سماجی رابطے کی سائٹ ایکس (سابقہ ٹوئٹر) پر ویڈیو پیغام جاری کرتے ہوئے پاکستان تحریکِ انصاف کے سینیٹر اعظم سواتی نے شہباز گل کے الزامات کی تردید کرتے ہوئے اپنے گھر کی فروخت کے معاملات کی تفصیل پیش کی ہے۔
پی ٹی آئی رہنما نے انکشاف کیا ہے کہ شہباز گل نے سب سے پہلے عمران خان کو دھوکہ دیا اور اس نے ایجنسیوں کو ایسی ایسی باتیں بنا کر بتائیں، جس کا عمران خان اور اس کے فرشتوں کو بھی علم نہیں تھا۔
اپنے جاری کردہ ویڈیو پیغام میں اعظم سواتی کا کہنا تھا کہ میرا آج کا یہ ویڈیو پیغام میرے ایبٹ آباد کے گھر سے متعلق شہباز گل کے جھوٹے الزامات اور من گھڑت بیانات کی تردید اور حقائق سے منسوب ہے، شہباز گل تو جان بوجھ کر لوگوں کو من گھڑت الزامات کے ذریعے لوگوں کو بلیک میل کرتے ہیں۔
انہوں نے کہا ہے کہ مکان بیچنے کے حقائق بتاتا ہوں، میرا یہ گھر ایبٹ آباد میں واقعہ ہے، جو اپنی خوبصورتی اور تعلیمی اداروں کی وجہ سے پاکستان کا ہارورڈ کہلاتاہے۔ حبیب اللہ قانونی اور کاکول اکیڈمی ایک دوسرے کے ساتھ جڑے ہوئے ہیں، ان کے درمیان ایک اونچی دیوار ہے، جو ان دونوں کو الگ کرتی ہے۔
اعظم سواتی کا کہنا ہے کہ ایبٹ آباد میں دو پوش ہاوسنگ سوسائٹیاں ہیں، جو 80 کی دہائی میں بنائی گئیں، جن میں جناح کالونی اور دوسری حبیب اللہ کالونی ہے۔ یہ مکان 210 مرلے پر مشتمل ہے، ڈیڑھ سال قبل حبیب اللہ کالونی کے مین روڈ پر ایک مرلہ کی قیمت 25 سے 30 لاکھ روپے تھی، اب 30 لاکھ کو 210 سے ضرب دیں تو نیتجہ آپ کے سامنے ہوگا۔
انہوں نے کہا کہ یہ تین منزلہ مکان ہے، پورے گھر میں ماربل لگاہواہے، شہباز گل صاحب 400 یا 500 ڈالر خرچ کریں اور اپنے کسی دلال کو وہاں بھیجیں۔
سینیٹر اعظم خان سواتی کا شہباز گل کی طرف سے عائد الزامات پر جواب pic.twitter.com/DPwkqX8sTO
— Senator Azam Khan Swati (@AzamKhanSwatiPk) July 23, 2025
شہباز گل کو خبردار کرتے ہوئے اعظم سواتی کا کہنا تھا کہ یاد کریں آپ نے غلط آدمی کو للکارا ہے، اگر تم نہیں کروگے تو ایبٹ آباد کے شرفاء اور لوکل باڈیز کے لوگوں سے انشاء اللہ ویڈیوز بنواؤں گا اور ان کو حلف دوں گا کہ بتائیں کہ ڈیڑھ سال قبل خالی زمین کی قیمت کتنی تھی؟ پھر میں تمہیں کہتا ہوں کہ تم کو معافی معانگنی پڑے گی۔
ان کا کہنا تھا کہ اس لیے جس شخص پر تم نے جھوٹا الزام لگایاہے، کتنی وزارتوں کی میں نے سربراہی کی ہے، میرے چپڑاسی بھائی باہر سے بیٹھ کر نہیں بلکہ اندر آکر ان سیکٹریوں سے میری ایمانداری کی باتیں پوچھو۔
پی ٹی آئی رہنما نے کہا ہے کہ شہباز گل صاحب اور نعیم الحق کی وفات کے بعد عمران خان نے تمہیں وہ عہدہ دیا، جس کے تم قابل نہیں تھے، لیکن تم آستین کے سانپ نکلے۔ کہاوت ہے کہ گھر کا بھیدی لنکا ڈھائے، تم وہ پہلے مجرم ہو، جس نے عمران خان کا بھیدی ہونے کی حیثیت سے اسے دھوکہ دیا، تم نے ایجنسیوں کو ایسی باتیں کی، جس کا عمران خان اور اس کے فرشتوں کو بھی علم نہیں تھا۔
ان کا کہنا تھا کہ یہ بات عمران خان نے خالی مجھ سے نہیں کی بلکہ پارٹی کے اور بھی بہت سے لوگوں کو اس کا علم ہے، تم جیل میں رہے، پمز میں رہے یا سی آئی اے کے لاک اپ میں رہے، ڈر اور خوف کے کرتوت، ہر ایک کی زبان پر ہیں۔
شہباز گل کو مخاطب کرتے ہوئے اعظم سواتی کا کہنا تھا کہ گل صاحب آج پارٹی کے اندر جو لوگوں پر تم جھوٹے الزامات لگا کر تنقید کر رہے ہو، خدا جانے کس کے ایجنڈے کی تکمیل ہو رہی ہے، تم اپنی چرب زبانی سے ملک پاکستان کو نقصان پہنچا رہے ہو۔
ان کا کہنا تھا کہ بڑے شرم کی بات ہے، امریکا میں رہنے والے سادہ لوگ اور عمران خان سے محبت کرنے والے لوگوں کو جو فیری ٹیل کی کہانیاں سناتے ہو، لوگوں سے عمران خان کی والہانہ محبت کے طفیل ان کی قربت حاصل کرتے ہو، مجھ کو شرم محسوس ہوتی ہے کہ تم نے عمران خان کے اعتماد کو سب سے پہلے ٹھیس پہنچائی۔
پی ٹی آئی رہنما نے کہا ہے کہ تم نے میرے لیڈر کو دھوکہ دیاہے، میں تمہیں دعوت دیتاہوں کہ پاکستان کو تباہی کے دہانے پر پہنچانے کی بجائے آؤ پاکستان کے اندر، ہمارے ساتھ اس تحریک میں شامل ہو، جو میرے لیڈر عمران خان کی رہائی کی تحریک ہے۔
انہوں نے کہا ہے کہ اگر ڈر خوف اور بزدلی تمہاری زندگی کا حصہ نہیں ہے تو میرے چیلنج کو قبول کرو، پاکستان کو تباہ کرنے کی کوشش کرنا چھوڑ دو میں منتظر رہوں گا کہ کب تم گھر کی صحیح فروخت کی تحقیق مکمل کرتے ہو، اگر تم نے غلطی کی ہے تو شرمندہ ہونے کی ضرورت نہیں، معافی مانگ لو۔
