پاکستان کے مختلف علاقوں میں پری مون سون بارشوں کا سلسلہ جاری ہے اور محکمہ موسمیات نے پیر تک مزید بارشوں کی پیش گوئی کی ہے۔ اس دوران بعض مقامات پر وقفے وقفے سے بارش کا امکان ظاہر کیا گیا ہے۔
محکمہ موسمیات کے مطابق آئندہ 24 گھنٹوں کے دوران کشمیر، بالائی خیبر پختونخوا، شمال مشرقی پنجاب، پوٹھوہار ریجن، اسلام آباد اور گلگت بلتستان میں گرد آلود ہواؤں، بارش اور گرج چمک کے ساتھ موسلا دھار بارش متوقع ہے۔ اس کے علاوہ کشمیر، پوٹھوہار ریجن اور بالائی خیبر پختونخوا میں بعض مقامات پر شدید بارش بھی ہو سکتی ہے۔
محکمہ موسمیات کا کہنا ہے کہ جنوب مشرقی سندھ کے چند مقاماتہ، پر جزوی طور پر ابر آلود موسم اور ہلکی بارش کا امکان بھی موجود ہے۔
ادارے کے مطابق اگرچہ ان بارشوں سے وقتی طور پر موسم میں بہتری آئے گی، تاہم ملک کے بیشتر حصوں میں آئندہ چند روز کے دوران موسم گرم اور مرطوب رہنے کی توقع ہے۔
محکمہ موسمیات نے قبل ازیں 20 جون سے پری مون سون بارشوں کا الرٹ جاری کیا تھا۔ اس الرٹ میں شہری سیلاب اور بنیادی ڈھانچے کو نقصان پہنچنے کے خدشے کا اظہار کیا گیا تھا، خاص طور پر لاہور، راولپنڈی، گوجرانوالہ اور اسلام آباد کے نشیبی علاقوں میں۔
محکمہ موسمیات نے مزید کہا کہ متاثرہ علاقوں میں شہری انتظامیہ کو الرٹ رہنے اور نالوں کی صفائی سمیت احتیاطی اقدامات یقینی بنانے کی ضرورت ہے۔
متعلقہ حکام نے عوام، مسافروں اور سیاحوں کو مشورہ دیا ہے کہ وہ بارش سے متاثرہ اور نشیبی علاقوں کی طرف غیر ضروری سفر سے گریز کریں۔ محکمہ موسمیات نے کسانوں کو بھی ہدایت کی ہے کہ وہ موسم کی صورتحال کو مدنظر رکھتے ہوئے زرعی سرگرمیوں کی منصوبہ بندی کریں۔
تاحال کسی بڑے جانی یا مالی نقصان کی اطلاع موصول نہیں ہوئی، تاہم شہری علاقوں میں بعض مقامات پر پانی جمع ہونے اور ٹریفک کی روانی متاثر ہونے کی اطلاعات ہیں۔
متعلقہ محکموں اور مقامی حکومتوں کو ہدایت کی گئی ہے کہ وہ کسی بھی ہنگامی صورت حال سے نمٹنے کے لیے تیار رہیں۔ محکمہ موسمیات نے عوام سے اپیل کی ہے کہ وہ تازہ ترین موسم کی صورتحال اور ایڈوائزری کے لیے متعلقہ اداروں کی جاری کردہ معلومات پر انحصار کریں۔
