امریکی صدر ڈونلڈ ٹرمپ کا یہ دعویٰ درست ہے کہ جاپان اور یورپ میں امریکی گاڑیاں بہت کم خریدی جاتی ہیں، لیکن اس کی بڑی وجہ تجارتی رکاوٹیں نہیں بلکہ صارفین کی ترجیحات ہیں۔
ٹوکیو سے لے کر لندن تک، بیشتر خریدار امریکی گاڑیوں کو ضرورت سے زیادہ بڑی اور ایندھن زیادہ استعمال کرنے والی سمجھتے ہیں۔
یہی وجہ ہے کہ شہروں کی تنگ سڑکوں پر چھوٹی گاڑیوں کو ترجیح دی جاتی ہے، جہاں ٹویوٹا کرولا، ہونڈا سوک، ووکس ویگن گولف اور رینالٹ کلیو عام نظر آتی ہیں، جب کہ چیورلیٹ یا کیڈیلاک جیسی بڑی امریکی گاڑیاں خال خال دکھائی دیتی ہیں۔
ٹرمپ کئی بار شکایت کر چکے ہیں کہ جاپانی اور یورپی مارکیٹیں امریکی گاڑیوں کو قبول کرنے سے انکار کرتی ہیں، حالانکہ وہ خود امریکا میں ہر سال لاکھوں گاڑیاں فروخت کرتی ہیں۔
حالیہ تجارتی معاہدوں میں ان خطوں نے امریکی گاڑیوں پر حفاظتی جانچ کے کچھ تقاضے نرم کرنے پر آمادگی ظاہر کی ہے، جب کہ یورپ نے کچھ درآمدی محصولات میں بھی کمی کا وعدہ کیا ہے۔
لیکن صرف ضابطے اور ٹیرف میں تبدیلی ہی کافی نہیں، کیونکہ جاپانی اور یورپی صارفین کو امریکی گاڑیوں کا سائز، ایندھن کی کھپت اور تنگ سڑکوں پر ان کی کارکردگی جیسے عوامل پریشان کرتے ہیں۔
ٹوکیو میں امریکی پرانی گاڑیاں درآمد کرنے والے ایک مرکز “جونان جیپ پیتیت” کے صدر یومی ہیتو یاسوی نے بتایا کہ امریکی گاڑیاں بڑی سڑکوں اور ہائی وے پر چلنے کے لیے بنائی جاتی ہیں، اس لیے جاپان کی تنگ گلیوں میں انہیں سنبھالنا خاصا مشکل ہو سکتا ہے۔
ان کے گاہک عام طور پر 50 سے 60 سال کی عمر کے شوقین افراد ہوتے ہیں جنہوں نے بچپن میں امریکی فلموں یا ٹی وی پر یہ گاڑیاں دیکھی تھیں۔
یاسوی کا یہ کاروبار ان کے والد نے تقریباً چالیس سال قبل شروع کیا تھا، جو کیلیفورنیا جا کر گاڑیاں تلاش کرتے تھے۔ اب یاسوی سالانہ تقریباً 20 امریکی گاڑیاں فروخت کرتے ہیں۔
مزید پڑھیں: غزہ: اسرائیلی فائرنگ سے امداد لینے والے 38 فلسطینی شہید ہوگئے
ان کے مطابق امریکی گاڑیوں کا خاص پہلو ان کا ڈیزائن ہے۔ جاپانی یا جرمن گاڑیوں کے مقابلے میں ان کے جسم کی بناوٹ زیادہ خوبصورت ہوتی ہے، خاص طور پر ان کے پچھلے حصے اور فینڈرز کی لکیریں۔
جاپان میں گزشتہ برس تقریباً 37 لاکھ نئی گاڑیاں فروخت ہوئیں، جن میں سے ایک تہائی چھوٹی، کم ایندھن خرچ کرنے والی “کے کارز” تھیں، جو امریکی کمپنیوں کی پیشکش میں شامل نہیں۔
جاپانی آٹوموبائل مینوفیکچررز ایسوسی ایشن کے اعداد و شمار کے مطابق بیرونی کمپنیوں کی گاڑیاں صرف 6 فیصد فروخت کا حصہ بن سکیں۔ ان میں سے تقریباً 570 چیورلیٹس، 450 کیڈیلاک اور 120 ڈوج گاڑیاں فروخت ہوئیں۔
امریکی کار ساز کمپنی فورڈ تقریباً دس سال پہلے جاپانی مارکیٹ سے نکل گئی تھی۔ جبکہ ٹیسلا، جو امریکی ہے مگر نسبتاً پتلی اور جدید گاڑیاں بناتی ہے، وہاں مقبول ہو رہی ہے، تاہم دستیاب اعداد و شمار میں ٹیسلا کی فروخت کی الگ تفصیل موجود نہیں۔
