انسٹاگرام نے صارفین کے لیے متعدد نئے فیچرز متعارف کرائے ہیں، جن کا مقصد ایپ کے استعمال کو زیادہ ذاتی نوعیت کا بنانا اور اظہار کے مزید طریقے فراہم کرنا ہے۔ یہ فیچرز رواں ہفتے سے دنیا بھر میں مرحلہ وار متعارف کرائے جا رہے ہیں۔
میٹا کی جانب سے جاری کردہ بیان کے مطابق، انسٹاگرام نے پروفائل گرڈ کو کسٹمائز کرنے کا نیا فیچر متعارف کرایا ہے۔ اس فیچر کے ذریعے صارفین اپنی پوسٹس کو روایتی چوکور انداز کے بجائے عمودی ترتیب میں بھی دیکھ اور ترتیب دے سکیں گے۔ میٹا کے مطابق، “صارفین اپنی پروفائل گرڈ کو اپنی پسند کے مطابق ترتیب دینے کے قابل ہوں گے۔”
یہ فیچر اگست 2024 سے آزمائشی بنیادوں پر مخصوص صارفین کے لیے دستیاب تھا۔ کمپنی کا کہنا ہے کہ اس فیچر کا مطالبہ کافی عرصے سے صارفین کی جانب سے کیا جا رہا تھا۔
انسٹاگرام نے ایک اور فیچر کے تحت صارفین کو یہ اختیار بھی دیا ہے کہ وہ اپنی پروفائل پر دکھائے جانے والے مواد کو فالوورز کے لیے ایڈٹ کر سکیں گے۔ اس کے علاوہ، انسٹاگرام نوٹس میں سپوٹیفائی گانوں کو شیئر کرنے کی سہولت بھی شامل کی گئی ہے۔
کمپنی کے مطابق، “اب صارفین جب بھی سپوٹیفائی پر کوئی نیا گانا سنیں گے، تو اس کا نام اور گلوکار کی معلومات خودکار طور پر انسٹاگرام نوٹس میں ظاہر ہوں گی۔” انسٹاگرام نے اسٹوریز اور ریلز ویڈیوز کے لیے ہینڈ رائٹنگ فونٹس کا نیا سیٹ بھی متعارف کرایا ہے، جس سے صارفین اپنے مواد کو مزید منفرد انداز میں پیش کر سکیں گے۔
میٹا کا کہنا ہے کہ ان اپڈیٹس کا مقصد صارفین کو بہتر اظہار اور ذاتی کنٹرول کے مزید اختیارات دینا ہے۔ کمپنی کی جانب سے ان فیچرز کی عالمی سطح پر دستیابی مرحلہ وار مکمل کی جائے گی۔
