پاکستان کرکٹ ٹیم کے نائب کپتان شاداب خان کے ایشیا کپ 2025 میں شرکت کے امکانات معدوم ہو گئے ہیں۔
نجی خبررساں ادارے ایکسپریس ٹریبیون کی رپورٹ کے مطابق آل راؤنڈر شاداب خان ابھی تک کندھے کی انجری سے مکمل طور پر صحت یاب نہیں ہو سکے۔ 26 سالہ شاداب نے رواں ماہ کے آغاز میں برطانیہ میں سرجری کروائی تھی، تاہم ڈاکٹرز کا کہنا ہے کہ انہیں مکمل صحتیابی کے لیے کم از کم تین ماہ درکار ہیں۔
یاد رہے کہ یہی انجری شاداب کو بنگلہ دیش کے خلاف حالیہ ٹی20 سیریز اور ویسٹ انڈیز کے دورے سے بھی باہر کر چکی ہے۔ طبی ماہرین کا کہنا ہے کہ ان کی کرکٹ میں واپسی اکتوبر سے قبل ممکن نہیں، جس کے باعث وہ 9 سے 28 ستمبر تک متحدہ عرب امارات میں شیڈول ایشیا کپ میں حصہ نہیں لے سکیں گے۔
ایشیا کپ 2025 رواں سال ٹی20 فارمیٹ میں کھیلا جائے گا، جو آئندہ سال انڈیا اور سری لنکا میں ہونے والے ٹی20 ورلڈکپ کی تیاریوں کا اہم حصہ سمجھا جا رہا ہے۔
دوسری جانب پاکستان کرکٹ بورڈ (پی سی بی) نے شاداب خان کے متبادل نائب کپتان کا تاحال اعلان نہیں کیا۔ بنگلہ دیش کے خلاف سیریز اور ویسٹ انڈیز کے دورے میں کسی کھلاڑی کو باقاعدہ نائب کپتان مقرر نہیں کیا گیا، تاہم ٹیم کی قیادت آغا سلمان کر رہے ہیں۔
ادھر ایشین کرکٹ کونسل نے ایشیا کپ 2025 کا شیڈول جاری کر دیا ہے۔ ایونٹ کا آغاز 9 ستمبر کو افغانستان اور ہانگ کانگ کے درمیان میچ سے ہوگا، جب کہ فائنل 28 ستمبر کو کھیلا جائے گا۔
پاکستان اپنا پہلا میچ 12 ستمبر کو عمان کے خلاف کھیلے گا، جب کہ روایتی حریف انڈیا کے خلاف بڑا ٹاکرا 14 ستمبر کو دبئی میں شیڈول ہے۔
ایونٹ میں کل 8 ٹیمیں شریک ہوں گی جنہیں دو گروپوں میں تقسیم کیا گیا ہے۔ گروپ اے میں پاکستان، انڈیا، عمان اور یو اے ای شامل ہیں، جب کہ گروپ بی میں سری لنکا، بنگلہ دیش، افغانستان اور ہانگ کانگ کی ٹیمیں شامل ہیں۔
مزید یہ کہ اگر پاکستان اور انڈیا دونوں سپر فور مرحلے میں پہنچ گئے تو ان کے درمیان دوسرا مقابلہ 21 ستمبر کو متوقع ہے۔
یاد رہے کہ پی سی بی کی جانب سے شاداب خان کی ری ہیب سے متعلق کوئی باضابطہ بیان تاحال جاری نہیں کیا گیا۔
