بلوچستان کے علاقے قلات میں سیکیورٹی فورسز کے آپریشن کے دوران فتنہ الہندوستان کے آٹھ دہشتگرد مارے گئے۔
پاک فوج کے شعبہ تعلقات عامہ (آئی ایس پی آر) کے مطابق بلوچستان کے ضلع قلات میں فتنہ الہندوستان کے دہشتگردوں کی موجودگی کی اطلاع پر انٹیلی جنس پر مبنی آپریشن کیے گئے۔
سیکیورٹی فورسز کے آپریشنز کے دوران فتنہ الہندوستان کے دہشتگردوں کے ٹھکانوں کو نشانہ بنایا گیا۔ فائرنگ کے تبادلے میں فتنہ الہندوستان کے آٹھ دہشتگرد مارے گئے۔
آئی ایس پی آر کے مطابق مارے گئے دہشتگردوں سے اسلحہ، گولہ بارود اور دھماکہ خیز مواد برآمد ہوا۔ مارے جانے والے دہشتگرد متعدد دہشت گردانہ سرگرمیوں میں ملوث تھے۔
ترجمان پاک فوج نے کہا ہے کہ پاکستان کی سیکیورٹی فورسز ملک سے ہندوستانی اسپانسرڈ دہشت گردی کے ناسور کو ختم کرنے کے لیے پرعزم ہے۔ ہندوستانی اسپانسرڈ دہشت گردوں اور سہولت کاروں کو انصاف کے کٹہرے میں لایا جائے گا۔
واضح رہے کہ دو روز قبل بھی خیبر پختونخوا کے ضلع مالاکنڈ میں پولیس اور محکمہ انسداد دہشتگردی (سی ٹی ڈی) کے مشترکہ آپریشن کے دوران پانچ دہشتگرد ہلاک، دو زخمی اور آٹھ کو گرفتار کیا گیا۔
مزید پڑھیں:مالاکنڈ: سی ٹی ڈی اور پولیس کے مشترکہ آپریشن میں پانچ دہشتگرد ہلاک، آٹھ گرفتار
آپریشن مالاکنڈ کی تحصیل درگئی کے علاقے مہردے میں کیا گیا، جس کے بارے میں اسسٹنٹ کمشنر درگئی وحید اللہ خان نے بتایا کہ پولیس اور سی ٹی ڈی نے کامیاب کارروائی کرتے ہوئے 5 دہشتگردوں کو ہلاک کیا، جب کہ دو کو زخمی حالت میں گرفتار کیا گیا۔
