پاکستان نے اسرائیلی قابض حکام کے حالیہ بیانات کو مسترد کرتے ہوئے کہا ہے کہ ’گریٹر اسرائیل‘ کے نام پر فلسطینیوں کو غزہ سے جبری بے دخلی کا منصوبہ بین الاقوامی قوانین، اقوام متحدہ کے چارٹر اور متعلقہ قراردادوں کی کھلی خلاف ورزی ہے۔
ترجمان دفتر خارجہ نے بیان میں کہا کہ یہ بیانات اسرائیل کے غیر قانونی قبضے کو مزید مضبوط کرنے اور خطے میں امن و استحکام کے لیے عالمی اقدامات کو نظرانداز کرنے کے عزم کو ظاہر کرتے ہیں۔
ترجمان نے کہا کہ عالمی برادری کو ان اشتعال انگیز تصورات کو فوراً مسترد کرنا چاہیے اور قابض طاقت کو مزید عدم استحکام پیدا کرنے سے روکنے کے لیے عملی اقدامات کرنے چاہییں۔
دفتر خارجہ کے مطابق اسرائیل کے یہ عزائم نہ صرف خطے میں امن کے لیے سنگین خطرہ ہیں بلکہ فلسطینی عوام پر جاری مظالم کو بڑھا سکتے ہیں۔ پاکستان نے ایک بار پھر فلسطینی عوام کے حق خودارادیت سمیت تمام جائز حقوق کی مکمل حمایت کا اعادہ کیا، جس میں 1967 سے پہلے کی سرحدوں پر مبنی ایک آزاد، قابل عمل اور متصل فلسطینی ریاست کا قیام شامل ہے، جس کا دارالحکومت القدس الشریف ہو۔
