حماس نے تصدیق کی ہے کہ غزہ کی پٹی میں اس کے سربراہ خلیل الحیہ زندہ ہیں، وہ قطر میں سکیورٹی انتظامات کے تحت اپنے بیٹے کی نماز جنازہ میں شریک ہوئے تھے۔
تحریک حماس نے ایک بیان میں کہا کہ خلیل الحیہ نے اپنے بیٹے ہمام الحیہ اور دوحہ میں اسرائیلی حملے میں شہید ہونے والے دیگر افراد کی نماز جنازہ ادا کی، یہ سب کچھ قطر میں سکیورٹی انتظامات کے بعد کیا گیا۔
واضح رہے کہ اس سے قبل کچھ تصاویر سامنے آئیں تھیں، جن میں قطر پر اسرائیلی حملے میں ہدف بنائے گئے۔ حماس کے کچھ رہنما دوحہ میں جاں بحق ہونے والوں کے جنازے میں دیکھے گئے تھے۔
مزید پڑھیں: اسرائیل کے ایک بار پھر غزہ پر فضائی حملے، مزید 59 فلسطینی شہید ہوگئے
ان تصاویر میں حماس کے رہنما اسامہ حمدان، تحریک کے سیاسی دفتر کے رکن عزت الرشق اور حسام بدران بھی قطری دارالحکومت پر حملے کے بعد موجود تھے۔ تاہم خلیل الحیہ تصاویر میں نظر نہیں آئے، جس سے ان کے زخمی یا جاں بحق ہونے کے بارے میں قیاس آرائیاں شروع ہو گئی تھیں۔
یاد رہے کہ جمعرات کو حماس نے خلیل الحیہ کے بیٹے، ان کے دفتر کے ڈائریکٹر اور تین ساتھیوں کی اسرائیلی حملے میں شہید ہونے کی اطلاع دی تھی۔
حماس نے باضابطہ طور پر اعلان کیا تھا کہ قطر میں اس کی قیادت کو نشانہ بنانے والا حملہ ناکام رہا اور اس حملے میں چھ افراد شہید ہوئے جن میں حماس کے رہنما خلیل الحیہ کا بیٹا بھی شامل تھا۔
