پاکستان کے محکمہ موسمیات نے عید الفطر سے پہلے کے دنوں میں کئی علاقوں میں بڑے پیمانے پر بارش، گرج چمک اور ممکنہ ژالہ باری کی پیش گوئی کی ہے۔
پاکستان کے محکمہ موسمیات (پی ایم ڈی) نے کہا کہ 25 اور 27 مارچ کے درمیان گیلے موسم کی توقع ہے، جو بالائی اور وسطی علاقوں کو متاثر کرے گا، پہاڑی علاقوں میں برف باری کی پیش گوئی کی گئی ہے۔
پی ایم ڈی کے مطابق 25 سے 27 مارچ تک بونیر، دیر، مالاکنڈ، صوابی، چارسدہ، ایبٹ آباد اور پشاور میں بارش کا امکان ہے۔ کرک، لکی مروت، شمالی و جنوبی وزیرستان اور ڈیرہ اسماعیل خان سمیت دیگر علاقوں میں بھی بارش، ژالہ باری اور بلندی پر برفباری ہوسکتی ہے۔
اسلام آباد، پوٹھوہار ریجن، مری اور گلیات میں بھی 25 سے 27 مارچ کے درمیان بارش اور ہلکی برف باری کی توقع ہے۔
سندھ میں 25 اور 26 مارچ کو گردو غبار کے طوفان کا امکان ہے، جب کہ کوئٹہ، زیارت، ژوب، موسیٰ خیل، چمن اور مستونگ سمیت بلوچستان کے کچھ حصوں میں بارش کا امکان ہے۔
محکمہ موسمیات نے گرج چمک اور ژالہ باری سے بھی خبردار کیا ہے، جس سے بجلی کی لائنوں اور سولر پینلز کو نقصان پہنچ سکتا ہے، جب کہ پہاڑی علاقوں میں ہلکی سے بھاری بارش کی وجہ سے لینڈ سلائیڈنگ کا خطرہ رہتا ہے۔
پی ایم ڈی نے بالائی پنجاب، اسلام آباد اور خیبرپختونخوا میں شدید ژالہ باری کے حوالے سے الرٹ جاری کیا ہے، جو کھڑی فصلوں بالخصوص گندم کو نقصان پہنچا سکتے ہیں۔ تیز ہوائیں اور اولے بھی متاثرہ علاقوں میں ساختی نقصان کا باعث بن سکتے ہیں۔
حکام نے رہائشیوں اور کاشتکاروں کو مشورہ دیا ہے کہ موسم کی متوقع خرابی سے قبل احتیاطی تدابیر اختیار کریں۔
