یوکرین کے صدر زیلنسکی اور برطانیہ کے وزیرِاعظم کیئر اسٹارمر نے پیر کے روز لندن میں ایک نئے دفاعی تعاون کے معاہدے کا اعلان کیا۔ یہ اعلان زیلنسکی کے مختصر دورۂ لندن کے دوران کیا گیا، جس کا مقصد یوکرین کے دفاع اور روس کے خلاف جنگ میں برطانیہ کی مدد پر بات چیت کرنا تھا۔
یہ اعلان وزیرِاعظم ہاؤس (ڈاؤننگ اسٹریٹ) کے باغ میں کیا گیا، جہاں دونوں رہنماؤں نے برطانیہ میں تربیت حاصل کرنے والے یوکرینی فوجیوں سے بھی ملاقات کی۔
کیئر اسٹارمر نے کہا کہ انہیں فخر ہے کہ وہ یوکرین کے ساتھ ایک نیا ملٹری کو-پروڈکشن معاہدہ کر رہے ہیں، جو اپنی نوعیت کا پہلا معاہدہ ہے اور دونوں ممالک کے درمیان فوجی شراکت داری کو ایک نیا رخ دے گا۔
زیلنسکی نے اسٹارمر کے ساتھ کھڑے ہو کر کہا کہ یہ معاہدہ دونوں ممالک کو مضبوط بنائے گا، اور روس کے خلاف جنگ میں برطانیہ کی مسلسل حمایت پر شکریہ ادا کیا۔
وزیرِاعظم کے دفتر کے بیان کے مطابق، اس معاہدے کے تحت میدانِ جنگ میں استعمال ہونے والی ٹیکنالوجی کو شیئر کیا جائے گا، جس سے یوکرین کی ڈرون ٹیکنالوجی میں ترقی ہوگی اور برطانوی دفاعی صنعت کو یوکرین کے جنگی تجربات سے فائدہ اٹھانے کا موقع ملے گا۔
یہ معاہدہ تین سال پر محیط ہو گا۔ اس سے قبل، جنوری میں اسٹارمر نے کیف کا دورہ کیا تھا، جہاں دونوں ممالک نے اگلے 100 سال کے لیے سیکورٹی اور ثقافتی شراکت داری کو مضبوط بنانے کا اعلان کیا تھا۔
ملاقات کے بعد جاری کیے گئے سرکاری بیان میں کہا گیا ہے کہ دونوں رہنماؤں نے اس بات پر اتفاق کیا کہ ’رضامندوں کا اتحاد‘ جس کی قیادت برطانیہ اور فرانس کر رہے ہیں، جلد ایک ورچوئل اجلاس منعقد کرے گا تاکہ اراکین کو تازہ ترین صورتحال سے آگاہ کیا جا سکے۔ اس اتحاد میں امریکا شامل نہیں ہے۔
اسی روز، زیلنسکی نے ونڈسر کاسل میں بادشاہ چارلس سے بھی ملاقات کی، جو اس سال ان کی تیسری ملاقات تھی۔ دونوں نے ہاتھ ملایا اور یوکرین کے لیے برطانیہ کی حمایت پر بات چیت کی۔
زیلنسکی نے برطانوی پارلیمنٹ کے دونوں ایوانوں کے اسپیکروں سے بھی ملاقات کی۔
