آذربائیجان نے پاک فوج کے چیف آف آرمی اسٹاف فیلڈ مارشل سید عاصم منیر کو اپنے اعلیٰ ترین پیٹریاٹک وار میڈل سے نوازا ہے۔
یہ اعزاز انہیں فوجی تعاون کے شعبے میں نمایاں خدمات کے اعتراف میں صدر الہام علیوف کی جانب سے دیا گیا۔
ڈان نیوز کے مطابق فیلڈ مارشل عاصم منیر سے آذربائیجان کے نائب وزیر دفاع اور چیف آف جنرل اسٹاف کرنل جنرل کریم نے ملاقات کی۔
پاک فوج کے شعبہ تعلقات عامہ (آئی ایس پی آر) کے مطابق اس موقع پر باہمی دلچسپی کے امور اور علاقائی سکیورٹی پر تبادلہ خیال کیا گیا۔
ملاقات میں دفاعی تعاون بڑھانے اور خطے میں امن و استحکام کے لیے مشترکہ کوششوں پر بھی اتفاق ہوا۔
فیلڈ مارشل عاصم منیر نے آذربائیجان اور آرمینیا تنازع کے پرامن حل پر مبارک باد پیش کی اور آذربائیجان کے ساتھ مثالی تعلقات کو مزید مضبوط بنانے کے عزم کا اظہار کیا۔
مزید پڑھیں: ملک کی معاشی ترقی کے لیے خواتین ہماری افرادی قوت کا حصہ ہیں، شہباز شریف
انہوں نے معرکہ حق کے دوران آذربائیجان کی یکجہتی اور یوم آزادی کی تقریب میں شرکت پر شکریہ بھی ادا کیا۔
آذربائیجان کے نائب وزیر دفاع نے پاک فوج کی پیشہ ورانہ صلاحیتوں، آپریشن بنیان مرصوص کی کامیابی، اور دہشت گردی کے خلاف پاکستان کی کوششوں کو سراہا۔
انہوں نے یوم آزادی اور فتح کی تقریبات کے لیے نیک خواہشات کا اظہار بھی کیا۔
