محکمہ موسمیات نے پیش گوئی کی ہے کہ آئندہ دنوں میں ملک کے مختلف حصوں میں گرج چمک کے ساتھ بارش کا امکان ہے، تاہم بیشتر میدانی علاقوں میں گرمی اور شدید حبس برقرار رہے گا۔
لاہور سمیت پنجاب کے اکثر علاقوں میں اگلے چند روز تک موسم کی شدت برقرار رہنے کی توقع ہے، البتہ 13 اگست سے ملک کے بالائی علاقوں میں بارش کا سلسلہ شروع ہونے کا امکان ہے جس کے دوران لاہور میں بھی ہلکی بارش ہو سکتی ہے۔
مشرقی پنجاب، خطۂ پوٹھوہار، بالائی خیبر پختونخوا، کشمیر اور پہاڑی سلسلوں میں بعض مقامات پر تیز ہواؤں اور گرج چمک کے ساتھ بارش متوقع ہے۔
اسلام آباد اور گردونواح میں گرمی اور نمی کی شدت برقرار رہے گی لیکن راولپنڈی، مری، گلیات، جہلم، اٹک، چکوال، سیالکوٹ، خوشاب، گجرات، گوجرانوالہ اور نارووال میں بارش کا امکان ظاہر کیا گیا ہے۔
خیبر پختونخوا میں سوات، دیر، بونیر، شانگلہ، کوہستان، بٹگرام، مانسہرہ، پشاور، ایبٹ آباد، مردان، مالاکنڈ، خیبر، باجوڑ، اورکزئی اور کوہاٹ میں بارش کی پیش گوئی کی گئی ہے۔
بلوچستان میں موسم گرم اور مرطوب رہنے کا امکان ہے جبکہ سندھ کے ساحلی علاقوں، خصوصاً کراچی میں بعض مقامات پر بارش کا امکان موجود ہے۔ آزاد کشمیر اور گلگت بلتستان میں بھی تیز ہواؤں کے ساتھ گرج چمک کی بارش ہو سکتی ہے۔
نوشہرہ اور اس کے مضافاتی علاقوں میں مسلسل بارش نے صورتحال کو سنگین بنا دیا ہے۔ ندی نالے بپھر گئے ہیں اور کئی گھروں و دکانوں میں پانی داخل ہو چکا ہے، بجلی کی فراہمی بھی متاثر ہوئی ہے۔
مزید پڑھیں: مودی نے فیلڈ مارشل عاصم منیر سے ملاقات سے بچنےکیلئے ٹرمپ کی دعوت قبول نہیں کی، بلوم برگ
ریلوے کالونی اور دیگر مقامات پر پانی گھروں تک پہنچ گیا ہے جبکہ ڈسپنسری بھی متاثر ہوئی ہے۔
گزشتہ 24 گھنٹوں کے دوران زیادہ تر علاقوں میں گرمی اور حبس رہا، تاہم اسلام آباد، شمال مشرقی پنجاب، خطۂ پوٹھوہار، کشمیر اور بالائی خیبر پختونخوا میں تیز ہواؤں اور گرج چمک کے ساتھ بارش ریکارڈ کی گئی۔
