وفاقی وزیر و صدر مسلم لیگ ن خیبر پختونخوا امیر مقام نے کہا ہے کہ بانی پی ٹی آئی عمران خان کے خطوط کا کوئی مستقبل نہیں اور انھیں ڈونلڈ ٹرمپ کے یوکرینی صدر کے ساتھ رویئے سے سبق سیکھنا چاہیے۔
مسلم لیگ ن کے صوبائی صدر امیر مقام نے سوات میں عوامی اجتماع سے خطاب کرتے ہوئے کہا کہ وزیر اعظم شہباز شریف کی قیادت میں پاکستان معاشی بحالی اور استحکام کی راہ پر گامزن ہے، جیسا کہ مہنگائی میں کمی، برآمدات میں اضافہ اور بڑے ترقیاتی منصوبوں کی بحالی اس کا واضح ثبوت ہیں۔
صوبائی صدر مسلم لیگ ن نے کہا کہ ن لیگ کی حکومت عوام کو ریلیف فراہم کرنے کے لیے دن رات کام کر رہی ہے، جس کے نتائج جلد مزید سامنے آئیں گے۔ پنجاب میں صحت، تعلیم، انفراسٹرکچر اور سوشل ویلفیئر کے منصوبے برق رفتاری سے مکمل کیے جا رہے ہیں اور عوام کو حقیقی ریلیف مل رہا ہے۔
امیر مقام کا کہنا تھا کہ نواز شریف نے ہمیشہ عوامی خدمت، معاشی ترقی اور ملکی استحکام کو ترجیح دی ہے اور آج ان کے ویژن کے مطابق ملک کو دوبارہ ترقی کی شاہراہ پر ڈال دیا گیا ہے۔
وفاقی وزیر نے کہا کہ اگلے عام انتخابات 2029 میں ہی ہوں گے، اپوزیشن کو انتظار کرنا ہوگا۔ پی ٹی آئی حکومت کے پاس صوبے کے عوام کے لیے کوئی ٹھوس منصوبہ نہیں، محض اقتدار کے حصول میں مصروف ہیں، پہلے اسلام آباد پر قبضے کے خواب، اب وزارتوں کے لیے سرگرداں مگر عوام کی کوئی پرواہ نہیں۔
مزید پڑھیں: پنجاب کی کارکرگی خیبرپختونخوا کے مقابلے میں ایک فیصد بھی نہیں، علی امین گنڈاپور کا دعویٰ
امیر مقام نے کہا کہ خیبرپختونخوا کے عوام پی ٹی آئی کی حقیقت جان چکے ہیں، یہی وجہ ہے کہ ان کی مقبولیت کا گراف تیزی سے گر رہا ہے، اوورسیز پاکستانیوں نے بھی پی ٹی آئی کی کال کو مسترد کر دیا ہے۔
حزبِ اختلاف کے حوالے سے صوبائی صدر مسلم لیگ (ن) کا کہنا تھا کہ حزب اختلاف کو سول ملٹری الائنس ہضم نہیں ہو رہا اور وہ اس حوالے سے بے بنیاد پروپیگنڈا کر رہے ہیں۔
ان کا کہنا ہے عمران خان کے لکھے گئے خطوط کا کوئی مستقبل نہیں ہے اور ان خطوط کا مقدر صرف ردی کی ٹوکری ہے۔
