پاکستان کرکٹ ٹیم کی آج شام دبئی میں ہونے والی پریس کانفرنس منسوخ کر دی گئی ہے۔
ٹیم ذرائع کے مطابق کھلاڑیوں کو اس پریس کانفرنس میں شام ساڑھے سات بجے شرکت کرنا تھی لیکن اب اسے منسوخ کر دیا گیا ہے۔
ذرائع کا کہنا ہے کہ پاکستانی کرکٹ ٹیم کی پریکٹس پروگرام کے مطابق آج رات نو بجے ہو گی تاہم اگر حالات میں کوئی تبدیلی آئی تو پریکٹس بھی منسوخ کی جا سکتی ہے۔
اس وقت ٹیم ایشیا کپ میں متحدہ عرب امارات کے خلاف میچ کے لیے تیار ہو رہی ہے جو کل کھیلا جائے گا۔
پاکستان کرکٹ بورڈ ‘پی سی بی’ کی جانب سے ایک اہم بات یہ سامنے آئی ہے کہ عالمی کرکٹ کونسل ‘آئی سی سی’ نے پاکستان کرکٹ بورڈ کے میچ ریفری اینڈی پائی کرافٹ کو ہٹانے کے مطالبے کو مسترد کر دیا ہے۔
ذرائع کا کہنا ہے کہ آئی سی سی نے پی سی بی کے اس مطالبے کو مسترد کرنے کے فیصلے سے بورڈ کو باضابطہ طور پر آگاہ کر دیا ہے جس کے بعد پی سی بی نے اس معاملے پر حکومت سے مشاورت کرنے کا ارادہ کیا ہے۔
پی سی بی چیئرمین محسن نقوی کے حکومتی عہدیداروں سے آج مشاورت متوقع ہے۔
اس کے علاوہ پی سی بی کا یہ بھی کہنا ہے کہ پاکستان کرکٹ بورڈ پاک انڈیا میچ کے ریفری کو ہٹانے کے مطالبے پر آئی سی سی کے فیصلے پر جلد اپنا مؤقف سامنے لائے گا۔
واضع رہے کہ پی سی بی ایشیا کپ کے حوالے سے جلد فیصلہ کرے گا اور اگلے چند گھنٹوں میں اس بارے میں اپنا مؤقف پیش کرے گا۔
ذرائع کا یہ بھی کہنا ہے کہ اگر پاکستان کا مطالبہ نہ مانا گیا تو پاکستان کرکٹ ٹیم ایشیا کپ سے دستبردار ہو سکتی ہے۔
حکومت اور پی سی بی کے درمیان مشاورت کے بعد آئندہ کے لائحہ عمل کا تعین کیا جائے گا۔
