اور اینٹینا سے آزاد ڈیزائن کی اجازت ملتی ہے اور مریضوں کے لیے خطرات اور تکالیف میں کمی آتی ہے۔ اس حوالے سے پروفیسر جان روگرز، مرکزی موجد کا کہنا ہے کہ عارضی پیس میکرز بچوں کی دل کی سرجریوں کے دوران ضروری ہوتے ہیں۔ یہ آلہ عمل کو آسان بناتا ہے اور اس کی نکالنے کے لیے دوسری سرجری کی ضرورت کو ختم کرتا ہے۔ اس کا تحلیل ہونے والا ڈیزائن اس بات کو یقینی بناتا ہے کہ آلہ اپنے کام کے مکمل ہونے کے بعد قدرتی طور پر تحلیل ہو جائے، جو عام طور پر ایک ہفتے کے اندر ہوتا ہے، اور روایتی پیس میکر سسٹمز سے جڑے پیچیدگیوں جیسے کہ انفیکشن، خون بہنا یا ٹشو کو نقصان پہنچنے کے خطرات کو کم کرتا ہے۔
مقبوضہ کشمیر میں انڈین فوج کی بربریت جاری، مزید پانچ کشمیریوں کے گھر تباہ
مقبوضہ جموں و کشمیر میں انڈین قابض افواج نے ریاستی دہشت گردی کا مظاہرہ کرتے ہوئے مزید پانچ کشمیریوں کے مکانات دھماکا خیز مواد سے تباہ کر دیے۔ تین دن کے دوران تباہ شدہ گھروں کی تعداد سات ہو گئی۔ نجی نشریاتی ادارے ڈان نیوز کی رپورٹ کے مطابق پہلگام حملے کی آڑ میں انڈیا کا مکروہ چہرہ ایک بار پھر بے نقاب ہو گیا ہے، جہاں انڈین فوج نے عام کشمیریوں کے گھروں کو نشانہ بنانا شروع کر دیا ہے۔ ذرائع کے مطابق تباہ کیے گئے مکانات عام کشمیری شہریوں کے تھے اور دھماکوں سے قریبی درجنوں گھروں کو بھی شدید نقصان پہنچا ہے، جس کے نتیجے میں کئی خاندان بے گھر ہو کر کسمپرسی کی حالت میں مبتلا ہو گئے ہیں۔ دفاعی تجزیہ کاروں کا کہنا ہے کہ انڈین قابض افواج کا اصل مقصد کشمیریوں کے حوصلے پست کرنا اور انہیں اجتماعی سزا دینا ہے۔ مبصرین کے مطابق انڈیا مقبوضہ کشمیر میں اسرائیلی طرز کے مظالم ڈھا رہا ہے تاکہ مسلمانوں کی زمینوں پر قبضہ کر کے انہیں بے دخل کیا جا سکے۔ مزید پڑھیں: ایک گھنٹہ دہشت گردی ہوتی رہی، کوئی نہیں آیا لیکن پاکستان پر الزام 10 منٹ میں لگا دیا گیا، شاہد آفریدی کل جماعتی حریت کانفرنس کے ترجمان نے انڈین کارروائیوں کی مذمت کرتے ہوئے کہا ہے کہ یہ بربریت مودی سرکار کے ہندوتوا ایجنڈے کا حصہ ہے، جس کا مقصد کشمیریوں کو ان کے گھروں سے نکال کر علاقے کے مسلم اکثریتی تشخص کو ختم کرنا ہے۔ ترجمان نے واضح کیا کہ کشمیری عوام تمام تر انڈین مظالم کے باوجود اپنے حق خودارادیت کے لیے جدوجہد جاری رکھیں گے۔ ترجمان کا مزید کہنا تھا کہ انڈیا ایک طرف کشمیریوں پر ظلم ڈھا رہا ہے اور دوسری جانب ہندوؤں کو ڈومیسائل جاری کر کے مقبوضہ وادی کو ہندو ریاست میں بدلنے کی سازش کر رہا ہے۔مگر کشمیری عوام اقوام متحدہ کے تسلیم شدہ اپنے حق خودارادیت کے حصول تک اپنی جدوجہد جاری رکھیں گے۔
اسرائیل کی جنگ بندی معاہدے کی خلاف ورزی، لبنان پر ایک بار پھر فضائی حملہ کردیا
اسرائیل نے جنگ بندی معاہدے کے باوجود ایک بار پھر اشتعال انگیزی کرتے ہوئے لبنان کے دارالحکومت بیروت کے جنوبی علاقے پر فضائی حملہ کر دیا۔ بین الاقوامی میڈیا رپورٹس کے مطابق اسرائیلی فضائیہ نے جنوبی بیروت کے گنجان آباد علاقے دحیہ میں ایک عمارت پر حملہ کر کے اسے مکمل طور پر تباہ کر دیا ہے۔ حملے کے بعد علاقے میں دھوئیں کے گہرے بادل چھا گئے ہیں اور ہر طرف خوف و ہراس پھیل گیا ہے۔ مزید پڑھیں: سیکیورٹی فورسز نے پاک افغان سرحد پر دراندازی کی کوشش ناکام بنا دی، 54 خارجی ہلاک لبنانی قومی خبر رساں ایجنسی کے مطابق حملے کے بعد اسرائیلی ڈرون مسلسل اس علاقے میں پرواز کرتے رہے ہیں۔ اسرائیلی فوج (آئی ڈی ایف) کے مطابق یہ حملہ حزب اللہ کے ایک مبینہ اثاثے کو نشانہ بنانے کے لیے کیا گیا۔ اسرائیلی حکام نے دعویٰ کیا کہ کارروائی سے قبل شہریوں کو کم از کم 300 میٹر کے فاصلے پر منتقل ہونے کی ہدایت دی گئی تھی۔ لبنانی میڈیا کے مطابق عمارت کو تباہ کرنے سے قبل علاقے میں کئی چھوٹے انتباہی حملے بھی کیے گئے۔ واضح رہے کہ اس حملے میں جانی نقصان کے حوالے سے ابھی تک کوئی تفصیلات سامنے نہیں آئی ہیں۔ یاد رہے کہ نومبر میں لبنان کے ساتھ جنگ بندی کے نفاذ کے بعد یہ تیسری مرتبہ ہے کہ اسرائیلی فوج نے بیروت پر حملہ کیا ہے۔ مارچ میں بھی اسرائیل نے بیروت پر فضائی حملہ کرتے ہوئے دعویٰ کیا تھا کہ یہ لبنان سے داغے گئے ایک راکٹ کے جواب میں کیا گیا تھا، تاہم حزب اللہ نے اس حملے کی ذمہ داری لینے سے انکار کر دیا تھا۔ یہ بھی پڑھیں: متنازع کینال منصوبہ: پولیس کا کراچی بار کے رہنماؤں پر تشدد اپریل کے اوائل میں جنگ بندی کے باوجود اسرائیل نے ایک اور حملہ کیا تھا، جس میں حزب اللہ کے ایک فوجی اہلکار کو نشانہ بنایا گیا تھا۔ آج کا حملہ بھی بغیر کسی اشتعال انگیزی کے کیا گیا، جو جنگ بندی کی اسرائیل کی روزمرہ خلاف ورزیوں کا تسلسل ہے۔ لبنانی حکام نے اسرائیلی کارروائی کو کھلی جارحیت قرار دیتے ہوئے عالمی برادری سے نوٹس لینے کا مطالبہ کیا ہے۔
سی سی آئی اجلاس میں نہر کا مسئلہ حل نہ ہوا تو پیپلز پارٹی حکومت چھوڑ دے گی، وزیر توانائی سندھ
پاکستان پیپلز پارٹی کے رہنما اور سندھ کے وزیر توانائی ناصر شاہ نے خبردار کیا ہے کہ اگر مشترکہ مفادات کونسل (سی سی آئی) کے آئندہ اجلاس میں نہر سے متعلق مسئلہ حل نہ ہوا تو پارٹی وفاقی حکومت سے علیحدگی اختیار کر سکتی ہے۔ پارٹی کے ہیڈکوارٹر میں متحدہ قومی موومنٹ پاکستان کے رہنماؤں سے ملاقات کے بعد میڈیا سے بات کرتے ہوئے ناصر شاہ نے کہا کہ اگر سی سی آئی کے اجلاس میں نہروں کا مسئلہ حل نہ ہوا تو پیپلز پارٹی حکومت سے الگ ہو جائے گی۔ انہوں نے زور دے کر کہا کہ نہر کا مسئلہ سندھ کے لیے انتہائی اہمیت کا حامل ہے اور اس نے صوبے بھر کے لوگوں کو متحد کر دیا ہے۔ انہوں نے کہا کہ نہر کے معاملے پر سندھ میں سب ایک پیج پر ہیں اور ایم کیو ایم نے بھی سندھ اسمبلی اور قومی اسمبلی دونوں میں پی پی کی مکمل حمایت کی ہے۔ صوبائی وزیر توانائی نے وزیر اعظم شہباز شریف، صدر آصف علی زرداری اور پیپلز پارٹی کے چیئرمین بلاول بھٹو زرداری کے درمیان مضبوط ہم آہنگی کا حوالہ دیتے ہوئے یقین ظاہر کیا کہ معاملہ حل ہو جائے گا۔ انہوں نے کہا کہ مجھے یقین ہے کہ وزیراعظم، صدر اور چیئرمین بلاول کے درمیان ہونے والا فیصلہ حتمی ہوگا۔ انہوں نے خبردار کیا کہ اگر پیپلز پارٹی اتحاد سے نکل گئی تو وفاقی حکومت نہیں بچ سکے گی، ہم جانتے ہیں کہ اگر پی پی حکومت چھوڑتی ہے تو وہ جاری نہیں رہ سکے گی، اسی لیے ہم توقع کرتے ہیں کہ حکومت نہر کے معاملے پر اپنا وعدہ پورا کرے گی۔ پی پی کے وفد نے ناصرشاہ کی قیادت میں سینئر رہنما وقار مہدی اور سعید غنی سمیت ایم کیو ایم پی کے رہنماؤں ڈاکٹر فاروق ستار، امین الحق اور دیگر سے ملاقات کی جس میں متعدد سیاسی امور پر تبادلہ خیال کیا۔ ملاقات کے دوران پی پی پی نے ایم کیو ایم پی سے درخواست کی کہ وہ آئندہ سینیٹ کے ضمنی انتخاب سے خالی ہونے والی نشست پر اپنا امیدوار واپس لے۔ ملاقات کے بعد صحافیوں سے بات کرتے ہوئے ڈاکٹر فاروق ستار نے کہا کہ ایم کیو ایم پی پی پی کی درخواست پر فیصلہ کرنے سے پہلے اپنی مرکزی کمیٹی سے مشاورت کرے گی۔ انہوں نے کہا کہ اندرونی بات چیت کے بعد حتمی جواب دیا جائے گا،انہوں نے مزید کہا کہ ملاقات کے دوران بلدیاتی نظام میں مجوزہ ترامیم پر بھی تبادلہ خیال کیا گیا
برطانیہ: سات سالوں کے بعد اپریل میں موسم گرم ترین ریکارڈ
جنوبی انگلینڈ میں اس ہفتے کے آخر میں درجہ حرارت 27ڈگری تک پہنچ سکتا ہے جو 2018 کے بعد اپریل میں ریکارڈ کیا گیا سب سے زیادہ درجہ حرارت ہے۔ عالمی نشریاتی ادارے بی بی سی کے مطابق گرمی اور دھوپ برطانیہ کے بیشتر علاقوں میں بڑے پیمانے پر بڑھے گی،تاہم، بارش کی کمی ممکنہ جنگل کی آگ کے بارے میں دوبارہ خدشات کو جنم دے گی۔ آخری مرتبہ اپریل میں درجہ حرارت 27 ڈگری سینٹی گریڈ تک بڑھ گیا تھا جو کیمبرج میں 2018 میں ریکارڈ کیا گیاتھا۔ ہفتے کا آغاز انگلینڈ اور ویلز میں درجہ حرارت پہلے ہی 19-24 ڈگری سینٹی گریڈ کے ساتھ شروع ہوتا ہے، اسکاٹ لینڈ اور شمالی آئرلینڈ کا زیادہ تر حصہ قدرے ابر آلود حالات میں 16-19 سینٹی گریڈ کے ارد گرد ہے۔ شمال مغربی سکاٹ لینڈ میں بھی کچھ تیز بارش کا امکان ہے۔ تاہم، جیسے جیسے دھوپ والے آسمان زیادہ بڑے پیمانے پر بڑھتے ہیں، تیز دھوپ اور ہلکی ہواؤں کا امتزاج بدھ یا جمعرات کو درجہ حرارت کو چوٹی تک پہنچنے میں مدد کرے گا، اور چاروں ممالک میں سے ہر ایک میں اب تک سال کا سب سے زیادہ درجہ حرارت ہوگا۔ سکاٹ لینڈ اور شمالی آئرلینڈ کے کچھ حصوں میں 23 ڈگری متوقع ہے، ویلز میں 25ڈگری اور انگلینڈ میں 27ڈگری۔ لندن، ہوم کاؤنٹیز اور کیمبرج شائر وہ علاقے ہیں جن کی توقع ہے کہ حالات میں سب سے زیادہ گرم رہیں گے۔ برطانیہ کے آس پاس سمندری درجہ حرارت اس وقت نسبتاً کم ہونے کے ساتھ، ساحلی علاقے جہاں سمندری ہوائیں چلتی ہیں، ٹھنڈا محسوس کریں گے۔
متنازع کینال منصوبہ: پولیس کا کراچی بار کے رہنماؤں پر تشدد
سندھ میں کینال بنانے کے حکومتی فیصلے کے خلاف وکلاء کے احتجاج کے دوران پولیس نے گلشن حدید میں قائم احتجاجی کیمپ کو زبردستی ہٹا دیا۔ اس کارروائی کے دوران پولیس اور وکلاء کے درمیان جھڑپیں ہوئیں، جبکہ پولیس نے کراچی بار کے رہنماؤں پر تشدد کیا۔ وکلاء رہنماؤں نے پولیس کے اقدام کی شدید مذمت کرتے ہوئے اعلان کیا ہے کہ کل کراچی بار میں مکمل ہڑتال کی جائے گی۔ ان کا کہنا ہے کہ جب تک حکومت سندھ کینال منصوبے کا فیصلہ واپس نہیں لیتی، احتجاجی دھرنے جاری رہیں گے۔ دوسری جانب، صوبائی وزیر اطلاعات شرجیل انعام میمن نے احتجاج ختم کرنے کی اپیل کرتے ہوئے کہا کہ سندھ میں کینالوں کی تعمیر پر پیدا ہونے والا تنازع چیئرمین بلاول بھٹو زرداری کی انتھک محنت اور مؤثر حکمت عملی کے باعث کامیابی سے حل کر لیا گیا ہے۔ شرجیل میمن نے مزید کہا کہ 2 مئی کو مشترکہ مفادات کونسل (سی سی آئی) کے اجلاس کے بعد یہ مسئلہ ہمیشہ کے لیے بند ہو جائے گا۔ انہوں نے تمام سیاسی جماعتوں اور وکلاء برادری سے اپیل کی کہ سڑکوں کو فوری طور پر کھولا جائے تاکہ گڈز ٹرانسپورٹ کی روانی متاثر نہ ہو اور عوام کو مالی و معاشی نقصان سے بچایا جا سکے۔ انہوں نے کہا کہ سڑکوں کی بندش کی وجہ سے عوام، مال مویشی، امپورٹ ایکسپورٹ کے شعبے، کسانوں اور غریب طبقات کو شدید نقصان پہنچ رہا ہے۔ شرجیل میمن نے تجویز دی کہ اگر دھرنے ختم کر دیے جائیں تو یہ سب کے مفاد میں ہوگا، تاہم اگر دھرنے جاری رہیں تو کم از کم سڑکوں کو کھول کر ٹریفک کی روانی کو یقینی بنایا جائے۔ انہوں نے زور دیا کہ احتجاج کو پرامن دائرے میں رکھا جائے تاکہ عوام کی زندگی معمول پر آ سکے۔ شرجیل انعام میمن نے بتایا کہ حکومت سندھ وکلاء برادری اور تمام سیاسی جماعتوں سے رابطے میں ہے اور ہر فریق سے مذاکرات کے لیے تیار ہے۔ مزید برآں، انہوں نے سیاسی جماعتوں اور وکلاء سے اپیل کی کہ وہ شرپسند عناصر پر کڑی نظر رکھیں تاکہ کسی بھی قسم کی بدامنی سے بچا جا سکے۔ شرجیل میمن نے کہا کہ موجودہ ملکی صورتحال میں ہم سب کو مل کر سمجھداری اور دانشمندی سے فیصلے کرنے ہوں گے۔
کینیڈا: وینکوور میں ثقافتی میلے کے دوران گاڑی کے ہجوم پر چڑھنے سے 9 افراد ہلاک، متعدد زخمی ہوگئے
کینیڈا کے شہر وینکوور میں ایک ثقافتی میلے کے دوران افسوسناک واقعہ پیش آیا، جہاں ایک شخص نے ہجوم پر گاڑی چڑھا دی، جس کے نتیجے میں کم از کم 9 افراد جاں بحق اور متعدد زخمی ہو گئے۔ نجی خبررساں ادارے انڈیپینڈینٹ اردو کے مطابق واقعہ ہفتے کی شب 8 بج کر 14 منٹ پر پیش آیا، جب ایک گاڑی ’لاپو لاپو ڈے فیسٹیول‘ کے دوران اچانک گلی میں داخل ہو کر شرکاء پر چڑھ دوڑی۔ پولیس نے فوری کارروائی کرتے ہوئے وینکوور سے تعلق رکھنے والے 30 سالہ شخص کو جائے وقوعہ سے گرفتار کر لیا اور میجر کرائم سیکشن نے واقعے کی تحقیقات کا آغاز کر دیا ہے۔ پولیس نے ابتدائی بیان میں واضح کیا کہ موجودہ شواہد کے مطابق یہ واقعہ دہشت گردی سے تعلق نہیں رکھتا۔ وینکوور کے عبوری پولیس چیف سٹیو رائے نے نیوز کانفرنس میں بتایا کہ حملہ آور کو راہ گیروں نے قابو پانے کے بعد پولیس کے حوالے کیا۔ سوشل میڈیا پر سامنے آنے والی ویڈیوز میں ایک سکیورٹی گارڈ کے ہمراہ کالے ہوڈی میں ملبوس نوجوان کو دیکھا جا سکتا ہے، جو معذرت کرتے ہوئے کہتا ہے کہ “مجھے افسوس ہے۔” عبوری پولیس چیف نے ویڈیو پر براہ راست تبصرہ کرنے سے گریز کیا تاہم بتایا کہ زیرِ حراست شخص پولیس کے لیے پہلے سے جانا پہچانا تھا اور وہ “مخصوص حالات” میں کام کر رہا تھا۔ واضح رہے کہ حادثہ جنوبی وینکوور کے ایک علاقے میں پیش آیا جہاں یہ ثقافتی میلہ جاری تھا۔ جائے وقوعہ سے لی گئی تصاویر میں ایک سیاہ رنگ کی ایس یو وی دیکھی جا سکتی ہے جس کے اگلے حصے کو شدید نقصان پہنچا ہے۔ تقریب میں شریک وینکوور کے کاروباری شخصیت جیمز کروزٹ نے واقعے کی منظرکشی کرتے ہوئے بتایا کہ “ہم نے سڑک پر لوگوں کو روتے، چیختے اور مدد مانگتے دیکھا۔ کچھ زخمی حالت میں زمین پر پڑے تھے اور کچھ بے جان لگ رہے تھے۔” مزید پڑھیں: ایرانی بندرگاہ پر دھماکہ: 700 سے زائد افراد زخمی، پانچ جاں بحق وینکوور کے میئر کینتھ سم نے اپنے ایک بیان میں واقعے پر گہرے دکھ اور افسوس کا اظہار کرتے ہوئے کہا کہ مکمل معلومات دستیاب ہوتے ہی عوام سے شیئر کی جائیں گی۔ ان کا کہنا تھا کہ “آج لاپو لاپو ڈے کی تقریب میں ہونے والے اندوہناک واقعے پر میں شدید رنجیدہ اور حیران ہوں۔”
کم سرمایہ بڑا منافع، محفوط مستقبل کے لیے کرپٹو کتنی مدد گار ہے؟
کم سرمایہ لگا کر بڑا منافع حاصل کرنے اور محفوظ مستقبل بنانے کے لیے کرپٹو کرنسی ایک مددگار راستہ ثابت ہو سکتی ہے۔ کرپٹو کرنسی میں کمانے کے لیے بہتر ہے کہ آپ طویل مدت سرمایہ کاری کریں، کیونکہ طویل عرصے کی سرمایہ کاری سے زیادہ فائدہ حاصل ہونے کے امکانات بڑھ جاتے ہیں۔ کرپٹو ایڈوائزر محمد ہارون نے پاکستان میٹرز سےخصوصی گفتگو کرتے ہوئے کہا کہ اگر کرپٹو میں سرمایہ کاری کرنا چاہتے ہیں تو آپ طویل مدت کے لیے سرمایہ کاری کریں جس سے آپ کو نقصان ہونے کے خدشات کم ہو جائیں گے۔ انہوں سرمایہ کاروں کی رہنمائی کرتے ہوئے کہا کہ اگرآپ ایک ہزار ڈالر کی سرمایہ کاری کرنا چاہتے ہیں تو ایک ہزار ڈالر کے کرپٹو کے سکے خرید کر رکھ لیں اور مارکیٹ پر نظر رکھیں جب آپ کو مارکیٹ منافع بخش لگے تو آپ اسے فروخت کر دیں۔ محمد ہارون نے مزید اصلاح کرتے ہوئے کہا کہ آپ ابھی سرمایہ کاری میں نئے نئے ہیں تو بغیر ایڈوائزر کے سرمایہ کاری نہ کریں کسی ایڈوائزر کے مشورے کے مطابق چلیں۔
پی ایس ایل 10: کوئٹہ گلیڈی ایٹرز نے پشاور زلمی کو 64 رنز سے شکست دے دی
پاکستان سپر لیگ (پی ایس ایل) کے 10ویں ایڈیشن کا 16واں میچ آج قذافی اسٹیڈیم لاہور میں کھیلا گیا، جس میں کوئٹہ گلیڈی ایٹرز نے پشاور زلمی کو 64 رنز سے شکست دے دی۔ پشاور زلمی نے ٹاس جیت کر گیند بازی کا فیصلہ کرتے ہوئے کوئٹہ گلیڈی ایٹرز کو بلے بازی کی دعوت دی۔ گلیڈی ایٹرز نے مقررہ 20 اوورز میں 7 وکٹوں کے نقصان پر 178 رنز بنائے اور زلمی کو جیت کے لیے 179 رنز کا ہدف دیا۔ گلیڈی ایٹرز کی جانب سے مارک چیپمین نے 33، سعود شکیل اور کوسل مینڈس نے 32، 32، جب کہ فن ایلن 31 رنز بنا کر نمایاں رہے۔ پشاور زلمی کی جانب سے الزاری جوزف نے 3، صائم ایوب نے 2، جب کہ لیوک ووڈ نے 1 وکٹ حاصل کی۔ کوئٹہ گلیڈی ایٹرز کے 179 رنز کے ہدف کی تعاقب کے لیے صائم ایوب اور بابراعظم اوپننگ کے لیے آئے، کپتان بابراعظم محض 12 رنز بنناکر محمد عامر کا شکار بن گئے۔ گلیڈی ایٹرز گیندبازوں کی جانب سے نہایت عمدہ بولنگ کا مظاہرہ کیا گیا، یکے بعد دیگرے سارے زلمی بلے باز آتے اور واپس پویلین لوٹ جاتے۔ 179 رنز کے ہدف کے تعاقب میں زلمی کی پوری ٹیم 15.2 اوورز میں 114 رنز پر ڈھیر ہوگئی اور گلیڈی ایٹرز نے میچ میں 64 رنز سے فتح حاصل کرلی۔ پشاور زلمی کے حسین طلعت 39 رنز بناکر نمایاں رہے، جب کہ محمد حارث نے 17رنز بنائے۔ گلیڈی ایٹرز کی جانب سے فہیم اشرف نے 5، خرم شہزاد نے 2، جب کہ محمد عامر، وسیم جونئیر اور ابرار احمد نے ایک ایک کھلاڑی کو آؤٹ کیا۔
