پاکستان شملہ معاہدے سے پیچھے ہٹ گیا، ایل او سی اب دوبارہ سیز فائر لائن بن جائے گی، وزیر دفاع
وزیر دفاع خواجہ آصف کا کہنا ہے کہ پاکستان کی جانب سے شملہ معاہدہ اب ختم ہو چکا ہے اور لائن آف کنٹرول (ایل او سی) کو اب 1948 کی پوزیشن کے مطابق سیز فائر لائن تصور کیا جائے گا۔ نجی نشریاتی ادارے جیو نیوز سے گفتگو کرتے ہوئے خواجہ آصف کا کہنا تھا کہ شملہ معاہدہ دو طرفہ تھا جس میں نہ کوئی عالمی ادارہ شامل تھا اور نہ ہی کوئی تیسرا فریق۔ ان کے مطابق معاہدے کی تنسیخ کے بعد ایل او سی کا اصل اسٹیٹس یعنی سیز فائر لائن بحال ہو گیا ہے، جو 1948 میں اقوام متحدہ کی قراردادوں کے مطابق طے کیا گیا تھا۔ وفاقی وزیر نے مزید کہا کہ بھارت کی حالیہ یکطرفہ کارروائیوں نے شملہ معاہدے کی حیثیت کو عملا ختم کر دیا ہے۔ ان کے مطابق جب فریقین معاہدوں کا احترام نہ کریں تو ان کی قانونی و سفارتی اہمیت بھی باقی نہیں رہتی۔۔ مزید پڑھیں: وزیراعلیٰ سرفراز بگٹی کی پریس کانفرنس: ’بلوچستان میں کسی بڑے ملٹری آپریشن کی ضرورت نہیں خواجہ آصف کا کہنا تھا کہ پاکستان واضح طور پر اس پوزیشن پر واپس آ رہا ہے جو 1948 میں تھی، جب یہ تنازعہ سیز فائر لائن کے طور پر تسلیم کیا گیا تھا۔ ان کا مزید کہنا تھا کہ ہم نے پہلے بھی واضح کیا تھا کہ اگر یہی طرز عمل جاری رہا تو معاہدوں کی قدر و قیمت باقی نہیں رہے گی۔ سندھ طاس معاہدے کے حوالے سے بات کرتے ہوئے وزیر دفاع نے کہا کہ اس معاہدے سے کوئی بھی فریق یکطرفہ طور پر دستبردار نہیں ہو سکتا۔ ان کے مطابق سندھ طاس معاہدے سے متعلق تمام فیصلے باہمی اتفاق رائے سے ہی ممکن ہیں۔ انہوں نے انڈیا پر الزام عائد کیا کہ وہ کبھی 6 ہزار تو کبھی 25 ہزار کیوسک پانی چھوڑتا ہے، جو معاہدے کی روح کے خلاف ہے اور انڈٰیا اپنی مرضی سے پانی کے بہاؤ میں رکاوٹ نہیں ب سکتا۔
عیدالاضحیٰ پر گرمی کی شدت میں اضافے کا امکان، ملک بھر میں ہیٹ ویو کی وارننگ
محکمہ موسمیات نے عید الاضحی کے دوران ملک بھر میں شدید ہیٹ ویو کی پیش گوئی کر دی۔ محکمہ موسمیات کے مطابق سات جون سے ملک کے بیشتر حصوں میں شدید گرمی کی لہر شروع ہونے کا امکان ہے، جو 8 جون سے شدت اختیار کر سکتی ہے۔ ہیٹ ویو کا یہ سلسلہ 12 جون تک جاری رہنے کی توقع ہے۔ محکمہ موسمیات کا کہنا ہے کہ وسطی و بالائی پنجاب، اسلام آباد، خیبرپختونخوا، کشمیر اور گلگت بلتستان میں درجہ حرارت معمول سے 5 سے 7 ڈگری سینٹی گریڈ تک زیادہ رہ سکتا ہے۔ جنوبی پنجاب، سندھ اور بلوچستان کے بعض علاقوں میں درجہ حرارت معمول سے 4 سے 6 ڈگری زیادہ رہنے کا امکان ہے۔ پاکستان میں عید الاضحی کے دوران ہیٹ ویو کی وارننگ جاری pic.twitter.com/wI3Xvgx87d — Shahid Abbasi (@ShahidabbasiPk) June 5, 2025 ملک کے میدانی علاقوں میں شدید گرمی کے باعث گرد آلود ہواؤں اور تیز آندھیوں کا بھی خدشہ ہے۔ محکمہ موسمیات نے عوام کو ممکنہ اثرات سے آگاہ کرتے ہوئے احتیاطی تدابیر اختیار کرنے کی ہدایت کی ہے۔ ماہرین کا کہنا ہے کہ ہیٹ ویو سے بچوں، خواتین اور بزرگ افراد کو خاص طور پر خطرہ لاحق ہو سکتا ہے، شہری دھوپ میں غیر ضروری باہر نکلنے سے گریز کریں اور خود کو hydrated رکھیں۔ مزید یہ کہ مالی علاقوں میں بڑھتا درجہ حرارت برفباری کے پگھلاؤ میں اضافے کا باعث بن سکتا ہے، پانی کے استعمال میں احتیاط برتنے اور اسے ضائع ہونے سے بچانے کی ضرورت ہے۔ محکمہ موسمیات نے کاشتکاروں کو ہدایت کی ہے کہ وہ موسم کے مطابق اپنی زرعی سرگرمیوں کو ترتیب دیں۔ محکمہ موسمیات نے شہریوں کو ہدایت کی ہے کہ وہ موسم سے متعلق اپڈیٹس پر نظر رکھیں اور متعلقہ اداروں کی ہدایات پر عمل کریں۔
وزیراعلیٰ سرفراز بگٹی کی پریس کانفرنس: ’بلوچستان میں کسی بڑے ملٹری آپریشن کی ضرورت نہیں‘
وزیراعلیٰ سرفراز بگٹی کی پریس کانفرنس: ’بلوچستان میں کسی بڑے ملٹری آپریشن کی ضرورت نہیں‘ وزیراعلیٰ بلوچستان نے اسلام آباد میں پریس کانفرنس کی جہاں میڈیا کے نمائندوں کی بڑی تعداد موجود تھی، ان کا کہنا تھا کہ انڈیا شکست کے بعد اب پراکسیز کا سہارا لے رہا ہے۔ ان کا کہنا تھا کہ دشمن ہمارے خلاف پراکسی وار کررہا ہے، دشمن پاکستان کی ابھرتی معیشت کوتباہ کرنےکاخواب دیکھارہا تھا، بھارت کا شیطانی کھیل بےنقاب ہوگیا ہے،ریاست کے پاس فتنہ الہندوستان کےخلاف بہت مضبوط ثبوت ہیں ۔ انہوں نے کہا کہ فتنہ الہندوستان کے ذریعےخضدار میں بچوں کو شہید کرایا گیا، بھارتی خفیہ ایجنسی ’’را‘‘ فتنہ الہندوستان کی سرپرستی کررہی ہے، فتنہ الہندوستان کےدہشتگردوں کو بلوچوں سے نہ جوڑا جائے۔ وزیراعلیٰ بلوچستان سرفراز بگٹی کا کہنا ہے کہ بلوچستان میں کسی بڑے ملٹری آپریشن کی ضرورت نہیں ہم فتنہ الہندوستان کے ہر حملے کو ناکام بنائیں گے۔ وزیراعلیٰ بلوچستان کا کہنا تھا کہ بھارت کا شیطانی کھیل بےنقاب ہوگیا، فتنہ الہندوستان کو بھارتی ‘را’کی مکمل پشت پناہی حاصل ہے، ’را‘ہینڈلرز فتنہ الہندوستان کو خفیہ معلومات فراہم کررہےہیں، بلوچستان میں ہونےوالی دہشت گردی پہلے دن سے ’را‘ فنڈڈ ہے۔ سرفراز بگٹی نے کہا کہ بلوچستان میں کسی بڑے ملٹری آپریشن کی ضرورت نہیں،فتنہ الہندوستان کے ہر حملے کو ناکام بنائیں گے، بھارتی میڈیا نے کراچی پورٹ کےحوالےسےجعلی خبر چلائی کہ تباہ ہوگیا، فتنہ الہندوستان پاکستان کا امن داؤ پر لگانے کی سازش کررہا ہے، بھارت کو جنگ میں منہ کی کھانا پڑی، افواج پاکستان نے بھارتی جارحیت کا منہ توڑ جواب دیا۔ ان کا کہنا تھا کہ سیاسی جماعتوں کے ساتھ تو ڈائیلاگ ہوتے ہیں، مسنگ پرسنز کے معاملےکو ریاست کے خلاف پروپیگنڈا کے طور پر استعمال کیاجاتاہے، اس پولرائز ماحول میں کسی ایشو پر سیاسی جماعتوں کا متفق ہونا ناممکن ہے۔
امام کعبہ کا خطبہ حج: ’فلسطین کے دشمن بچوں کے قاتل ہیں، اے اللہ، ان قاتلوں کو تباہ کر دے‘
عازمین حج مسجد نمرہ میں اکٹھے ہوئے جہاں ظہر و عصر کی نمازیں اکٹھی ادا کی گئیں۔ مسجد الحرام کے امام، شیخ صالح بن عبداللہ نے حج کا خطبہ دیا ۔جس کا 35 زبانوں میں ترجمہ نشرکیا گیا۔ مسجدالحرام کے امام شیخ ڈاکٹرصالح بن عبد اللہ نے خطبہ حج دیتے ہوئے کہا کہ اللہ تعالیٰ نے فرمایا شیطان تمھارا کھلا دشمن ہے اس سے دور رہو، اللہ نے نیکی کرنے اور برائی سے دور کا حکم دیا۔ انہوں نے فرمایا کہ تقویٰ اختیار کرنا ایمان والوں کی شان ہے، تقویٰ دنیا و آخرت کی بھلائی کا سبب ہے، حیا ایمان کی شاخ ہے، والدین سے ہمیشہ صلہ رحمی سے پیش آؤ اور کثرت سے گناہوں کی معافی مانگو، اللہ نے جنب کی طلب کرو اور جہنم سے نجات طلب کرو۔ رسول اکرم ﷺ نے فرمایا اے ایمان والو اللہ کی عبادت ایسے کرو کہ جیسے تم اللہ کو دیکھ رہے ہو، یا پھر اللہ کی عبادت اس طرح سے کرو کہ جیسے اللہ تمھیں دیکھ رہا ہے۔ انہوں نے کہا کہ شیطان تمھارا کھلا دشمن ہے اس سے دور رہو، اللہ نے نیکی کرنے اور برائی سے دور کا حکم دیا، دشمن کو معاف کرنا بھی نیکی ہے، نیکیاں برائیوں کو مٹا دیتی ہیں لہذا نیکیوں کی زیادہ سے زیادہ کوشش کرنی چاہیے، نماز قائم کرو، یہ اللہ اور بندے کے درمیان ایک بہترین رابطہ اور سب سے زیادہ درمیان کی نماز کی حفاظت کرو۔ مزید پڑھیں: اے ایمان والو! اللہ سے ڈرو اور تقویٰ اختیار کریں، خطبہ حج ان کا کہنا تھا انسان کو باطنی امراض سے بچنا چاہیے کیونکہ باطنی امراض کی وجہ سے انسان اللہ کا تقرب حاصل نہیں کر پاتا، رمضان کے روزے تم پر فرض کیے گئے جیسے تم سے پچھلی امتوں پر فرض کیے گئے، روزے انسان کو باطنی امراض سے پاک کر دیتے ہیں۔ اے ایمان والو عہد اور وعدے کو پورا کرو، جب بھی بات کرو اچھی بات کرو، اللہ صبر کرنے والوں کو پورا ثواب عطا کرتا ہے، اللہ کا شکر گزار بندوں سے وعدہ ہے کہ جتنا شکر کریں گے انہیں زیادہ تعمتوں سے نواز دیگا۔ مسجد الحرام کے امام شیخ ڈاکٹر صالح بن عبد اللّٰہ نے خطبہ حج میں دعا کی کہ اے اللہ فلسطین کے بھائیوں کی مدد فرما، ان کے شہدا کو معاف فرما، زخمیوں کو شفا دے اور ان کے دشمنوں کو تباہ و برباد کر دے، فلسطین کے دشمن بچوں کے قاتل ہیں، ان قاتلوں کو تباہ کر دے۔
ٹک ٹاکر ثنا یوسف کے مبینہ قاتل کا 14 روزہ ریمانڈ منظور، جیل منتقل: مقتولہ کے والد نے کیا دیکھا؟
اسلام آباد کی پانچ لاکھ فالوورز رکھنے والی 17 سالہ ٹک ٹاکر ثناء یوسف کو دو جون کی شام گھر پر قتل کردیا گیا تھا، اسلام آباد پولیس نے ملزم کو فیصل آباد سے گرفتار کیا۔ جمعرات کے روز ملزم عمرحیات کو عدالت پیش کیا گیا، عدالت نے 14 روزہ ریمانڈ منظور کرتے ہوئے ملزم کو جیل بھیج دیا ۔ چترال میں موجود مقتولہ کے والد سید یوسف حسن نے برطانوی نشریاتی ادارے ’بی بی سی‘ کو بتایا کہ قتل سے کچھ دیر قبل ثناء نے والدہ کو یہ کہہ کر مارکیٹ بھیجا تھا کہ عید آ رہی ہے کپڑے دھونے ہیں، آپ مارکیٹ جاکر سرف لادیں جس کے بعد قاتل نے اسی موقع سے فائدہ اٹھایا اور گھر کے اندر گھس کر ثناء کو گولیاں مار کر چلاگیا۔ سید یوسف حسن نے واقعے کی عینی شاہد اور ثناء کی پھوپھو جو قتل کے وقت گھر میں موجود تھیں ان کا حوالہ دیتے ہوئے بتایا کہ قاتل گھر میں کیسے داخل ہوا اس حوالے سے کچھ نہیں معلوم لیکن اس وقت ان کے گھر میں کوئی مرد موجود نہیں تھا ۔ ثناء کے والد نے بتایا کہ گھر میں گھستے ہی یہ لڑکا ثناء کے کمرے میں داخل ہوگیا، قتل کے وقت میری چھوٹی بہن بھی گھر پر موجود تھیں، فائرنگ کی آواز سے اسے محسوس ہوا جیسے کوئی غبارہ پھٹا ہو۔ اس آواز کو سنتے ہی بہن ثناء کے کمرے کی طرف بھاگی تو اس لڑکے کو ثناء کے کمرے سے نکلتے دیکھا جب میری بہن نے اسے روکنے کی کوشش کی تو اس لڑکے نے میری بہن پر بھی پستول تان لی لیکن جب پستول نہیں چلی تو لڑکا وہاں سے بھاگ نکلا ۔ سید یوسف حسن نے مزید بتایا کہ میری بہن بھی اس لڑکے کو ڈاکو سمجھ کر اس کے پیچھے بھاگی، اس وقت تک وہ نہیں جانتی تھی کہ ثناء کوگولیاں لگ چکی ہیں ،اس لڑکے کے بھاگ جانے کے بعد میری بہن کو گھر جاکر پتا چلاکہ ثنا کو گولیاں لگی ہیں جس کے بعد اسے اسپتال پہنچایا گیا۔ میں اس دن گھر پر موجود نہیں تھا لیکن گھر کے نزدیک ہی ایک دوست کے پاس بیٹھا تھا جب دوست کو کال آئی اور اس نے مجھے بتایا کہ ایک ایمرجنسی ہو گئی ہے جس کے بعد میری اہلیہ نے بھی مجھے کال کرکے ساری صورتحال بتائی۔میں بھی اسپتال پہنچا تو پتا چلا کہ ثناء انتقال کرگئی ہے۔
اسلام آباد کے تھانے میں قیدیوں کو “آئس اور ہیروئن فراہمی” کا دعویٰ
پاکستان کے وفاقی دارالحکومت اسلام آباد کے ایک پولیس اسٹیشن میں قیدیوں کو آئس اور ہیروئن کی فراہمی اور نشہ کیے جانے کا دعوی سامنے آیا ہے۔ سابق سینیٹر مشتاق احمد خان کے سوشل میڈیا اکاؤنٹ پر پوسٹ میں دعویٰ کیا گیا ہے کہ جب انہیں غزہ کے معاملے پر احتجاج سے روک کر گرفتار کیا گیا تو اسلام آباد پولیس نے انہیں ریڈ زون سے متصل واقع ایف سکس کے کہسار پولیس اسٹیشن منتقل کیا۔ فیس بک پوسٹ میں مزید کہا گیا ہے کہ تھانہ کہسار کے “حوالات میں قیدی آئس اور ہیروئن کا نشہ کرتے رہے.”سینیٹر مشتاق احمد خان کی سوشل میڈیا پوسٹ کے مطابق انہوں نے پولیس سے “قرآن مانگا جو دینے سے انکار کر دیا گیا۔”سوشل میڈیا پوسٹ میں پیج ایڈمن نے لکھا ہے کہ “اسلام آباد کے اہم ترین تھانے کی حوالات میں آئس، ہیروئن ودیگر منشیات کی فراہمی و استعمال اور اس کے برعکس اسلامی ریاست میں قرآن مجید کا نہ دیا جانا حکومت اور ریاست سے سوال ہے۔”مزکورہ پوسٹ میں وزیر داخلہ محسن نقوی اور آئی جی اسلام آباد کو مخاطب کے کے کہا گیا کہ کیا وہ “اس کا جواب دیں گے.”تھانے کے حوالات میں موجود قیدیوں کو منشیات کی فراہمی اور نشہ کرنے دینے کے سنگین معاملے پر تاحال اسلام آباد پولیس کی جانب سے کوئی وضاحت نہیں کی گئی ہے۔
تعلیم کے شعبہ کو بھی عرفات کے میدان کی طرح مساوی بنانا ہوگا، رانا سکندر حیات
وزیر تعلیم پنجاب رانا سکندر حیات کا کہنا ہے کہ یوم عرفہ ہمیں مساوات سکھاتا ہے، تعلیمی نظام میں بھی اس کا عکس لائیں گے، تعلیم کے شعبہ کو بھی عرفات کے میدان کی طرح مساوی بنانا ہوگا۔ وزیر تعلیم پنجاب رانا سکندر حیات نے جاری کردہ اپنے ویڈیو پیغام میں اہل اسلام کو حج کی مبارکباد دیتے ہوئے کہا ہے کہ یومِ عرفہ ہمیں اتحاد، مساوات اور یکجہتی کا درس دیتا ہے۔ میدانِ عرفات میں لاکھوں فرزندانِ اسلام ایک لباس میں، ایک صف میں اور ایک مقصد کے تحت جمع ہو کر یہ پیغام دیتے ہیں کہ انسانیت میں کسی قسم کی تفریق نہیں۔ انہوں نے کہا کہ یہی پیغام ہمیں اپنے وطن، بالخصوص تعلیمی شعبے میں اپناتے ہوئے یہ عہد کرنا ہوگا کہ تعلیمی نظام سے ہر طرح کی تفریق اور عدم مساوات کا خاتمہ کریں گے اور اس بات کو یقینی بنائیں گے کہ ہر بچہ، بلا امتیاز اور بلا تفریق، یکساں تعلیمی مواقع حاصل کرے، ترقی کرے، اور کوئی بھی بچہ تعلیم سے محروم نہ رہ جائے۔ وزیر تعلیم نے تمام مکاتب فکر اور سماجی طبقات سے اپیل کی کہ وہ تعلیم کے فروغ کے مشن کو قومی عبادت سمجھ کر اپنائیں، تاکہ ایک مساوی، باشعور، متحد اور پرامن معاشرے کی بنیاد رکھی جا سکے۔
پاک افغان تعلقات: بہتری یا عارضی سکون؟
‘پاکستان میٹرز’ کو دیے گئے خصوصی انٹرویو میں افغان امور کے ماہر محمود جان بابر نے پاکستان اور افغانستان کے درمیان بدلتے ہوئے تعلقات کا تفصیل سے جائزہ لیا۔ انہوں نے اس بات پر روشنی ڈالی کہ حالیہ بہتری کتنے عرصے تک قائم رہ سکتی ہے اور کن ممکنہ نکات پر دوبارہ کشیدگی جنم لے سکتی ہے۔ انہوں نے یہ بھی واضح کیا کہ چین کی علاقائی دلچسپی اور اثر و رسوخ تیزی سے بڑھ رہا ہے جو نہ صرف علاقائی استحکام بلکہ معاشی تعاون کی نئی راہیں بھی کھول سکتا ہے۔ اس گفتگو میں سرحدی سیکیورٹی، سفارتی نازک مزاجی اور جنوبی ایشیا میں بدلتے ہوئے جیو پولیٹیکل چیلنجز کو بھرپور انداز میں بیان کیا گیا ہے۔ مزید تفصیلات جاننے کے لیے ویڈیو ملاخطہ کریں۔
موسمیاتی تبدیلی پر بچوں کی پکار، ماں بولی میں ایک مؤثر پیغام
پاکستان میں شدید موسم، طوفانی بارشوں اور گلوبل وارمنگ کے خطرات بڑھتے جا رہے ہیں۔ ایسے میں پاکستانی بچوں نے ماں بولی میں ایک دل کو چھو لینے والا پیغام دیا ہے جو نہ صرف جذباتی ہے بلکہ ایک قومی بیداری کی کوشش بھی ہے۔ یہ ویڈیو بچوں کی آواز میں ایک واضح مطالبہ ہے کہ ماحولیاتی تبدیلی کے خلاف فوری اور سنجیدہ اقدامات کیے جائیں۔ ساتھ ہی ساتھ، یہ پیغام زبان و ثقافت کے تحفظ کی اہمیت بھی اجاگر کرتا ہے کیونکہ اپنی مادری زبان میں بات کرنا نہ صرف شناخت کا اظہار ہے بلکہ عوامی گفتگو میں اثر انگیزی کا ذریعہ بھی ہے۔ یہ صرف ایک جذباتی اپیل نہیں، بلکہ پوری قوم کے لیے ایک وارننگ ہے۔ تو ماحول کے بچاؤ کے لیے زیادہ سے زیادہ درخت لگائیں تا کہ ہماری آنے والی نسلوں کو قدرتی آفات کا سامنا نہ کرنا پڑے۔
پنجاب کی سب سے بڑی مویشی منڈی میں ناقص سہولیات، بیوپاری سراپہ احتجاج
پنجاب بھر کی مویشی منڈیوں میں جانور لے کر آئے نیوپاری شدید غصے میں ہیں۔ ان کا کہنا ہے کہ مویشی منڈی کی فیس تو بڑھا دی گئی ہیں مگر بنیادی سہولیات بدستور بدترین حالت میں ہیں۔ بیشتر مویشی منڈیوں میں نہ بجلی ہے، نہ صفائی، نہ جانوروں کی پلانے کے لیے پانی ہے اور نہ ہی کوئی نظم و ضبط ہے۔ بیوپاریوں نے شکایت کی ہے کہ وہ ہر بار بھاری فیس ادا کرتے ہیں لیکن جواب میں انہیں صرف گندگی، اندھیرا اور بدنظمی ملتی ہے۔ کئی مقامات پر بیوپاریوں نے منڈی انتظامیہ کو کھلے عام کوسا اور فوری اصلاحات کا مطالبہ کیا۔ یہ صورتحال اس واضح تضاد کی نشاندہی کرتی ہے جو حکومتی ریونیو کلیکشن اور عوامی سہولیات کی فراہمی کے درمیان موجود ہے۔ پنجاب کی سب سے بڑی مویشی منڈی میں کون کون سے مسائل جاننے کے لیے ویڈیو ملاخطہ کریں۔
