ابوظبی میں پاکستانی سفارت خانے اور دبئی میں پاکستانی قونصل خانے نے پاکستانی شہریوں کو ای پاسپورٹ جاری کرنے کا عمل شروع کر دیا ہے۔
نئے نظام کے تحت پاسپورٹ کی فیس اس کی مدتِ میعاد، صفحات کی تعداد اور درخواست کی نوعیت، یعنی معمول کی یا فوری سروس، کے مطابق مقرر کی گئی ہے۔
دستیاب معلومات کے مطابق، پانچ سال کی مدتِ میعاد اور 36 صفحات پر مشتمل ای پاسپورٹ کی معمول کی فیس 145 درہم ہے، جو تقریباً 11 ہزار 20 پاکستانی روپے بنتی ہے۔
دوسری جانب، سب سے زیادہ فیس 2 ہزار 540 درہم مقرر کی گئی ہے۔ یہ رقم 10 سال کی مدتِ میعاد اور 72 صفحات پر مشتمل پاسپورٹ دوسری مرتبہ گم ہونے کی صورت میں فوری سروس کے تحت دوبارہ بنوانے کے لیے ادا کرنا ہوگی۔ ایک درہم کے بدلے 76 پاکستانی روپے کے حساب سے یہ رقم تقریباً ایک لاکھ 93 ہزار 40 روپے بنتی ہے۔
حکام کے مطابق، موجودہ مشین ریڈ ایبل پاکستانی پاسپورٹ اپنی مقررہ تاریخِ تنسیخ تک قابلِ استعمال رہیں گے۔ شہریوں کو مشورہ دیا گیا ہے کہ وہ پاسپورٹ کی میعاد ختم ہونے میں چھ ماہ سے کم عرصہ باقی رہ جانے پر تجدید کے لیے درخواست دیں۔
ای پاسپورٹ کے حصول کے لیے درخواست دہندگان کو اپنا پہلا اور خاندانی نام، یعنی فرسٹ نیم اور لاسٹ نیم، فراہم کرنا بھی ضروری ہوگا۔
پانچ سال کی مدتِ میعاد اور 36 صفحات پر مشتمل پاسپورٹ کی معمول کی فیس 145 درہم، جبکہ فوری سروس کی فیس 235 درہم ہوگی۔ اسی طرح، 10 سال کی مدتِ میعاد اور 36 صفحات کے پاسپورٹ کے لیے معمول کی فیس 215 درہم اور فوری سروس کی فیس 355 درہم مقرر کی گئی ہے۔
72 صفحات پر مشتمل پانچ سالہ پاسپورٹ کی معمول کی فیس 260 درہم اور فوری سروس کی فیس 425 درہم ہوگی۔ 10 سال کی مدتِ میعاد والے 72 صفحات کے پاسپورٹ کی معمول کی فیس 390 درہم اور فوری سروس کی فیس 635 درہم مقرر کی گئی ہے۔
پاسپورٹ گم ہونے کی صورت میں دوبارہ اجرا کے لیے زیادہ فیس ادا کرنا ہوگی۔ اس کا انحصار پاسپورٹ کی مدتِ میعاد، صفحات کی تعداد، سروس کی نوعیت اور اس بات پر ہوگا کہ پاسپورٹ پہلی مرتبہ گم ہوا ہے یا دوسری مرتبہ۔
پانچ سالہ مدتِ میعاد اور 36 صفحات پر مشتمل پاسپورٹ پہلی مرتبہ گم ہونے پر معمول کی سروس کے لیے 290 درہم اور فوری سروس کے لیے 470 درہم فیس مقرر کی گئی ہے۔ دوسری مرتبہ گم ہونے پر یہ فیس بالترتیب 580 اور 940 درہم ہوگی۔
10 سالہ مدتِ میعاد اور 36 صفحات کے پاسپورٹ کی پہلی مرتبہ گمشدگی پر معمول کی فیس 430 درہم اور فوری سروس کی فیس 710 درہم ہوگی۔ دوسری مرتبہ گم ہونے پر معمول کی فیس 860 درہم اور فوری سروس کی فیس ایک ہزار 420 درہم ہوگی۔
72 صفحات پر مشتمل پانچ سالہ پاسپورٹ پہلی مرتبہ گم ہونے پر معمول کی فیس 520 درہم اور فوری سروس کی فیس 850 درہم ہوگی۔ دوسری مرتبہ گم ہونے پر یہ فیس بڑھ کر بالترتیب ایک ہزار 40 اور ایک ہزار 700 درہم ہوجائے گی۔
اسی طرح، 10 سالہ مدتِ میعاد اور 72 صفحات کے پاسپورٹ کی پہلی مرتبہ گمشدگی پر معمول کی فیس 780 درہم اور فوری سروس کی فیس ایک ہزار 270 درہم ہوگی۔ دوسری مرتبہ گم ہونے پر معمول کی فیس ایک ہزار 560 درہم، جبکہ فوری سروس کی فیس 2 ہزار 540 درہم مقرر کی گئی ہے۔
