ہونڈا اٹلس نے جاپان کو 38 مقامی طور پر اسمبل کی گئی ہونڈا سٹی 1.2 ایل گاڑیوں کی دوسری کھیپ برآمد کر دی ہے، جو کہ اس کی جاپان کے لیے گاڑیوں کی دوسری کھیپ ہے۔
اس سے قبل اپریل 2025 میں کمپنی نے پہلی کھیپ کے طور پر 40 گاڑیاں جاپان روانہ کی تھیں، جسے پاکستان کی آٹو انڈسٹری کے لیے ایک اہم سنگ میل قرار دیا گیا تھا۔
ہونڈا کے حکام کا کہنا ہے کہ گاڑیوں کی برآمد سے نہ صرف مقامی پیداواری معیار میں بہتری کی عکاسی ہوتی ہے بلکہ عالمی منڈیوں تک رسائی کے لیے اسٹریٹجک اقدامات کی بھی نشاندہی ہوتی ہے۔ اس پیش رفت سے ہونڈا کی عالمی سپلائی چین میں موجودگی مزید مستحکم ہوئی ہے اور پاکستان میں تیار شدہ گاڑیوں کے معیار پر اعتماد بھی بڑھا ہے۔
واضح رہے کہ پاکستان میں دیگر کار ساز ادارے بھی برآمدی منڈیوں کی طرف پیش رفت کر رہے ہیں۔ جولائی 2023 میں ٹویوٹا انڈس نے فورچیونر، کرولا کراس اور آئی ایم وی ماڈلز سمیت 50 گاڑیاں برآمد کی تھیں، جب کہ چنگان پاکستان نے 14 اوشان ایکس 7 ایس یو وی گاڑیاں کینیا اور تنزانیہ روانہ کی تھیں۔
مزید پڑھیں:’میڈ بائی گوگل‘ پکسل 10 کے ساتھ کون کون سی نئی ڈیوائسز متوقع ہیں؟
حالیہ دنوں میں ہیونڈائی نشاط نے بھی برآمدات کے میدان میں قدم رکھا ہے اور اپنی سانتافی ہائبرڈ سی بی یو گاڑیاں سری لنکا بھیجی ہیں، جو پاکستانی آٹو انڈسٹری کی بین الاقوامی منڈیوں میں مسابقتی صلاحیت میں اضافے کا مظہر ہے۔
