📢 تازہ ترین اپ ڈیٹس
ذرائع کے مطابق ایرانی صدر مسعود پزشکیان کل سول و عسکری قیادت سے ملیں گے، پاکستان-ایران گیس پائپ لائن اور باہمی فروغ پر بات چیت ہوگی۔ اس کے علاوہ سرحدی انتظام، توانائی و تجارت میں تعاون پر گفتگو متوقع ہے۔
ایرانی وزیرِ خارجہ عباس عراقچی فارن آفس پہنچے، جہاں ہم منصب اسحٰق ڈار نے اُن کا شاندار استقبال کیاگیا۔ دونوں اعلیٰ حکام کے درمیان ملاقات میں دو طرفہ تعلقات کے مختلف پہلوؤں پر بات چیت کی گئی۔
ایرانی صدر کی اسلام آباد آمد پر وزیر اعظم شہباز شریف نے ایئر پورٹ پر اُن کا استقبال کیا، اس موقع پر نائب وزیراعظم اسحٰق ڈار، وفاقی وزیر اطلاعات عطا اللہ تارڑ سمیت دیگر اعلیٰ حکام بھی موقع پر موجود ہیں۔ ایرانی صدر کو ریڈ کارپیٹ استقبال کے ساتھ ساتھ 21 توپوں کی سلامی بھی پیش کی گئی۔
ایرانی صدر چیئرمین سینیٹ سید یوسف رضا گیلانی اور سپیکرقومی اسمبلی سردار ایاز صادق سے بھی ملیں گے۔
ایرانی صدر لاہور کے بعد اسلام آباد پہنچ گئے، پاکستان کے وفاقی دارالحکومت کو خیر مقدمی بینرز اور دونوں ممالک کے قومی پرچموں سے سجایا گیا ہے۔
ایرانی صدر مسعود پزشکیان کی پاکستان پہچنے پر لاہور ایئر پورٹ پر قائد مسلم لیگ ن نواز سے خصوصی ملاقات کی ۔ ملاقات میں وزیر اعلی پنجاب مریم نواز بھی موجود تھیں۔
ایرانی صدر کی لاہور آمد پر سیکیورٹی کے سخت انتظامات کیے گئے ہیں۔ تمام روٹس پر خیرمقدمی بینرز لگائے گئے ہیں۔
مکمل تفصیلات:
وزیرِاعظم پاکستان شہباز شریف کی خصوصی دعوت پر ایران کے صدر ڈاکٹر مسعود پزشکیان آج ہفتے کو اپنے پہلے سرکاری اور دو روزہ دورے پر پاکستان پہنچ گئے، جس کا مقصد پاکستان اور ایران کے درمیان برادرانہ تعلقات کو مزید فروغ دینا ہے۔
ایرانی صدر کے ہمراہ ایک اعلیٰ سطح کا وفد بھی پاکستان آیا ہے، جس میں ایرانی وزیر خارجہ سید عباس عراقچی، سینیئر وزرا اور دیگر اعلیٰ حکام بھی شامل ہیں۔
دورے کے دوران صدر پزشکیان صدر آصف علی زرداری اور وزیر اعظم شہباز شریف سے ملاقاتیں کریں گے، جب کہ وفود کی سطح پر بھی بات چیت ہوگی۔
ترجمان دفتر خارجہ نے کہا ہے کہ یہ دورہ پاکستان اور ایران کے درمیان قریبی تعلقات کو نئی جہت دے گا اور دونوں ممالک باہمی دلچسپی کے تمام امور پر خوشگوار ماحول میں تبادلہ خیال کریں گے۔
دفتر خارجہ کا کہنا ہے کہ پاکستان، ایران کے ساتھ مضبوط سفارتی تعلقات کا خواہاں ہے اور خطے میں امن و استحکام کے لیے سفارتی ذرائع کے ذریعے کشیدگی میں کمی لانے کے اپنے عزم پر قائم ہے۔
امریکی وزیر خارجہ مارکو روبیو کے حالیہ بیان کا بھی حوالہ دیا گیا ہے، جس میں انہوں نے پاکستانی وزیر خارجہ اسحاق ڈار سے ملاقات کے بعد پاکستان کے ایران کے ساتھ تعمیری مذاکرات میں کردار کو سراہا۔
لاہور آمد پر وزیراعلیٰ پنجاب مریم نواز اور وفاقی وزیر برائے ہاؤسنگ و تعمیرات میاں ریاض حسین پیرزادہ نے ایرانی صدر کا استقبال کیا۔ انہوں نے مزارِ اقبال پر حاضری بھی دی، جس کے بعد وہ اسلام آباد روانہ ہوگئے۔
یاد رہے کہ اس سے قبل وزیراعظم شہباز شریف نے 27 مئی 2025 کو ایران کا دورہ کیا تھا۔
