”پنجاب دھی رانی پروگرام“ کے تحت دوسرے مرحلےکا آغاز ہوگیا۔
دوسرے مرحلے میں مزید 1500 شادیاں کرائی جائیں گی جس کے لیے درخواستیں گھر بیٹھے جمع کرائی جا سکتی ہیں۔ پنجاب حکومت کی ویب سائٹ پر جا کر شادی کی درخواست دی جا سکتی ہے۔
پنجاب حکومت نے “پنجاب دھی رانی پروگرام“ کے بارے میں معلومات کے لئے 1312ہیلپ لائن بھی قائم کی ہوئی ہے۔ اس کے علاوہ درخواستیں ڈپٹی ڈائریکٹر سوشل ویلفیئر کے ضلعی آفس میں بھی جمع کرائی جا سکتی ہیں۔
اس پروگرام کے تحت لڑکیوں کو جہیز، شادی کا کھانا اور نئے شادی شدہ جوڑوں کو اے ٹی ایم کے ذریعے ایک لاکھ روپے سلامی بھی دی جائے گی۔ پروگرام کے تحت دُلہا دُلہن کو فرنیچر اور کپڑوں سمیت دیگر ضروری سازو سامان کے تحائف بھی پیش کئے جائیں گے ۔
وزیراعلیٰ پنجاب مریم نواز نے کہا کہ” پنجاب کی ہر بیٹی سے محبت ہے، گھر بسانے پر دلی خوشی ہوتی ہے ، معاشرے کے نادار اور محروم طبقات کا احساس حکومت کی ذمہ داری ہے، ہر ذمہ داری اچھی طرح نبھائیں گے، بیٹیوں کے سر پر دست شفقت رکھنا پنجاب کی ریت ہے”۔
یاد رہے کہ “پنجاب دھی رانی پروگرام“ کے مطابق اس سال کُل 3000 لڑکیوں کی شادیاں کرائی جائیں گی۔ جن میں سے 1500 شادیاں پہلے مرحلے میں ہو چکی ہیں اور 1500 شادیوں کے دوسرے مرحلے کے لیے درخواستیں دی جا رہی ہیں۔
پہلے مرحلے میں کی جانے والے شادیوں میں عیسائی اور اسپیشل جوڑے بھی شامل تھے۔
حکومت کی جانب سے ایسے اقدامات قابل تعریف ہیں۔ ایسے اقدامات عوام کو یہ احساس دلاتے ہیں کہ وہ اکیلے نہیں ہیں بلکہ حکومت اس کے ساتھ ہے۔
