پاکستانی وزیر داخلہ کی سربراہی، انڈیا کا ایشین کرکٹ کونسل سے علیحدگی کا اعلان
انڈین میڈیا رپورٹس کے مطابق انڈین کرکٹ کنٹرول بورڈ (بی سی سی آئی) نے ایشین کرکٹ کونسل (اے سی سی) کے تمام ایونٹس سے علیحدگی اختیار کرنے کا فیصلہ کیا ہے۔ اس فیصلے کے تحت انڈیا ویمنز ایمرجنگ ٹیمز ایشیا کپ میں شرکت نہیں کرے گا، جو آئندہ ماہ سری لنکا میں شیڈول ہے، اور ساتھ ہی وہ ستمبر میں ہونے والے مینز ایشیا کپ میں بھی شامل نہیں ہوگا۔ رپورٹس کے مطابق بی سی سی آئی نے اے سی سی کو مطلع کر دیا ہے کہ انڈین ٹیم ان ایونٹس میں حصہ نہیں لے گی، کیونکہ اس وقت اے سی سی کی سربراہی پاکستان کے وزیر داخلہ کر رہے ہیں جو بیک وقت پاکستان کرکٹ بورڈ (پی سی بی) کے چیئرمین بھی ہیں۔ انڈین بورڈ کا مؤقف ہے کہ وہ ایسے ٹورنامنٹ میں نہیں کھیل سکتا جس کی نگرانی ایک پاکستانی وفاقی وزیر کرے۔ یہ بھی پڑھیں: انڈین شہر حیدرآباد میں شدید آگ، چھ بچوں سمیت 17 افراد ہلاک ہوگئے انڈین میڈیا نے ذرائع کے حوالے سے کہا کہ بی سی سی آئی کی یہ پالیسی پاکستان کرکٹ کو عالمی سطح پر تنہا کرنے کی حکمت عملی کا حصہ ہے۔ ان کے مطابق یہ ایک قومی جذبے کا اظہار ہے، اور اس پالیسی کے تحت بی سی سی آئی حکومت سے مسلسل مشاورت میں ہے۔ اس پیش رفت سے ستمبر میں انڈیا میں ہونے والے مینز ایشیا کپ پر بھی سوالات اٹھنے لگے ہیں، کیونکہ ٹورنامنٹ میں انڈیا کی غیر موجودگی اس کے مستقبل کو غیر یقینی بنا سکتی ہے۔ ایشیا کپ میں روایتی طور پر انڈیا، پاکستان، سری لنکا، بنگلہ دیش اور افغانستان کی ٹیمیں شامل ہوتی ہیں۔ لیکن ماہرین کے مطابق اگر انڈیا اس میں شریک نہ ہوا تو براڈکاسٹرز اور سپانسرز کی دلچسپی بھی کم ہو جائے گی کیونکہ ایشیا کپ کی سب سے بڑی توجہ انڈیا اور پاکستان کے درمیان ہائی وولٹیج میچ ہوتا ہے، جو دنیا بھر میں شائقین کو متوجہ کرتا ہے۔ انڈین ایکسپریس کی رپورٹ میں یہ بھی کہا گیا ہے کہ ایشیا کپ جیسے ایونٹس کا بڑا حصہ انڈین مارکیٹ اور سپانسرشپ پر انحصار کرتا ہے، اور بی سی سی آئی اس حقیقت سے بخوبی واقف ہے۔ لہٰذا، اس کے بغیر ایشیا کپ کا انعقاد تجارتی طور پر نقصان دہ ثابت ہو سکتا ہے۔ یہ واضح نہیں کہ بی سی سی آئی کا یہ فیصلہ مستقل ہے یا وقتی طور پر سیاسی حالات کے تحت لیا گیا ہے، تاہم اس کے خطے کی کرکٹ سیاست اور اے سی سی کی خود مختاری پر دیرپا اثرات مرتب ہو سکتے ہیں۔
پاکستان سپر لیگ 10: پی سی بی نے بقیہ میچز کا شیڈول جاری کر دیا
پاک انڈیا کشیدگی کے دوران پی ایس ایل کے میچز ہنگامی طور پر ملتوی کر دیے گئے تھے، جو کہ اب پی سی بی نے بقیہ میچز کا شیڈول جاری کر دیا ہے۔ پاکستان کرکٹ بورڈ ( پی سی بی ) کی جانب سے جاری کردہ شیڈول کے مطابق لیگز میچز راولپنڈی اور پلے آف راؤنڈ مرحلہ لاہور میں ہوگا۔ پی سی بی کی طرف سے جاری کردہ شیڈول کے مطابق پشاور زلمی اور کراچی کنگز کا مقابلہ 17 مئی کو راولپنڈی میں ہوگا 18مئی کو راولپنڈی کرکٹ اسٹیڈیم میں ڈبل ہیڈر کھیلا جائے گا، ملتان سلطانز اور کوئٹہ گلیڈی ایٹرز دوپہر کو جبکہ پشاور زلمی اور لاہور قلندرز کی ٹیمیں شام کو مدمقابل آئیں گی۔ 19 مئی کو اسلام آباد یونائیٹڈ اور کراچی کنگز آخری گروپ میچ کھیلیں گے،پی ایس ایل سیزن ٹین کا پلے آف مرحلہ لاہور میں ہوگا اور پہلا کوالیفائر 21 مئی، ایلیمینیٹرون اور ٹو 22 اور 23 مئی کو کھیلے جائیں گے۔ جبکہ پی ایس ایل ٹین کا فائنل 25 مئی کو قذافی اسٹیڈیم لاہور میں کھیلا جائے گا
پی سی بی کا سابق کھلاڑیوں کا مینٹورشپ پینل ختم کرنے پر غور
پاکستان کرکٹ بورڈ (پی سی بی) ، اندرونی طور پر اپنے پانچ رکنی مینٹورشپ پینل کو تحلیل کرنے کے منصوبوں کو حتمی شکل دینے پر غور کر رہا ہے، جس سے اس کی ڈومیسٹک کرکٹ کی حکمت عملی میں ایک اہم تبدیلی آئے گی۔ نجی نشریاتی ادارے ایکسپریس نیوز کے ذرائع کا کہنا ہے کہ پی سی بی کے چیئرمین محسن نقوی کی ہدایت پر ہونے والے اس اقدام میں بورڈ سابق قومی کرکٹرز مصباح الحق، وقار یونس، ثقلین مشتاق، سرفراز احمد اور شعیب ملک کو اس پینل سے الگ کرے گا۔ ان افراد کو گزشتہ سال تین سال کے معاہدے کے تحت چیمپئنز کپ کے لیے بطور سرپرست مقرر کیا گیا تھا۔ اگرچہ کوئی باضابطہ اعلان نہیں کیا گیا ہے، اس فیصلے کو پہلے ہی اعلیٰ سطح پر منظور کر لیا گیا ہے۔ شعیب ملک نے دو ہفتے قبل بورڈ کی حتمی کال سے قبل ہی استعفیٰ دے دیا تھا، انہوں نے اپنے آفیشل انسٹاگرام پیج پر اپنے فیصلے کا اعلان کیا،دیگر چار سرپرستوں کو آنے والے دنوں میں باضابطہ طور پر مطلع کرنے کی امید ہے۔ واضح رہے کہ اس فیصلے کے پیچھے کی وجہ نامعلوم ہے،اور پی سی بی نے کوئی سرکاری بیان جاری نہیں کیا ہے۔ مینٹورشپ پینل کا اعلان 26 اگست 2024 کو کارکردگی پر مرکوز اصلاح کے حصے کے طور پر کیا گیا تھا، جس میں ہر سابق کھلاڑی کو ڈومیسٹک ٹیم میں تفویض کیا گیا تھا۔ رپورٹس بتاتی ہیں کہ ہر سرپرست 50 لاکھ روپے ماہانہ تنخواہ حاصل کر رہا تھا۔
پاکستان کرکٹ بورڈ میں اہم ’تبدیلیاں‘، نیوزی لینڈ کرکٹر مائیک ہیسن کوچ منتخب ہوگئے
پاکستان کرکٹ بورڈ نے سابق نیوزی لینڈ کرکٹر اور عالمی شہرت یافتہ کوچ مائیک ہیسن کو قومی کرکٹ ٹیم کا نیا وائٹ بال ہیڈ کوچ مقرر کر دیا ہے۔ چیئرمین پی سی بی محسن نقوی نے سماجی رابطے کی ویب سائٹ پر اعلان کیا کہ مکمل جانچ پڑتال کے بعد مائیک ہیسن کو ہیڈ کوچ کی ذمہ داری سونپی جا رہی ہے۔ وہ 26 مئی سے عہدہ سنبھالیں گے۔ یہ بھی پڑھیں: برطانیہ کا امیگریشن کے ’ٹوٹے ہوئے نظام‘ کو درست کرنے کا فیصلہ، کیا اصلاحات ہوں گی؟ محسن نقوی نے کہا کہ بورڈ کو یقین ہے کہ مائیک ہیسن اپنی عالمی کوچنگ مہارت اور وسیع تجربے کے ساتھ پاکستان کی وائٹ بال کرکٹ کو نئی راہ دکھائیں گے۔ ان کے مطابق ہیڈ کوچ کے عہدے کے لیے کئی درخواستیں موصول ہوئیں جن کا تفصیلی جائزہ لینے کے بعد فیصلہ کیا گیا۔ عاقب جاوید کو ڈائریکٹر ہائی پرفارمنس سنٹر مقرر کیا گیا ہے تاکہ کرکٹ ڈھانچے کو مضبوط بنایا جا سکے۔ مائیک ہیسن اور عاقب جاوید مل کر قومی ٹیم کی بہتری کے لیے کام کریں گے۔ اس کے ساتھ ہی پاکستان کرکٹ بورڈ نے ٹیم کے ساتھ کام کرنے والے تمام مینٹورز کو ان کے عہدوں سے فارغ کرنے کا فیصلہ کیا ہے۔ ذرائع کے مطابق چیئرمین نے ایک اہم اجلاس میں ان کی کارکردگی کا جائزہ لینے کے بعد یہ فیصلہ کیا۔ فارغ کیے گئے مینٹورز میں وقار یونس، شعیب ملک، ثقلین مشتاق، مصباح الحق اور سرفراز احمد شامل ہیں۔ ذرائع کا کہنا ہے کہ مصباح الحق اور سرفراز احمد کو بورڈ میں دیگر اہم ذمہ داریاں دی جائیں گی تاکہ ان کا تجربہ کسی اور شعبے میں استعمال ہو سکے۔
پی ایس ایل 10 کے ملتوی شدہ میچز 17 مئی سے دوبارہ شروع ہوں گے، چیئرمین پی سی بی
پاکستان کرکٹ بورڈ (پی سی بی) کے چیئرمین محسن نقوی نے باضابطہ اعلان کیا ہے کہ پاکستان سپر لیگ (پی ایس ایل) 10کے بقیہ میچز کا 17 مئی سے دوبارہ آغاز ہوگا۔ محسن نقوی نے پیر کے روز سوشل میڈیا پلیٹ فارم “ایکس” پر جاری اپنے بیان میں کہا کہ ’’ایچ بی ایل پی ایس ایل وہیں سے دوبارہ شروع ہوگا، جہاں سے اسے روکا گیا تھا۔‘‘ انہوں نے تمام ٹیموں کے لیے نیک تمناؤں کا اظہار کرتے ہوئے شائقین کرکٹ کو 17 مئی سے 25 مئی تک جاری رہنے والے آٹھ میچوں کے لیے تیار رہنے کا پیغام دیا۔ ان میچز کا اختتام 25 مئی کو ہونے والے گرینڈ فائنل کے ساتھ ہوگا۔ یاد رہے کہ پی ایس ایل کے بقیہ میچز نو مئی کو ملک میں کشیدہ صورت حال کے باعث ملتوی کر دیے گئے تھے۔ اس سے قبل آٹھ مئی کی شب پشاور زلمی اور کراچی کنگز کے درمیان راولپنڈی کرکٹ سٹیڈیم میں 27 واں میچ شیڈول تھا، جو اس وقت منسوخ کر دیا گیا جب اسٹیڈیم کے قریب ایک بھارتی ڈرون گرنے کی اطلاع ملی۔ اسی طرح نو مئی کو لاہور قلندرز اور پشاور زلمی، جبکہ 10 مئی کو اسلام آباد یونائیٹڈ اور کراچی کنگز کے درمیان میچز بھی راولپنڈی میں ہی کھیلے جانے تھے۔ یہ بھی پڑھیں: کوئٹہ میں پاکستانی کھلاڑی محمد وسیم نے انٹرنیشنل باکسنگ ٹائٹل اپنے نام کر لیا تاہم انڈین حملوں کے باعث پی سی بی نے صورتحال کا جائزہ لیتے ہوئے باقی تمام میچز معطل کر دیے۔ پی سی بی کی جانب سے جاری کردہ بیان میں کہا گیا تھا کہ یہ فیصلہ وزیراعظم میاں محمد شہباز شریف کی ہدایت پر کیا گیا، جنہوں نے اس موقع پر ملک کی خودمختاری کو ترجیح دینے کی ہدایت کی۔ پی سی بی نے کہا کہ ’’جب ملک کو سنگین سکیورٹی چیلنجز کا سامنا ہو تو کھیل کو ایک ذمہ دارانہ وقفہ دینا لازم ہو جاتا ہے۔‘‘ اگرچہ چیئرمین پی سی بی نے اپنے حالیہ بیان میں مقام کا ذکر نہیں کیا، تاہم آٹھ مئی کو پی سی بی پہلے ہی اعلان کر چکا تھا کہ پی ایس ایل کے بقیہ میچز متحدہ عرب امارات (یو اے ای) میں کروائے جائیں گے۔ اب تک پی ایس ایل میں 26 میچز مکمل ہو چکے ہیں اور بقیہ آٹھ میچز کا شیڈول جلد متوقع ہے۔ پی سی بی نے فرنچائزز، کھلاڑیوں، براڈکاسٹرز، سپانسرز اور دیگر شراکت داروں کے تعاون کا شکریہ ادا کرتے ہوئے کہا کہ وہ دوبارہ کرکٹ کے ذریعے خوشی اور اتحاد کا پیغام دینے کے لیے تیار ہیں۔ مزید پڑھیں: ’14 سال وائٹ جرسی پہننا اعزاز کی بات رہی‘، وراٹ کوہلی کا ٹیسٹ کرکٹ سے ریٹائرمنٹ کا اعلان
پی ایس ایل 10: بقیہ میچز کے لیے 16 اور 18 مئی کی تاریخیں زیر غور
پاکستان سپر لیگ سیزن 10 کے معطل شدہ میچز کے انعقاد سے متعلق پیش رفت سامنے آگئی ہے۔ ذرائع کے مطابق پاکستان کرکٹ بورڈ (پی سی بی) 16 اور 18 مئی کو بقیہ میچز کرانے پر سنجیدگی سے غور کر رہا ہے جبکہ حتمی شیڈول جاری کرنے سے قبل تمام اسٹیک ہولڈرز سے مشاورت کا عمل جاری ہے۔ ذرائع کا کہنا ہے کہ بقیہ 8 میچز کے لیے ابتدائی پلاننگ مکمل کی جا چکی ہے تاہم حتمی تاریخوں، مقامات اور براڈکاسٹنگ امور پر فرنچائز مالکان، نشریاتی اداروں اور غیر ملکی کھلاڑیوں سے مشورے جاری ہیں تاکہ کسی بھی تکنیکی یا لاجسٹک رکاوٹ سے بچا جا سکے۔ ذرائع نے بتایا ہے کہ لاہور اور راولپنڈی کو میچز کی میزبانی کے لیے ممکنہ وینیوز کے طور پر منتخب کیا جا رہا ہے اور چیئرمین پی سی بی محسن نقوی کی جانب سے جلد حتمی منظوری متوقع ہے۔ متوقع شیڈول کے مطابق 16 مئی سے پلے آف مرحلے کا آغاز ہو سکتا ہے جبکہ فائنل قذافی اسٹیڈیم لاہور میں کھیلا جانے کا امکان ہے۔ واضح رہے کہ حالیہ پاک انڈیا کشیدگی کے باعث پی ایس ایل 10 کے میچز ملتوی کر دیے گئے تھے۔ اب جنگ بندی کے بعد دوبارہ کرکٹ سرگرمیاں بحال کرنے پر سنجیدگی سے غور کیا جا رہا ہے اور شائقین کو جلد ایک بار پھر میدانوں میں جوش و خروش دیکھنے کو مل سکتا ہے۔ مزید پڑھیں: ’14 سال وائٹ جرسی پہننا اعزاز کی بات رہی‘، وراٹ کوہلی کا ٹیسٹ کرکٹ سے ریٹائرمنٹ کا اعلان
’14 سال وائٹ جرسی پہننا اعزاز کی بات رہی‘، وراٹ کوہلی کا ٹیسٹ کرکٹ سے ریٹائرمنٹ کا اعلان
وراٹ کوہلی نے ٹیسٹ کرکٹ سے ریٹائرمنٹ کا اعلان کر کے ایک دور کا اختتام کر دیا ہے۔ اپنے سوشل میڈیا پیغام میں انہوں نے کہا کہ 14 سال تک بھارت کے لیے وائٹ جرسی پہن کر کھیلنا ان کے لیے اعزاز کی بات رہی، اور یہ فیصلہ ان کے لیے آسان نہیں تھا، مگر وہ سمجھتے ہیں کہ اب وقت آ گیا ہے۔ ان کے چاہنے والوں نے انہیں شاندار کیریئر پر خراج تحسین پیش کیا اور سوشل میڈیا پر مبارکبادوں کے ساتھ ساتھ افسوس کا اظہار بھی کیا۔ کوہلی کا شمار ان عظیم بیٹرز میں ہوتا ہے جنہوں نے نہ صرف بھارتی ٹیم کی قیادت کی بلکہ کئی تاریخی فتوحات میں مرکزی کردار ادا کیا۔ انہوں نے اپنے ٹیسٹ کیریئر میں 123 میچوں میں 9230 رنز بنائے، جن میں 30 سنچریاں اور 31 نصف سنچریاں شامل ہیں۔ ان کے جارحانہ مزاج، فائٹ کرنے کی صلاحیت، اور کھیل کے لیے جنون نے انہیں ایک یادگار کھلاڑی بنا دیا۔
کوئٹہ میں پاکستانی کھلاڑی محمد وسیم نے انٹرنیشنل باکسنگ ٹائٹل اپنے نام کر لیا
کوئٹہ کی سرزمین پر پہلی بار سجی انٹرنیشنل باکسنگ چیمپئن شپ، جہاں باکسنگ کے عالمی میدان کے بڑے نام اکھٹے ہوئے، اور پاکستانی باکسر محمد وسیم نے ناقابلِ یقین کارکردگی کے ساتھ ڈبلیو بی اے ورلڈ گولڈ بینٹم ویٹ ٹائٹل اپنے نام کر لیا۔پولو گراؤنڈ کوئٹہ میں ہونے والی اس چیمپئن شپ کا انعقاد ورلڈ باکسنگ ایسوسی ایشن کے تحت کیا گیا، جو جنوبی ایشیا میں اپنی نوعیت کا پہلا ایونٹ تھا۔ مجموعی طور پر 8 فائٹس میں 4 ٹائٹل مقابلے شامل تھے جہاں عالمی شہرت یافتہ باکسرز نے زور آزمائی کی۔ برطانیہ کے جیمی گیلی، سہیل اقبال اور الیگز ڈیلمغانی، مراکش کے طارق زائنا اور میکسیکو کے جیسس سراچو نے شاندار فتح حاصل کی۔ پاکستانی ویمن باکسرز فاطمہ ہزارہ اور ملائکہ نے بھی اپنی ہم وطن حریفوں کو شکست دے کر میدان مارا۔ تاہم ایونٹ کا سب سے بڑا مقابلہ محمد وسیم اور وینزویلا کے وسیٹون اورونو کے درمیان ہوا جس میں وسیم نے مخالف کو نویں راؤنڈ میں ناک آؤٹ کر کے ٹائٹل جیتا اور پاکستانی پرچم کو فخر سے بلند کر دیا۔ یہ چیمپئن شپ نہ صرف کوئٹہ بلکہ پاکستان کی باکسنگ تاریخ کا یادگار باب بن گئی۔ مزید پڑھیں: پی ایس ایل کے بقیہ میچز راولپنڈی میں کھیلے جانے کا امکان
پی ایس ایل کے بقیہ میچز راولپنڈی میں کھیلے جانے کا امکان
پاکستان اور بھارت کے درمیان ہفتہ کو جنگ بندی کے باضابطہ اعلان کے بعد، پاکستان سپر لیگ (پی ایس ایل) کے بقیہ میچز غیر معینہ مدت کے لیے ملتوی کر دیےگئے تھے،اب امکان ظاہر کیا جا رہا ہے کہ یہ میچز راولپنڈی میں کھیلے جائیں گے۔ نجی نشریاتی ادارہ جیو نیوز کے ذرائع کے مطابق پی ایس ایل انتظامیہ نے پاک بھارت جنگ بندی کے اعلان کے بعد فرنچائزز سے رابطہ کیا،فرنچائزز نے مقامی کھلاڑیوں سے بھی کہا ہے کہ وہ آنے والے میچوں کی تیاری کریں۔ معلوم ہوا ہے کہ پی ایس ایل انتظامیہ نے تمام ٹیموں کو اسلام آباد میں اکٹھا کرنے کے پلان پر کام شروع کر دیا ہے اور بقیہ میچز راولپنڈی کرکٹ سٹیڈیم میں کھیلے جانے کا امکان ہے۔ ایک روز قبل پاکستان کرکٹ بورڈ (پی سی بی) نے علاقائی سلامتی کی بگڑتی ہوئی صورتحال کی روشنی میں پی ایس ایل سیزن 10 کے بقیہ آٹھ میچوں کو غیر معینہ مدت کے لیے ملتوی کرنے کا اعلان کیا تھا۔ یہ فیصلہ لائن آف کنٹرول (ایل او سی) کے ساتھ دشمنی میں نمایاں اضافے کے بعد ہوا، جس میں 78 بھارتی ڈرونز کی دراندازی اور سطح سے زمین پر مار کرنے والے میزائلوں کی فائرنگ، جسے پی سی بی نے بھارت کی جانب سے “لاپرواہی جارحیت” قرار دیا۔ پی سی بی نے شہداء کے اہل خانہ اور سیکیورٹی اہلکاروں کے ساتھ مکمل یکجہتی کا اظہار کیا، اور ٹورنامنٹ کے دوران مسلسل تعاون پر تمام اسٹیک ہولڈرز – فرنچائزز، کھلاڑیوں، اسپانسرز، براڈکاسٹرز اور شائقین کا شکریہ ادا کیا۔ بورڈ نے کھلاڑیوں، خاص طور پر غیر ملکی کرکٹرز پر جذباتی نقصان کو بھی تسلیم کیا، اور ان کے گھر والوں کی بحفاظت واپسی کے لیے خدشات کا احترام کیا۔ دہائیوں پرانی پاک بھارت دشمنی میں تازہ ترین اضافہ 7 مئی کو اس وقت شروع ہوا جب بھارت کے سرحد پار سے بلا اشتعال حملے میں کم از کم 31 شہری مارے گئے۔ جوابی کارروائی میں پاکستان نے اپنے پانچ لڑاکا طیارے مار گرائے جن میں تین رافیل اور درجنوں ڈرون بھی شامل تھے۔
پاک بھارت کشیدگی: پاکستان سپر لیگ کو غیر معینہ مدت کے لیے ملتوی کر دیا گیا
پاک بھارت کشیدگی کے باعث پاکستان سپر لیگ کے دسویں ایڈیشن کو غیر معینہ مدت کے لیے ملتوی کر دیا گیا ہے، جس کا شیڈول بعد میں جاری کیا جائے گا۔ پاکستان کرکٹ بورڈ (پی سی بی) کی جانب سے جاری بیان کے مطابق پاکستان سپر لیگ کے بقیہ 8 میچز ملتوی کردیےگئے اور پی ایس ایل کو موجودہ حالات کے تناظر میں ملتوی کیا گیا ہے، نئے شیڈول کا اعلان بعد میں کیا جائے گا۔ پی سی بی کا کہنا ہے کہ میچز ملتوی کرنے کا فیصلہ وزیراعظم کے مشورے پرکیاگیا، وزیر اعظم کی رائے میں موجودہ حالات میں تمام توجہ پاک فوج کی کوششوں پر ہونی چاہیے۔ پی سی بی کے مطابق پاکستان سپر لیگ 10 کے نئے شیڈول کا اعلان بعد میں کیا جائے گا۔ خیال رہے کہ گزشتہ روز پی سی بی نے پاکستان سپرلیگ کو پاکستان سے دبئی منتقل کرنے کا اعلان کیا تھا تاہم گزشتہ 24 گھنٹوں کی صورتحال پر لیگ کو ملتوی کرنے کا فیصلہ ہو
