ڈومینیکن ریپبلک میں غیر دستاویزی تارکین وطن کے خلاف شروع کیے گئے سخت کریک ڈاؤن کے پہلے ہی دن سینٹو ڈومنگو کے مختلف ہسپتالوں سے ہیٹی کی 130 سے زائد خواتین اور بچوں کو حراست میں لے لیا گیا۔ پیر کو گرفتار کی گئی ان خواتین میں سے کئی حاملہ تھیں جبکہ بعض نے حال ہی میں بچوں کو جنم دیا تھا۔
یہ کارروائی اس حکومتی منصوبے کا حصہ ہے جس کا اعلان گزشتہ سال کیا گیا تھا، جس کے تحت ہمسایہ ملک ہیٹی سے ہجرت کو روکنے کے لیے ہر ہفتے 10,000 افراد کو ملک بدر کیا جانا ہے۔ تاہم صدر لوئس ابیناڈر کی قیادت میں حکومت کو ہیٹی کے شہریوں کے ساتھ ناروا سلوک پر شدید تنقید کا سامنا ہے، بالخصوص ایسے حالات میں جب بہت سے ہیٹی باشندے دارالحکومت پورٹ-او-پرنس میں گینگ تشدد اور غربت سے فرار ہو کر جان بچانے کی کوشش کر رہے ہیں۔
امیگریشن ڈیپارٹمنٹ کے مطابق، گرفتار خواتین کو حراستی مراکز میں منتقل کیا گیا جہاں ان سے “باوقار سلوک” کیا گیا، ان کا بائیو میٹرک ڈیٹا اور فنگر پرنٹس حاصل کیے گئے۔ تاہم انسانی حقوق کے کارکنوں اور متاثرہ افراد نے ان اقدامات کو غیر انسانی اور غیر یقینی قرار دیا ہے۔
ایک ہیٹی خاتون نے، جو اپنی حاملہ دوست کے ساتھ ہسپتال گئی تھیں، کہا کہ حکومت کا یہ کریک ڈاؤن حاملہ خواتین کے لیے شدید خطرات پیدا کر سکتا ہے۔ “اگر آج کسی عورت نے بچہ پیدا کیا ہے، تو وہ اسے آج نہیں لے جا سکتے، کیونکہ معلوم نہیں کیا ہوگا۔ اور اگر سی سیکشن ہوا ہو تو بھی، باہر سڑک پر یا واپسی کے دوران کوئی طبی سہولت نہیں ہوتی۔”
حکام کا کہنا ہے کہ خواتین کا طبی علاج مکمل ہونے کے بعد غیر دستاویزی ماؤں کو وطن واپس بھیج دیا جائے گا۔ دریں اثناء، ہیٹی سے روزانہ کئی درجن افراد ٹرکوں کے ذریعے سرحد عبور کرکے ڈومینیکن ریپبلک میں داخل ہو رہے ہیں تاکہ تشدد، بھوک اور سیاسی انتشار سے بچ سکیں۔
اے ایف پی کے مطابق، 2025 کے ابتدائی تین مہینوں میں ہی، ڈومینیکن ریپبلک نے 80,000 سے زائد افراد کو ہیٹی واپس بھیج دیا ہے۔
صدر ابیناڈر نے بارہا بین الاقوامی برادری پر زور دیا ہے کہ وہ ہیٹی میں استحکام بحال کرنے میں مؤثر کردار ادا کرے۔ تاہم انسانی حقوق کے علمبرداروں کا کہنا ہے کہ مہاجرین، خصوصاً خواتین اور بچوں، کے ساتھ اس نوعیت کا سلوک عالمی اصولوں اور انسانی ہمدردی کے منافی ہے۔
