واشنگٹن فریڈم نے میجر لیگ کرکٹ (ایم ایل سی) 2025 کے ایک سنسنی خیز مقابلے میں لاس اینجلس نائٹ رائیڈرز کو آخری گیند پر شکست دے دی۔ یہ میچ 26 جون کو کھیلا گیا، جس میں نائٹ رائیڈرز نے پہلے بیٹنگ کرتے ہوئے 213 رنز کا بڑا ہدف دیا، تاہم فریڈم نے یہ ہدف آخری گیند پر عبور کرلیا۔
نائٹ رائیڈرز کی جانب سے آندرے فلیچر نے 60 گیندوں پر 104 رنز بنائے اور ریٹائرڈ آؤٹ ہوئے۔ ان کے علاوہ انموکت چند نے 30 گیندوں پر 41 رنز، شیرفین ردرفورڈ نے 11 گیندوں پر 20 رنز اور آندرے رسل نے 13 گیندوں پر ناقابلِ شکست 30 رنز بنائے۔ نائٹ رائیڈرز نے اپنی اننگز 213 رنز 4 وکٹوں کے نقصان پر مکمل کی۔
جواب میں، واشنگٹن فریڈم نے جارحانہ آغاز کیا۔ مچل اووین نے 16 گیندوں پر 43 رنز بنائے جبکہ راچن رویندرا نے 12 گیندوں پر 18 رنز جوڑے۔ انڈریز گوس نے 27 گیندوں پر 31 رنز بنائے اور گلین میکسویل نے 23 گیندوں پر 42 رنز کی اننگز کھیلی۔ اختتامی لمحات میں گلین فلپس نے ناقابلِ شکست 33 رنز بنائے۔
میچ کا فیصلہ آخری اوور میں ہوا جب فریڈم کو سات رنز درکار تھے۔ آندرے رسل نے پہلا گیند وائیڈ کیا، جس کے بعد اوبس پینار نے چوکا مارا۔ پھر مسلسل تین گیندوں پر کوئی رن نہ بن سکا، لیکن آخری دو گیندوں پر ایک، ایک رن لے کر فریڈم نے فتح حاصل کرلی۔
یہ فتح واشنگٹن فریڈم کی پوائنٹس ٹیبل پر دوسری پوزیشن حاصل کرنے میں مددگار ثابت ہوئی، جبکہ نائٹ رائیڈرز پانچویں نمبر پر برقرار ہے۔ فریڈم نے حالیہ دنوں میں ایم ایل سی کی تاریخ کا سب سے بڑا ہدف بھی حاصل کیا تھا، اور یہ کامیابی اس سلسلے کی توسیع قرار دی جا رہی ہے۔
