پاکستان تحریک انصاف (پی ٹی آئی) کے ایم این اے اور پارٹی صدر برائے خیبرپختونخوا جنید اکبر نے عمران خان کے حکم سے پبلک اکاؤنٹس کمیٹی (پی اے سی) کے چیئرمین کے عہدے سے استعفیٰ دے دیا ہے۔
جنید اکبر نے کہا کہ انہوں نے اپنا استعفیٰ پی ٹی آئی کے چیئرمین بیرسٹر گوہر علی خان کے حوالے کر دیا ہے، ان کا کہنا تھا کہ یہ عہدہ پارٹی کی طرف سے دی گئی امانت ہے اور وہ اس کی ہدایات کے مطابق استعفیٰ دے رہے ہیں، پی ٹی آئی کے بانی عمران خان جو بھی فیصلہ کریں گے وہ قبول کریں گے۔
واضح رہے کہ پی ٹی آئی کے بانی عمران خان کی بہن علیمہ خان نے نجی نشریاتی ادارے سےگفتگو میں بتایا تھا کہ ان کی بہنوں نے گزشتہ دنوں پی ٹی آئی کے بانی سے ملاقات کی تھی۔
ان کے مطابق انہیں جنید اکبر کے استعفیٰ کے حوالے سے ایک پیغام موصول ہوا تھا جو پی ٹی آئی کے سیکرٹری جنرل سلمان اکرم راجہ اور سینئر رہنما عمر ایوب کو پہنچا دیا گیا تھا۔
پارلیمنٹ ہاؤس کے باہر صحافیوں سے بات کرتے ہوئے بیرسٹر گوہر نے کہا کہ انہیں گزشتہ رات پی ٹی آئی کے بانی کی بہن نےجنید اکبر سے متعلق ہدایت سے آگاہ کیا تھا۔
انہوں نے صورتحال کو پارٹی کا اندرونی معاملہ قرار دیتے ہوئے مزید کہا کہ جب بھی پارٹی بانی کی طرف سے کوئی ہدایت آتی ہے تو اس پر عمل کیا جاتا ہے۔ انہوں نے یقین ظاہر کیا کہ ان ہدایات کے مطابق مسئلہ جلد حل ہو جائے گا۔
پارٹی کے اندر پس منظر کی بات چیت نے اس بات کی تصدیق کی کہ عمران خان نے جنید اکبر کو ہدایت کی تھی کہ وہ اپنے پی اے سی کے عہدے سے مستعفی ہو جائیں اور صرف اور صرف پارٹی امور پر توجہ دیں،
اندرونی ذرائع نے مشورہ دیا کہ جنید اکبر کے دوہرے کردار کو ایک رکاوٹ کے طور پر دیکھا گیا، اور پارٹی کے بانی چاہتے تھے کہ وہ تنظیمی ذمہ داریوں پر زیادہ توجہ دیں۔
واضح رہے کہ جنید اکبر جنوری میں پی اے سی کے چیئرمین کے طور پر بلامقابلہ منتخب ہوئے تھے اور ساتھ ہی انہیں وزیراعلیٰ علی امین گنڈا پور کی جگہ صوبائی پارٹی صدر مقرر کیا گیا تھا۔ قیاس آرائیاں عروج پر ہیں کہ عمر ایوب کو پی اے سی کا اگلا چیئرمین مقرر کیا جا سکتا ہے۔
