سخت گرمی کے بعد موسلادھار بارش، این ڈی ایم اے نے الرٹ جاری کر دیا
نیشنل ڈیزاسٹر مینجمنٹ اتھارٹی (این ڈی ایم اے) نے 13 سے 18 جون کے دوران ملک کے بعض حصوں میں ابر آلود موسم، آندھی اور بعض علاقوں میں شدید گرمی کی پیش گوئی کی ہے۔ این ڈی ایم اے کے نیشنل ایمرجنسی آپریشن سینٹر (این ای او سی) کی طرف سے جاری کردہ ایڈوائزری میں عوام سے محتاط رہنے اور احتیاطی تدابیر اختیار کرنے کی اپیل کی گئی ہے، خاص طور پر پنجاب، خیبرپختونخوا (کے پی)، سندھ، بلوچستان، گلگت بلتستان (جی بی) اور کشمیر (13 جون) سے آزاد کشمیر میں جاری شدید گرمی کے حالات میں عوام کو احتیاط کرنے کی تلقین کی گئی ہے۔ 13 جون سے ملک کے بالائی علاقوں میں موسمی تبدیلی آنے کی توقع ظاہر کی جا رہی ہے جس سے کئی صوبوں میں موسم متاثر ہو سکتا ہے۔ اسلام آباد، راولپنڈی، خطہ پوٹھوہار اور بالائی پنجاب میں ابرآلود اور الگ تھلگ بارش ہو سکتی ہے، ملک کے بیشتر حصوں کو شدید گرمی کا سامنا رہے گا۔ پنجاب میں موسم گرم اور خشک رہنے کا امکان ہے۔ اسی طرح سندھ اور بلوچستان میں زیادہ تر خشک اور سرد رہنے کی پیش گوئی کی گئی ہے۔ یہ بھی پڑھیں:پاکستان شدید گرمی کی لپیٹ میں، درجہ حرارت 49 ڈگری سے تجاوز کر گیا کے پی میں زیادہ تر گرم موسم کی توقع ہے۔ تاہم چترال، دیر، ہری پور، کوہاٹ، مانسہرہ، ایبٹ آباد، پشاور، سوات اور ملحقہ علاقوں سمیت کئی اضلاع میں کہیں کہیں تیز ہواؤں اور گرج چمک کے ساتھ بارش کی پیش گوئی کی گئی ہے۔ مزید پڑھیں:محکمہ موسمیات کی وارننگ: ’ملک بھر میں شدید گرمی کی لہر برقرار، شہری احتیاط برتیں‘ گلگت بلستان اور آزاد کشمیر میں، 13-16 جون کے دوران استور، سکردو، ہنزہ، شغر، باغ اور وادی نیلم جیسے علاقوں میں الگ تھلگ بارشیں متوقع ہیں، جبکہ باقی علاقوں میں گرم اور خشک رہنے کا امکان ہے۔ این ڈی ایم اے صوبائی اور ضلعی حکام کے ساتھ فعال طور پر ہم آہنگی کر رہا ہے تاکہ کسی بھی ہنگامی صورتحال سے بچا جا سکے
انڈیا: طیارہ حادثے میں ہلاک افراد کے لواحقین کو کتنا معاوضہ ملے گا؟
انڈیا کے شہر احمد آباد میں پیش آنے والے افسوسناک طیارہ حادثے میں 241 افراد جان کی بازی ہار گئے، جس کے بعد طیارہ کمپنی نے ہلاک شدگان کے لواحقین کو ایک، ایک کروڑ روپے معاوضہ دینے کا اعلان کیا ہے۔ انڈین ریاست گجرات کے شہر احمد آباد میں لندن جانے والا مسافر طیارہ گر کر تباہ ہو ا، یہ طیارہ ڈاکٹروں کے ہاسٹل کی عمارت پر گرا، جس میں مسافر طیارے میں 230 مسافر اور عملے کے 12 ارکان سوار تھے۔ خبر رساں ادارے رائٹرز کے مطابق حادثے کا شکار ہونے والے بوئنگ 787 ڈریم لائنر طیارے، فلائٹ نمبر AI-117، میں 169 بھارتی، 53 برطانوی، ایک کینیڈین اور 7 پرتگالی مسافر سوار تھے، جن میں 11 بچے بھی شامل تھے۔ یہ بھی پڑھیں:انڈیا میں طیاروں کے حالیہ حادثات: تکنیکی مسائل یا ایوی ایشن حکام کی نااہلی؟ انڈین میڈیا کے مطابق جس ہاسٹل پر طیارہ گرا، وہاں موجود کم از کم 5 ڈاکٹر جاں بحق ہو گئے، جب کہ 45 سے زائد زخمی ہیں، جنہیں مختلف اسپتالوں میں طبی امداد فراہم کی جا رہی ہے۔ فلائٹ ریڈار کے ڈیٹا کے مطابق طیارہ اس وقت حیدرآباد ایئرپورٹ کے قریب ٹیکسی کر رہا تھا، جب وہ اچانک ریڈار سے غائب ہو گیا۔ مزید پڑھیں: ایئر انڈیا طیارہ حادثہ: نامور شخصیات سمیت 200 سے زائد سوار افراد ہلاک، ہاسٹل پر گرنے سے متعدد ڈاکٹر جاں بحق، امدادی کارروائیاں جاری طیارہ کمپنی کی جانب سے متاثرہ خاندانوں کے ساتھ ہمدردی کا اظہار کرتے ہوئے مکمل تعاون اور امداد کی یقین دہانی کرائی گئی ہے، جب کہ حکومت کی جانب سے بھی حادثے کے تمام پہلوؤں کا جائزہ لینے کے لیے اعلیٰ سطح کی انکوائری کا آغاز کر دیا گیا ہے۔
عاصم اظہر نے میرب سے تعلقات ختم کرنے کی تصدیق کر دی
معروف پاکستانی گلوکار عاصم اظہر نے باضابطہ طور پر اعلان کیا ہے کہ اداکارہ میرب علی کے ساتھ ان کی منگنی ختم ہو گئی ہے۔ ویڈیو اینڈ شیئرنگ پلیٹ فارم انسٹاگرام پر عاصم اظہر نے اپنی اسٹوری میں لکھا کہ ہم نے باہمی طور پر علیحدگی کا فیصلہ کیا ہے۔ عاصم اظہر نے کہا کہ وہ ایک ساتھ خوبصورت لمحات اور مستقبل کی امیدیں شیئر کر چکے تھے، تاہم زندگی نے ایک مختلف موڑ لیا۔ انہوں نے بتایا کہ یہ فیصلہ سوچ سمجھ کر اور باہمی احترام کے ساتھ کیا گیا، جس میں دونوں خاندان شامل تھے۔ عاصم اظہر نے مداحوں اور عوام سے درخواست کی ہے کہ وہ ان کی پرائیویسی کا احترام کریں اور اس معاملے میں قیاس آرائیوں سے گریز کریں۔ انہوں نے ان تمام مداحوں کا شکریہ ادا کیا جنہوں نے بطور جوڑے ان کی حمایت کی اور مسلسل محبت کا اظہار کیا۔ مزید پڑھیں : وزیراعظم پاکستان عرب امارات پہنچ گئے، دورے کا مقصد کیا ہے؟ اس اعلان کے بعد سوشل میڈیا پر ہلچل مچ گئی، جہاں بہت سے مداحوں نے مایوسی اور ہمدردی کا اظہار کیا، جب کہ کچھ نے بریک اپ کی وجوہات کے بارے میں سوالات اٹھائے۔ واضح رہے کہ اس سے قبل عاصم اظہر کا نام اداکارہ ہانیہ عامر کے ساتھ بھی جوڑا جاتا رہا تھااور ان کے بریک اپ کی خبریں بھی خاصی توجہ حاصل کر چکی ہیں۔
برطانیہ: یورکشائر میں اسٹرابیری مون کا دلکش نظارہ، اسٹرابیری مون کیا ہے؟
برطانیہ کے شہر یورکشائر میں شہریوں نے بدھ کی رات ایک دلکش فل مون، جسے’اسٹرابیری مون’ کہا جاتا ہے، کا شاندار نظارہ کیا، یہ خوبصورت منظر تقریباً دو دہائیوں بعد اپنی سب سے واضح اور دلکش شکل میں نمودار ہوا، جس نے نہ صرف یورکشائر بلکہ پورے برطانیہ کے آسمان کو روشن کر دیا۔ شہریوں نے اس نایاب اور دل موہ لینے والے منظر کو اپنے کیمروں میں محفوظ کیا اور سوشل میڈیا پر اس کی تصاویر اور ویڈیوز شیئر کیں۔ منگل کی رات چاند افق کے قریب انتہائی نیچے دکھائی دیا، جس کے باعث وہ معمول سے بڑا محسوس ہوا، جبکہ بدھ کے روز جب یہ چاند ایک اہم قمری زاویے، جسے ‘لونا اسٹینڈاسٹل’ کہا جاتا ہے، کے قریب پہنچا تو اس نے نارنجی اور سرخ رنگ کی خوبصورت جھلک اختیار کر لی۔ مزید پڑھیں:برطانیہ 2034 تک دفاعی اخراجات کو جی ڈی پی کے تین فیصد تک پہنچا دے گا، برطانوی وزیر دفاع جون کے مہینے کے فل مون کو ‘اسٹرابیری مون’ کا نام امریکی مقامی قبائل کی اس روایت سے ملا ہے جو اسے موسم گرما کے آغاز اور اسٹرابیری کی فصل کی کٹائی سے منسلک کرتے ہیں۔ ماہرین فلکیات کے مطابق چاند کا افق کے اس قدر قریب اور نیچے نظر آنا ایک نایاب مظہر ہے، جسے دوبارہ دیکھنے کے لیے لوگوں کو اب مزید 18 سال انتظار کرنا پڑے گا۔
انڈیا میں طیاروں کے حالیہ حادثات: تکنیکی مسائل یا ایوی ایشن حکام کی نااہلی؟
انڈیا جو کہ دنیا کی تیزی سے ابھرتی ہوئی ایوی ایشن مارکیٹوں میں سے ایک ہے، پچھلے کچھ سالوں سے طیاروں کے حادثات اور تکنیکی خرابیوں کے باعث عالمی سطح پرزیرِ بحث رہا ہے، مگر آج انڈین ریاست گجرات کے شہر حیدرآباد میں ہونے والے حادثے نے اس بحث کو ہوا دی ہے اور ماہرین و مسافروں کو یہ سوچنے پر مجبور کردیا ہے کہ آخر وہ کونسی وجہ ہے، جس کی وجہ سے آئے روز حادثے رونما ہورہے ہیں۔ انڈیا میں گزشتہ کئی سالوں میں ہونے والے حادثات کو مندرجہ ذیل میں بیان کیا گیا ہے: ائیر انڈیا ایکسپریس IX-442 (مئی 2025):- انڈین خبررساں ادارے ‘دی ہندو نے پانچ مئی 2025 کو لکھا کہ دبئی سے کوچی جانے والی پرواز کے انجن میں آگ بھڑک اٹھی، جس کے بعد طیارے نے ہنگامی لینڈنگ کی۔ خوش قسمتی سے کوئی جانی نقصان نہیں ہوا۔ انڈیگو کی دہلی-پٹنہ پرواز (جون 2025):- انڈین خبررساں ادارے ‘ٹائمز آف انڈیا’ کی سات جون 2025 کی رپورٹ کے مطابق فضا میں اچانک انجن میں کمپریسر اسٹیج میں خرابی کے باعث طیارے نے ہچکولے کھائے۔ پائلٹ کی حاضر دماغی سے طیارہ بحفاظت اتارا گیا۔ وِسٹارا کی پروازممبئی-گوہاٹی (اپریل 2025):’- ‘ہندوستان ٹائمز’ نے 28 اپریل 2025 کو رپورٹ کیا کہ وسٹارا کی ممبئی سے گوہاٹی جانے والی پرواز کو لینڈنگ کے دوران ہائیڈرولک سسٹم میں خرابی کے باعث رن وے سے معمولی انحراف ہوا، جس سے مسافروں میں خوف و ہراس پھیل گیا۔ اگر غور کریں تو پتہ چلتا ہے کہ گزشتہ چند سالوں میں اس طرح کے کئی حادثات ہوچکے ہیں۔ مزید پڑھیں: ایئر انڈیا طیارہ حادثہ: نامور شخصیات سمیت 200 سے زائد سوار افراد ہلاک، ہاسٹل پر گرنے سے متعدد ڈاکٹر جاں بحق، امدادی کارروائیاں جاری گو فرسٹ کی پرواز (مئی 2023):- انڈین خبررساں ادارے این ڈی ٹی وی کے مطابق گوفرسٹ کی ممبئی سے لے کر دہلی جانے والی پرواز کے انجن میں آگ لگنے کے باعث ہنگامی لینڈنگ کی گئی۔ نیپال میں انڈین شہریوں کی ہلاکت (جنوری 2023):- عالمی نشریاتی ادارے نے 15 جنوری 2023 کو نیپال میں ہونے والے حادثے کو رپورٹ کیا، جس میں متاثرین کی بڑی تعداد کا تعلق انڈیا سے تھا، جس سے انڈیا میں ہوابازی کے حفاظتی ضوابط پر بحث چھڑ گئی۔ ایم آئی-17 ہیلی کاپٹر کریش (دسمبر 2021): انڈین خبررساں ادارے ‘دی انڈین ایکسپریس’ کے مطابق دسمبر 2021 میں ایم آئی-17 ہیلی کاپٹر کریش ہوا، جس میں ایئر فورس کے ہیلی کاپٹر کے حادثے میں چیف آف ڈیفنس اسٹاف جنرل بپن راوت سمیت 13 افراد جاں بحق ہو گئے۔ دی ہندو کے مطابق ایوی ایشن تجزیہ کار پروفیسر راہول ورما نے کہا کہ مسلسل حادثات ظاہر کرتے ہیں کہ بنیادی تربیت، جہازوں کی مینٹیننس اور ریگولیٹری نگرانی میں اب بھی نمایاں خامیاں موجود ہیں۔” ایوی ایشن سیفٹی ماہر انورادھا مشرا کے مطابق انڈیا کی ایوی ایشن انڈسٹری بہت تیزی سے پھیل رہی ہے لیکن سیفٹی پروٹوکولز اور پائلٹ ٹریننگ کے معیارات عالمی سطح پر ابھی بھی تسلی بخش نہیں سمجھے جا رہے۔ یہ بھی پڑھیں: انڈیا نے پانی بند کرنے کی کوشش کی تو یہ جنگ کے مترادف ہوگا، بلاول بھٹو انڈین ایوی ایشن ریگولیٹر DGCA کا کہنا ہے کہ ہم نے تمام ایئر لائنز کے لیے خصوصی سیفٹی آڈٹ اور انسپیکشن شروع کر دیے ہیں تاکہ ایسے واقعات کی تکرار کو روکا جا سکے۔ واضح رہے کہ سال 2023 میں انٹرنیشنل ایوی ایشن سیفٹی اسیسمنٹ (IASA) میں انڈیا کی ریٹنگ میں معمولی کمی دیکھی گئی، جس کی ایک وجہ حفاظتی ضوابط پر عملدرآمد کی کمزوریاں بتائی گئی ہیں۔
بجٹ کے بعد چھوٹی گاڑیاں مہنگی، آلٹو کی نٸی قیمت کیا ہے؟
وفاقی حکومت نے 850 سی سی تک کی گاڑیوں پر جنرل سیلز ٹیکس (جی ایس ٹی) کو 12.5 فیصد سے بڑھا کر 18 فیصد کرنے کی تجویز دے دی، جس سے پاکستان میں اسمبل شدہ نئی گاڑی سوزوکی آلٹو کی قیمت میں 186446 روپے کا اضافہ متوقع ہے۔ حکومت نے اندرونی دہن انجن سے لیس گاڑیوں پر 1 فیصد گرین ٹیکس بھی متعارف کرایا ہے، جو کہ ایک ماحولیاتی جرمانہ ہے اور فضائی آلودگی میں اضافے کا باعث بننے والی گاڑیوں پر لاگو کیا جائے گا۔ واضح رہے کہ اگر یہ مجوزہ بل منظور ہو جاتا ہے تو سوزوکی آلٹو کی قیمت میں نمایاں اضافہ دیکھنے میں آئے گا۔ ماہرین کے مطابق صارفین کو قیمت میں روپے 163,230 سے لے کر روپے 190,000 تک کے اضافے کا سامنا کرنا پڑ سکتا ہے، جو کہ مخصوص ماڈل پر منحصر ہوگا۔ اس اضافے میں جی ایس ٹی کی نئی شرح اور 1 فیصد گرین ٹیکس شامل ہوگا۔ اس کے علاوہ حکومت نے ایندھن کی کھپت پر روپے 2.5 فی لیٹر کاربن ٹیکس بھی نافذ کرنے کی تجویز دی ہے۔ اس ٹیکس کا مقصد اندرونی کمبشن انجن والی گاڑیوں کے استعمال کی حوصلہ شکنی کرنا ہے تاکہ عوام کو ہائبرڈ الیکٹرک گاڑیوں اور مکمل الیکٹرک گاڑیوں کی طرف راغب کیا جا سکے۔ حکومت کا کہنا ہے کہ یہ اقدامات ملک میں فضائی آلودگی اور کاربن فوٹ پرنٹ کو کم کرنے کے لیے کیے جا رہے ہیں۔ مزید پڑھیں:ایپل کا آپریٹنگ سسٹمز میں بڑے پیمانے پر تبدیلیوں کا اعلان یہ گرین ٹیکس گاڑی کی قیمت کے فیصد کے طور پر لاگو ہوگا، جو انجن کے سائز اور گاڑی کی مقامی یا درآمدی نوعیت پر منحصر ہوگا، 1300سی سی سے کم انجن والی گاڑیوں پر 1 فیصد، 1300سی سی سے 1800سی سی تک کی گاڑیوں پر 2 فیصد اور 1800سی سی سے بڑی گاڑیوں پر 3 فیصد ٹیکس عائد ہوگا، جب کہ کمرشل گاڑیاں جیسے بسیں اور ٹرک بھی اس ٹیکس کے دائرہ کار میں آئیں گی۔
واٹس ایپ میں نامکمل میسجز تلاش کرنے کے لیے نیا ڈرافٹس فلٹر فیچر متعارف
واٹس ایپ اپنے نئے بیٹا ورژن میں ایک ایسا فیچر لا رہا ہے جو صارفین کو نامکمل بھیجے گئے میسجز کو آسانی سے تلاش کرنے کی سہولت دے گا۔ یہ فیچر خاص طور پر ان لوگوں کے لیے مفید ثابت ہوگا جو میسج ٹائپ کرتے ہوئے مشغول ہو جاتے ہیں یا سینڈ کرنا بھول جاتے ہیں واٹس ایپ بیٹا انفو کی رپورٹ کے مطابق اس فیچر کا مقصد صارفین کو ایک آسان اور مؤثر طریقہ فراہم کرنا ہے تاکہ وہ اپنے نامکمل میسجز کو تلاش کرکے بھیج سکیں۔ بیان میں بتایا گیا کہ یہ فیچر اس وقت بہت زیادہ مددگار ثابت ہوگا جب صارف کسی وجہ سے میسج ٹائپ کرتے ہوئے کسی اور کام میں مصروف ہو جائے یا وہ سینڈ بٹن کلک کرنا بھول جائے۔ یہ فیچر اینڈرائیڈ ڈیوائسز کے لیے واٹس ایپ کے نئے بیٹا ورژن میں متعارف کرایا جا رہا ہے۔ اس فیچر کے تحت واٹس ایپ میں ایک مخصوص چیٹ فلٹر متعارف کرایا جائے گا جس میں وہ تمام میسجز موجود ہوں گے جو چیٹس میں ڈرافٹ ہوں گے۔ ابھی ان ڈرافٹ میسجز کو تلاش کرنے کے لیے صارفین کو پوری چیٹ لسٹ میں اسکرول کرنا پڑتا ہے جس میں کافی وقت ضائع ہوتا ہے، خاص طور پر ان افراد کو مشکل کا سامنا ہوتا ہے جن کے واٹس ایپ اکاؤنٹ میں چیٹس کی تعداد بہت زیادہ ہوتی ہے۔ یہ بھی پڑھیں:ایپل کا آپریٹنگ سسٹمز میں بڑے پیمانے پر تبدیلیوں کا اعلان یہ ڈرافٹس فلٹر واٹس ایپ کے دیگر فلٹرز جیسے ان ریڈ،گروپس، آل اور دیگر کے ساتھ موجود ہوگا۔ رپورٹ کے مطابق یہ ڈرافٹ فلٹر پری سیٹ آپشن ہوگا یعنی صارف خود اسے سیٹ نہیں کرسکیں گے بلکہ ایسا کمپنی کی جانب سے کیا جائے گا اور تمام ڈرافٹ میسجز خودکار طور پر اس میں شو ہوں گے۔ البتہ صارف اس ڈرافٹ فلٹر کو کسی بھی ڈس ایبل ضرور کرسکے گا۔ مزید پڑھیں:واٹس ایپ کا نیا فیچر: صارفین اب اے آئی چیٹ بوٹس خود تخلیق کر سکیں گے اس فیچر کی آزمائش ابھی بیٹا ورژن میں کی جا رہی ہے تو اسے کب تک تمام صارفین کے لیے متعارف کرایا جائے گا، یہ کہنا ابھی مشکل ہے۔
اڈیالہ جیل: کم عمر قیدی سے اجتماعی زیادتی و قتل، چار مجرمان کو دو دو بار سزائے موت کا حکم
راولپنڈی کی ایڈیشنل ڈسٹرکٹ اینڈ سیشن جج افشاں اعجاز صوفی نے اڈیالہ جیل میں کم عمر قیدی سے اجتماعی زیادتی اور بہیمانہ قتل کیس کا فیصلہ سناتے ہوئے چار قیدیوں کو دو دو بار سزائے موت اور پانچ، پانچ لاکھ روپے جرمانے کی سزا سنا دی۔ نجی نشریاتی ادارے ایکسپریس نیوز کے مطابق پولیس نے کہا ہے کہ نقاش، وقاص، بلال اور آصف نامی مجرمان نے جیل میں موجود ایک کم عمر قیدی کو جنسی زیادتی کا نشانہ بنایا، جس کے بعد اسے کپڑوں سے گلا گھونٹ کر بے دردی سے قتل کر دیا۔ واضح رہے کہ یہ افسوسناک واقعہ جنوری 2024 میں پیش آیا، جس کا مقدمہ سپرنٹنڈنٹ جیل اڈیالہ کی مدعیت میں تھانہ صدر بیرونی میں درج کیا گیا۔ عدالت نے تفصیلی دلائل سننے کے بعد فیصلہ سناتے ہوئے کہا کہ چاروں مجرمان نے انتہائی سنگین اور غیر انسانی جرم کا ارتکاب کیا، جنہوں نے نہ صرف جیل کے نظم و ضبط کو پامال کیا بلکہ ایک معصوم جان کو سفاکیت سے چھین لیا۔ عدالت کے فیصلے میں مزید کہا گیا کہ چاروں مجرمان کو اس وقت تک پھانسی کے پھندے پر لٹکایا جائے گا جب تک ان کی موت واقع نہ ہو۔ مزید پڑھیں: انڈیا نے پانی بند کرنے کی کوشش کی تو یہ جنگ کے مترادف ہوگا، بلاول بھٹو فیصلے کے مطابق مجرمان کواجتماعی زیادتی کے جرم میں ایک بار سزائے موت، قتل کے جرم میں ایک بار سزائے موت اور پانچ، پانچ لاکھ روپے جرمانے کی سزا دی گئی ہے۔ سزا سنائے جانے کے بعد چاروں مجرمان کو دوبارہ جیل منتقل کر دیا گیا ہے۔ عدالت نے قرار دیا کہ جیل میں موجود عملہ، نگہبانی کے نظام اور اصلاحاتی اداروں کی خامیوں کو بھی مدنظر رکھا جانا چاہیے تاکہ مستقبل میں ایسے سانحات سے بچا جا سکے۔ خیال رہے کہ یہ واقعہ نہ صرف قانونی و عدالتی نظام بلکہ جیلوں کے حفاظتی انتظامات پر بھی کئی سوالات کھڑے کرتا ہے۔ ماہرین کا کہنا ہے کہ جیلوں میں موجود کم عمر قیدیوں کی حفاظت کے لیے الگ نظام اور سخت نگرانی کا بندوبست ناگزیر ہو چکا ہے۔
پاکستان بھر میں قیامت خیز گرمی، محفوظ رہنے کے لیے ہمیں کیا کرنا ہوگا؟
ملک بھر میں اس وقت شدید گرمی کی لہر جاری ہے، جس کے باعث محکمہ موسمیات نے ہیٹ ویو الرٹ جاری کر دیا ہے۔ الرٹ کے مطابق رواں ہفتے کے دوران درجہ حرارت معمول سے 5 سے 7 ڈگری سینٹی گریڈ زائد رہنے کا امکان ہے، جب کہ کسی بھی مقام پر بارش کی پیش گوئی نہیں کی گئی۔ محکمہ موسمیات کا کہنا ہے کہ گرمی کی شدت آئندہ ایک ہفتے تک جاری رہ سکتی ہے، جس سے شہریوں کی صحت اور روزمرہ زندگی بری طرح متاثر ہو سکتی ہے۔ گزشتہ 24 گھنٹوں کے دوران ملک کے کئی شہروں میں شدید گرمی ریکارڈ کی گئی۔ بھکر اور جیکب آباد میں درجہ حرارت 49 ڈگری، جب کہ سرگودھا، گوجرانوالہ، حافظ آباد اور سبی میں 48 ڈگری سینٹی گریڈ ریکارڈ کیا گیا۔ لاہور میں درجہ حرارت 42 ڈگری تھا، تاہم محسوس کی جانے والی گرمی کی شدت 46 ڈگری تک پہنچ گئی۔ ماہرین صحت نے شہریوں کو ہدایت کی ہے کہ وہ غیر ضروری طور پر دھوپ میں نکلنے سے گریز کریں، ڈھیلے ڈھالے کپڑے پہنیں، زیادہ سے زیادہ پانی پیئیں اور ٹھنڈی و سایہ دار جگہوں پر قیام کریں۔ لاہور، کراچی، پشاور اور کوئٹہ سمیت بڑے شہروں کے اسپتالوں میں ہیٹ ویو سے متاثرہ مریضوں کی تعداد میں اضافے کے پیش نظر ایمرجنسی نافذ کر دی گئی ہے۔ ضلعی انتظامیہ کو ہدایت کی گئی ہے کہ وہ تمام ایمرجنسی سروسز اور پانی کی فراہمی کو یقینی بنائیں۔ ادھر ماحولیاتی ماہرین کا کہنا ہے کہ شہروں میں درختوں کی کمی، بے ہنگم تعمیرات اور کنکریٹ کے پھیلاؤ نے گرمی کی شدت کو مزید بڑھا دیا ہے۔ لاہور جیسے بڑے شہر کو “کنکریٹ جنگل” قرار دیا جا رہا ہے، جہاں درختوں کی جگہ بلند عمارتوں نے لے لی ہے۔ محکمہ موسمیات نے شہریوں پر زور دیا ہے کہ وہ حکومتی ہدایات پر عمل کرتے ہوئے گرمی سے بچاؤ کی احتیاطی تدابیر اختیار کریں، تاکہ ممکنہ انسانی نقصانات سے بچا جا سکے۔
امریکا-ایران کشیدگی یا وجہ کچھ اور؟ خام تیل کی قیمتوں میں چار فیصد سے زائد کا اضافہ
امریکا اور ایران کے درمیان بڑھتی ہوئی کشیدگی کے باعث عالمی منڈی میں خام تیل کی قیمتوں میں چار فیصد سے زائد اضافہ ریکارڈ کیا گیا۔ غیرملکی خبررساں ادارے ‘سی این بی سی’ کے مطابق بدھ کے روز عالمی منڈی میں برینٹ کروڈ آئل کی قیمت میں 2.90 ڈالر (4.3 فیصد) اضافہ ہوا، جس کے بعد فی بیرل قیمت 69.77 ڈالر تک جا پہنچی۔ اسی طرح امریکی ویسٹ ٹیکساس انٹرمیڈیٹ (وی ٹی آئی) کروڈ کی قیمت میں 3.17 ڈالر (4.9 فیصد) اضافہ ہوا اور فی بیرل قیمت 68.15 ڈالر پر بند ہوئی۔ واضح رہے کہ امریکی صدر ڈونلڈ ٹرمپ کی جانب سے ایران کے ساتھ جوہری معاہدے کے امکانات پر شکوک و شبہات کا اظہار کیے جانے کے بعد عالمی منڈی میں خام تیل کی قیمتوں میں چار فیصد اضافہ سامنے آیا ہے۔ امریکی محکمہ خارجہ کے حکام نے غیرملکی خبررساں ادارے این بی سی نیوز کو بتایا کہ بغداد میں امریکی سفارت خانے سے تمام غیر ضروری عملے کو نکالنے کی تیاری کی جا رہی ہے۔ ایک اعلیٰ عہدیدار نے کہا کہ صدر ٹرمپ امریکی شہریوں کی سلامتی کے لیے پرعزم ہیں، چاہے وہ اندرونِ ملک ہوں یا پھربیرون ممالک میں ہوں۔ امریکی محکمہ خارجہ کے مطابق وہ اپنی سفارتی تنصیبات کی سیکیورٹی صورتحال کا مسلسل جائزہ لیتے ہیں اور حالیہ تجزیے کے بعد بغداد مشن کے حجم میں کمی کا فیصلہ کیا گیا ہے۔ برطانوی بحریہ کی تنظیم یوکے میری ٹائم ٹریڈ آپریشنزنے خبردار کیا ہے کہ خلیج میں کشیدگی میں مزید اضافہ اور ممکنہ فوجی تصادم کا خطرہ موجود ہے، جس سے بحری تجارتی سرگرمیاں متاثر ہو سکتی ہیں۔ امریکی صدر ڈونلڈ ٹرمپ نے نیو یارک پوسٹ سے گفتگو میں کہا ہے کہ انہیں اب ایران کے ساتھ کسی جوہری معاہدے کے امکانات کم لگتے ہیں۔ ان کا کہنا تھاکہ میں پہلے سے کم پُرامید ہوں۔ ایسا لگتا ہے کہ ایران کچھ تاخیر کر رہا ہے، جو افسوسناک ہے۔ میں یہ واضح کر دوں کہ ایران جوہری ہتھیار حاصل نہیں کرے گا، لیکن بہتر یہ ہوگا کہ یہ بغیر کسی کے مرنے کے بغیر جنگ کے بغیر ہو۔ مزید پڑھیں: برطانیہ 2034 تک دفاعی اخراجات کو جی ڈی پی کے تین فیصد تک پہنچا دے گا، برطانوی وزیر دفاع دوسری جانب ایران کے وزیر دفاع بریگیڈیئر جنرل عزیز ناصرزادہ نے واضح کیا ہے کہ خطے میں تمام امریکی اڈے ایرانی ہتھیاروں کی زد میں ہیں۔ سرکاری خبر رساں ادارے آئی آر این اے کے مطابق جنرل ناصرزادہ نے کہا کہ ایران اپنی سلامتی کے دفاع میں کسی بھی امریکی اقدام کا بروقت اور مؤثر جواب دینے سے گریز نہیں کرے گا۔
