پنجاب ڈیزاسٹر مینجمنٹ اتھارٹی (پی ڈی ایم اے) نے رواں ماہ کے دوران درجہ حرارت میں اضافے اور بارشوں کی پیشگوئی کرتے ہوئے الرٹ جاری کر دیا ہے،8 اپریل سے 11 اپریل تک پنجاب کے بیشتر اضلاع میں گرد آلود ہوائیں اور گرج چمک کے ساتھ بارشیں ہو سکتی ہیں۔
پی ڈی ایم اے کی طرف سے جاری کی جانے والی پیشگوئی میں کہا گیا ہے کہ راولپنڈی، مری، گلیات، اٹک، چکوال، منڈی بہاوالدین، گجرات، جہلم اور گجرانوالہ میں تیز ہواؤں کے ساتھ بارش ہو سکتی ہے۔ علاوہ ازیں لاہور، قصور، سیالکوٹ، نارووال، اوکاڑہ، فیصل آباد، ٹوبہ ٹیک سنگھ، جھنگ، خوشاب، سرگودھا اور میانوالی میں آندھی اور بارشوں کے امکانات ہیں۔
رواں ماہ کے دوران درجہ حرارت میں 4 سے 7 ڈگری تک معمول سے اضافے کی توقع ہے، جس سے پنجاب کے میدانی علاقوں میں گرمی کی شدت میں اضافہ ہو گا۔
وزیر اعلیٰ پنجاب کی ہدایات پر ضلعی انتظامیہ کو الرٹ جاری کر دیا گیا ہےاور عوام کو موسمی صورتحال سے بچاؤ کے لیے احتیاطی تدابیر اپنانے کی ہدایت کی گئی ہے۔ پی ڈی ایم اے نے کہا ہے کہ گرمی اور لو کی شدت میں اضافے کے باعث عوام کو محتاط رہنا ہوگا، خصوصاً دوپہر کے وقت کام کرنے والے افراد کو لو سے بچنے کے لیے احتیاطی تدابیر اختیار کرنی چاہئیں۔
سکول ایجوکیشن، محکمہ صحت، آبپاشی، تعمیر و مواصلات، لوکل گورنمنٹ اور لائیو اسٹاک کو بھی الرٹ جاری کیا گیا ہے، جب کہ انفارمیشن ڈیپارٹمنٹ، واسا، پنجاب پولیس اور سول ڈیفنس کو بھی موسمی صورتحال کے پیش نظر تیار رہنے کی ہدایت کی گئی ہے۔
ڈی جی پی ڈی ایم اے عرفان علی کاٹھیا نے شہریوں کو آسمانی بجلی سے تحفظ کے لیے محفوظ مقامات پر رہنے کی ہدایت کی ہے اور کہا کہ گرج چمک اور طوفانی حالات میں کھلے آسمان تلے جانے سے گریز کیا جائے۔ ایمرجنسی صورتحال میں پی ڈی ایم اے ہیلپ لائن 1129 پر رابطہ کرنے کی ہدایت بھی کی گئی ہے۔
