مظفرگڑھ میں تھانہ سٹی کوٹ ادو پولیس نے کم عمر بچی سے نا معلوم ملزم کی طرف سے زیادتی اور اغوا کی واردات میں بڑی پیشرفت کرتے ہوئے مرکزی ملزم کو گرفتار کرلیا ہے۔
ترجمان مظفرگڑھ پولیس نے کہا ہے کہ 10 سالہ بچی کے اغوا و زیادتی کے نامعلوم ملزم کو ٹریس کر لیا ہے، درندہ صفت ملزم نے معصوم بچی کو اغواء کرنے کے بعد زیادتی کا نشانہ بنایا۔
ترجمان مظفرگڑھ پولیس کہا ہے کہ ملزم کو پولیس نے پیشہ وارانہ مہارت و جدید ٹیکنالوجی کی مدد سے ٹریس کیا، جس کے بعد ملزم کو گرفتار کرلیا گیا۔
پولیس کا کہنا ہے کہ ملزم نے معصوم بچی کو آم کھلانے کے لیے باغ میں بلا کر زیادتی کا نشانہ بنایا تھا۔
واضح رہے کہ یاد رہے کہ متاثرہ بچی کے والد نے 9 جولائی کو مقدمہ درج کروایا تھا، بچی کے والد سیکیورٹی گارڈ کی ملازمت کرتے ہیں۔
بچی کے والد نے پولیس کو بتایا تھا کہ وہ سودا سلف لینے نکلی تھی، سر راہ اسے ایک نا معلوم شخص نے ورغلاتے ہوئے کہا تھا کہ ’میں تمہارے والد کا دوست ہوں اور آم کی پیٹی انہیں بھیجنی ہے، یہ سن کر بچی اس شخص کے ساتھ چلی گئی، مگر میرے گھر پہنچنے پر بچی واپس نہ آئی تو چند لوگوں کے ساتھ اسے ڈھونڈنے نکلا، جو ہمیں فرمان والا کے قریب سڑک سے ملی۔
مزید پڑھیں: ڈیرہ غازی خان انتظامیہ نے بلوچستان میں رات کے وقت داخلے پر پابندی عائد کردی
والد نے مقدمے میں لکھوایا کہ بچی نے ساری بات اور اپنے ساتھ ہونے والی زیادتی کا بتایا، جس کے بعد میں تھانے میں رپورٹ درج کروانے آیا ہوں، کارروائی کی جائے۔
ڈی پی او ڈاکٹر محمد رضوان خان نے ایس ڈی پی او عبدالغفار خان، ایس ایچ او ساجد فیاض اور انچارج جینڈر کرائم سعیدہ خالق کو نقد انعام اور تعریفی لیٹر کا اعلان کیا ہے۔
