ڈائریکٹر جنرل ایف آئی اے (فیڈرل انویسٹی گیشن ایجنسی) رفعت مختار نے اپنے عہدے کا چارج سنبھال لیا ہے۔ رفعت مختار کا تعلق پولیس سروس آف پاکستان کے 24 ویں کامن سے ہے اور انہوں نے اپنی پیشہ ورانہ زندگی میں متعدد اہم عہدوں پر خدمات انجام دی ہیں۔
اس سے قبل، رفعت مختار نیشنل ہائی ویز اینڈ موٹروے پولیس میں انسپکٹر جنرل کے طور پر خدمات سرانجام دے رہے تھے۔ ان کی کیریئر میں وزارت داخلہ میں ایڈیشنل سیکرٹری کی حیثیت سے بھی اہم کردار رہا ہے۔ اس کے علاوہ، وہ انسپکٹر جنرل پولیس سندھ کے طور پر بھی تعینات رہے ہیں۔
رفعت مختار نے بطور آر پی او گوجرانوالہ، ملتان، فیصل آباد اور بہاولپور بھی اپنے فرائض کامیابی سے انجام دیے ہیں اور ان کے تجربے کا دائرہ وسیع ہے۔
ایف آئی اے ہیڈکوارٹرز میں ان کی آمد کے موقع پر ایف آئی اے کے افسران سے ان کا تعارف کرایا گیا اور ادارے کے مختلف شعبوں کے بارے میں تفصیلی بریفنگ دی گئی۔
اس موقع پر ڈائریکٹر جنرل ایف آئی اے رفعت مختار کا کہنا تھا کہ ایمانداری، فرض شناسی اور قانون کی عملداری کو یقینی بنایا جائے گا۔ پبلک سروس ڈیلیوری کو بہتر بنانے کے لئے ہنگامی بنیادوں پر اقدامات کیے جائیں گے۔
انہوں نے مزید کہا کہ انسانی سمگلنگ کی روک تھام کے لئے موثر حکمت عملی کو یقینی بنایا جائے گا اور بدعنوانی کے خلاف زیرو ٹالرنس پالیسی کے تحت اقدامات جاری رہیں گے۔
رفعت مختار نے یہ بھی کہا کہ پیشہ ورانہ فرائض کی ادائیگی میں کسی قسم کی غفلت کو ہرگز برداشت نہیں کیا جائے گا۔
