وزارت مذہبی امور و بین المذاہب ہم آہنگی نے حج 2026 کے لیے درخواستوں کی وصولی کا آغاز کر دیا ہے۔
ترجمان محمد عمر بٹ کے مطابق شہری آج سے نامزد بینکوں اور سرکاری آن لائن پورٹل کے ذریعے اپنی درخواستیں جمع کروا سکتے ہیں۔
درخواستوں کی جانچ اور ابتدائی قسط جمع کرانے کا مرحلہ چار اگست سے نو اگست تک جاری رہے گا اور یہ مکمل طور پر پہلے آئیے، پہلے پائیے کی بنیاد پر ہوگا۔
اگر اس دوران کچھ نشستیں باقی رہ گئیں تو نئے درخواست گزار گیارہ اگست سے سولہ اگست تک درخواست دے سکیں گے۔ تاہم جیسے ہی تمام نشستیں مکمل ہو جائیں گی، مزید درخواستیں اور رقوم وصول نہیں کی جائیں گی۔
وزارت کے مطابق حج 2026 کا متوقع پیکیج گیارہ لاکھ پچاس ہزار سے بارہ لاکھ پچاس ہزار روپے کے درمیان ہوگا، جس میں قربانی کی رقم بھی شامل ہے۔ اس رقم کی دوسری قسط یکم نومبر 2025 سے وصول کی جائے گی۔
مزید جانیں: ایرانی صدر کی وزیراعظم ہاؤس میں آمد، چاق و چوبند دستے نے گارڈ آف آنر پیش کیا
اس سال ایک اہم پالیسی تبدیلی بھی کی گئی ہے، جس کے تحت عمر کی بالائی حد اور ایک سے زائد بار حج پر جانے کی پابندیاں ختم کر دی گئی ہیں تاکہ زیادہ سے زیادہ افراد کو موقع مل سکے۔ تاہم، یکم مارچ 2014 کے بعد پیدا ہونے والے بچے حج کے لیے اہل نہیں ہوں گے۔
ترجمان نے خواہشمند افراد کو مشورہ دیا کہ وہ بروقت اپنی درخواستیں جمع کروا کر اپنی نشستیں محفوظ کریں تاکہ وہ حج 2026 کی سعادت حاصل کر سکیں۔
