میانوالی میں رحمانی خیل موڑ کے قریب انسداد دہشت گردی فورس (سی ٹی ڈی) اور دہشت گردوں کے درمیان فائرنگ کے شدید تبادلے میں 3 دہشت گرد ہلاک ہو گئے ہیں۔ تاہم، 6 دہشت گرد اندھیرے کا فائدہ اٹھاتے ہوئے فرار ہونے میں کامیاب ہو گئے۔
ترجمان سی ٹی ڈی کے مطابق، ہلاک ہونے والے دہشت گردوں کے قبضے سے بارودی مواد، اسلحہ اور دیگر سامان برآمد کیا گیا۔ فرار ہونے والے دہشت گردوں کی گرفتاری کے لیے علاقے میں سرچ آپریشن جاری ہے۔
وفاقی وزیرداخلہ محسن نقوی نے بنوں اورمیانوالی میں دہشت گردحملے ناکام کرانے پرسیکورٹی اہلکاروں کی پذیرائی کرتے ہوئے بہادرفورسز کوخراج تحسین پیش کیا ہے۔
اپنے بیان میں وزیر داخلہ نے خوارجی دہشتگردوں کے مذموم عزائم خاک میں ملانے پر پولیس اورقانون نافذکرنیوالے ادارو ں کو شاباش دی۔
یہ بھی پڑھیں:فوجی ترجمان کی پریس کانفرنس: ’انڈیا کو دوبارہ شوق پورا کرنا ہے تو آزما لے، ہم تیار ہیں‘
ساہیوال میں بھی سی ٹی ڈی پولیس نے انٹیلی جنس بیسڈ کارروائی کے دوران فتنۃ الخوارج سے تعلق رکھنے والے خطرناک دہشت گرد کو گرفتار کرلیا۔
سی ٹی ڈی کے مطابق امیر حمزہ نامی دہشت گرد کو نہر لوئر باری دوآب پاسکو آفس کے قریب سے گرفتار کیا گیا جس کے قبضے سے بارودی مواد، پرائما کارڈز، ڈیٹونیٹر، بیٹری، الیکٹرک سرکٹ اور اسلحہ برآمد کرلیا گیا جبکہ بم ڈسپوزل اسکواڈ کو بلا کر بارودی مواد کو ناکارہ بنادیا گیا۔
ترجمان سی ٹی ڈی کے مطابق گرفتار دہشت گرد بستی شادو خاں ضلع لیہ کا رہائشی ہے اور شہر کے مختلف مقامات پر دہشت گرد کی کارروائیاں کرکے خوف و ہراس پھیلانا چاہتا تھا، دہشت گرد کے خلاف مقدمہ درج کرکے مزید تفتیش کی جارہی ہے۔
