اسٹاک ایکسچینج آج بھی بینچ مارک 100 انڈیکس ایک لاکھ 50 ہزار پوائنٹس کی سطح عبور کرگیا ہے۔
پاکستان اسٹاک ایکسچینج میں آج کاروباری ہفتے کے دوران زبردست تیزی دیکھنے میں آئی ہے جہاں ہنڈریڈ انڈیکس 650 پوائنٹس سے زائد اضافے کے ساتھ ایک لاکھ 50 ہزار 400 پوائنٹس کی تاریخی بلند ترین سطح پر پہنچ گیا ہے۔
مارکیٹ میں سرمایہ کاروں کا اعتماد بحال ہوتا دکھائی دیا ہے جس کی وجہ معاشی اشاریوں میں بہتری اور سیاسی استحکام کی امیدیں اور ملکی مالیاتی پالیسیوں پر مثبت ردِعمل بتایا جا رہا ہے۔ تیزی کے اس رجحان نے نہ صرف سرمایہ کاروں کو متحرک کیا بلکہ مارکیٹ میں کاروباری حجم میں بھی خاطر خواہ اضافہ دیکھنے میں آرہا ہے۔
مارکیٹ ماہرین کے مطابق اسٹاک ایکسچینج کا یہ ریکارڈ لیول ملکی معیشت کے لیے ایک مثبت سگنل ہے تاہم آئندہ دنوں میں معاشی فیصلے اور عالمی مالیاتی رجحانات اس رفتار کو متاثر کر سکتے ہیں۔
واضح رہے کہ گزشتہ روز پاکستان اسٹاک ایکسچینج میں کاروباری ہفتے کے دوسرے روز 100 انڈیکس پہلی بار ایک لاکھ 50 ہزار پوائنٹس کی حد عبور کر گیا تھا۔
دن کے آغاز پر سرمایہ کاروں کی بھرپور خریداری کے باعث انڈیکس میں دو ہزار 127 پوائنٹس کا اضافہ ہوا اور ایک لاکھ 50 ہزار 323 کی سطح تک پہنچ گیا۔ تاہم دن کے اختتام پر کچھ پرافٹ ٹیکنگ کے بعد انڈیکس ایک لاکھ 49 ہزار پر بند ہوا تھا۔
بازار میں 482 کمپنیوں کے 80 کروڑ سے زائد شیئرز کا 48 ارب روپے سے زائد مالیت کا کاروبار ہوا۔
جولائی 2023 میں 100 انڈیکس 40 ہزار تھا جو اب دو سال میں بڑھ کر ایک لاکھ 50 ہزار سے تجاوز کر چکا ہے۔ سب سے زیادہ شیئر بینکنگ سیکٹر کا رہا جب کہ فرٹیلائزر، آئل اینڈ گیس اور سیمنٹ سیکٹر بھی نمایاں رہے۔
