انڈین اپوزیشن جماعت کانگریس کی رہنما اور اپوزیشن لیڈر راہول گاندھی کی بہن پریانکا گاندھی نے غزہ میں انسانی امداد کی فراہمی کے حوالے سے اقوام متحدہ میں پیش کی گئی قرارداد کے حق میں ووٹ نہ دینے پر مودی حکومت کو کڑی تنقید کا نشانہ بنایا ہے۔
نجی نشریاتی ادارے جیو نیوز کے مطابق پریانکا گاندھی نے اپنے بیان میں انڈین حکومت کے فیصلے کو “شرمناک” قرار دیتے ہوئے کہا کہ جب غزہ میں خواتین اور بچوں سمیت 60 ہزار فلسطینی شہید ہو چکے ہیں، تو انسانی امداد کے حق میں آواز بلند نہ کرنا، نہ صرف انسانی ہمدردی کی تذلیل ہے بلکہ یہ انڈیا کی تاریخی سامراج مخالف پالیسی سے بھی انحراف ہے۔
انہوں نے اسرائیلی وزیراعظم بنیامن نیتن یاہو پر شدید تنقید کرتے ہوئے کہا کہ نیتن یاہو فلسطینی قوم کو صفحۂ ہستی سے مٹانے کی کوشش کر رہا ہے اور مودی سرکار اس ظلم پر جشن منا رہی ہے۔
مزید پڑھیں: اسرائیلی حملوں میں امریکا برابر کا شریک، اس کا خمیازہ بھگتنا ہوگا، ایران
پریانکا گاندھی کا کہنا تھا کہ انڈین حکومت عالمی اصولوں اور اخلاقی اقدار کی خلاف ورزی کرتے ہوئے اسرائیل کے ایران پر حملے اور ایرانی عسکری قیادت کے قتل پر خوشی کا اظہار کر رہی ہے، جو ایک جمہوری اور سیکولر ملک کے لیے باعثِ شرم اور مایوس کن طرزِ عمل ہے۔
انہوں نے انڈین عوام سے اپیل کی کہ وہ اپنی حکومت کے غیر انسانی اور یک طرفہ رویے پر سوال اٹھائیں اور انڈیا کے تاریخی مؤقف، جو ہمیشہ مظلوموں کے ساتھ کھڑا رہا ہے، کو دوبارہ بحال کریں۔
