روس کے شہر برائنسک میں ایک ہائی وے پل گرنے سے کم از کم سات افراد ہلاک اور اکتیس زخمی ہو گئے۔ یہ حادثہ یوکرین کی سرحد کے قریب پیش آیا جب پل اچانک ٹرین کی پٹری پر آ گرا۔ حادثے کے وقت ایک مسافر ٹرین کلیموو کے قصبے سے ماسکو جا رہی تھی۔
پل کے گرنے سے متعدد بھاری ٹرک بھی نیچے آ گرے، جن میں سے کچھ چلتی ہوئی ٹرین پر آ پڑے۔ اس تصادم کے باعث ٹرین کا انجن اور کئی بوگیاں پٹری سے اتر گئیں۔ زخمیوں میں ایک بچہ بھی شامل ہے، جبکہ دو افراد کی حالت تشویشناک بتائی گئی ہے۔ تمام زخمیوں کو قریبی طبی مراکز میں منتقل کر دیا گیا ہے جہاں ان کا علاج جاری ہے۔
یہ بھی پڑھیں: انڈونیشیا میں کان کنی کے دوران چٹان گر گئی، لاشیں ملبے تلے دب گئیں، 10 افراد ہلاک
روس کی ہنگامی صورتحال کی وزارت کے مطابق ریسکیو ٹیمیں موقع پر پہنچ چکی ہیں اور ملبے تلے دبے افراد کو نکالنے کی کوششیں جاری ہیں۔ مسافروں کو نکال کر ایک قریبی اسٹیشن منتقل کیا گیا ہے، جہاں سے وہ ایک خصوصی طور پر تیار کی گئی ریزرو ٹرین کے ذریعے اپنا سفر ماسکو تک جاری رکھ سکیں گے۔
ماسکو ریلوے نے الزام عائد کیا ہے کہ یہ حادثہ “ٹرانسپورٹ آپریشنز میں غیر قانونی مداخلت” کے نتیجے میں پیش آیا۔ آن لائن سامنے آنے والی تصاویر میں دیکھا جا سکتا ہے کہ اندھیرے میں لوگ ایک دوسرے کی مدد سے ٹرین کے ملبے سے نکلنے کی کوشش کر رہے ہیں۔ موقع پر اضافی ہنگامی اہلکار، لائٹ ٹاورز اور امدادی سامان روانہ کر دیا گیا ہے تاکہ رات کے وقت کارروائی جاری رکھی جا سکے۔
ماسکو کے بین علاقائی ٹرانسپورٹ پراسیکیوٹر کے دفتر نے اس حادثے کی تحقیقات کا آغاز کر دیا ہے تاکہ پل گرنے کی اصل وجہ معلوم کی جا سکے۔ یہ واقعہ سرحد سے تقریباً سو کلومیٹر کے فاصلے پر وائگونیچسکی ضلع میں پیش آیا۔
