قومی بچت اسکیموں پر شرح منافع میں کمی کر دی گئی ہے۔ وزارت خزانہ نے نئے منافع کی شرح کا نوٹیفکیشن جاری کر دیا ہے۔
نوٹیفکیشن کے مطابق اسپیشل سیونگ سرٹیفکیٹ اور اسپیشل سیونگ اکاؤنٹس پر سالانہ منافع 10.6 فیصد سے کم ہو کر 10.4 فیصد کر دیا گیا ہے۔
اسی طرح بہبود سیونگ سرٹیفکیٹ پنشنرز بینیفٹ اور شہدا فیملی ویلفیئر اکاؤنٹ کی شرح منافع 13.20 فیصد سے کم ہو کر 12.96 فیصد مقرر کی گئی ہے۔
ڈیفنس سیونگ سرٹیفکیٹ پر نو سال کا مجموعی منافع 162 فیصد سے کم ہو کر 161 فیصد ہو گیا ہے جبکہ دسویں سال کی شرح منافع 204 فیصد کے بجائے 200 فیصد دی جائے گی۔
ریگولر انکم سرٹیفکیٹ پر بھی منافع کم کر دیا گیا ہے تاہم سیونگ اکاؤنٹ پر موجودہ 9.50 فیصد شرح منافع برقرار رکھی گئی ہے۔
وزارت خزانہ کے مطابق شارٹ ٹرم سیونگ سرٹیفکیٹ پر بھی منافع میں کمی کی گئی ہے۔
دوسری جانب سروا اسلامک ٹرم اکاؤنٹ اور اسلامک سیونگ اکاؤنٹ پر شرح منافع میں اضافہ کیا گیا ہے۔
نئے منافع کی شرحوں کا اطلاق تمام قومی بچت مراکز میں یکساں طور پر ہوگا۔ حکومتی ذرائع کا کہنا ہے کہ شرح منافع میں تبدیلی مالیاتی پالیسی میں توازن اور مارکیٹ کی موجودہ صورتحال کو مدنظر رکھتے ہوئے کی گئی ہے۔
واضع رہے کہ وزیرخزانہ کی طرف سے جاری کردہ نوٹیفیکیشن کے مطابق قومی بچت اسکیموں کی شرح منافع میں کمی کا اطلاق 28 جولائی 2025 سے ہوگا۔
