وائٹ ہاؤس میں پریس کانفرنس کے دوران صحافیوں سے گفتگو کرتے ہوئے ٹرمپ نے کہا کہ ایران معاہدہ تو کرنا چاہتا ہے لیکن ایسا معاہدہ نہیں جسے وہ قبول کر سکیں۔
انہوں نے کہا کہ امریکا ایک حقیقی معاہدہ چاہتا ہے، کوئی ایسا سمجھوتہ نہیں جو محض دکھاوے کے لیے ہو۔ ٹرمپ نے ایرانی قیادت پر الزام عائد کیا کہ وہ گزشتہ 51 برس سے لوگوں کو گمراہ کرتی آ رہی ہے۔
ایران سے متعلق یہ بیان ایسے وقت میں سامنے آیا ہے جب امریکی اور اسرائیلی حملوں کے دوبارہ شروع ہونے کے امکانات سے متعلق قیاس آرائیاں جاری ہیں۔
امریکی میڈیا رپورٹس کے مطابق واشنگٹن اور اسرائیل ایران کے خلاف ممکنہ نئی فوجی کارروائیوں پر غور کر رہے ہیں، تاہم اس حوالے سے کوئی حتمی اعلان سامنے نہیں آیا۔
ٹرمپ نے ایک روز قبل بھی کہا تھا کہ وہ ایران کے معاملے پر فوری فیصلہ کرنے کے خواہاں نہیں اور اس حوالے سے آئندہ پیش رفت کو دیکھیں گے۔
دوسری جانب اسرائیلی فوج کے ترجمان نے کہا ہے کہ فوج دفاعی اور جارحانہ دونوں طرح کی صورتحال کے لیے تیار ہے، تاہم شہریوں کے لیے جاری ہدایات میں کوئی تبدیلی نہیں کی گئی۔
ایرانی حکام نے بھی ممکنہ حملوں کے تناظر میں سخت ردعمل کی وارننگ دی ہے۔ پاسدارانِ انقلاب کے کمانڈر احمد واحدی نے کہا ہے کہ دشمن کی کارروائیوں کے نتیجے میں ایران اپنی دفاعی حکمت عملی میں تبدیلی کر سکتا ہے، جب کہ ایرانی حکام نے کسی بھی جارحیت کا جواب دینے کے عزم کا اظہار کیا ہے۔
پریس کانفرنس کے دوران ٹرمپ نے اپنے حالیہ دورۂ ایشیا کو بھی امریکی تاریخ کے کامیاب ترین صدارتی دوروں میں سے ایک قرار دیا۔ ان کے مطابق چار روزہ دورے میں انہوں نے 20 سے زائد عالمی رہنماؤں سے ملاقاتیں کیں، دو تجارتی معاہدے کیے اور چار بین الاقوامی سربراہی اجلاسوں میں شرکت کی۔
ٹرمپ نے امریکی معیشت کی کارکردگی کا ذکر کرتے ہوئے کہا کہ ملک میں مینوفیکچرنگ کے شعبے میں مسلسل 10 ماہ سے اضافہ ریکارڈ کیا گیا ہے اور خام تیل کی قیمتوں میں بھی 20 فیصد کمی آئی ہے۔
واضح رہے کہ ٹرمپ، چینی صدر شی جن پنگ اور روسی صدر ولادیمیر پیوٹن کے حالیہ سہ فریقی اجلاس کے بعد جاری اعلامیے میں جوہری جنگ کے خطرات کم کرنے اور عالمی اداروں میں اصلاحات سمیت مختلف امور پر اتفاق کیا گیا تھا۔ تاہم اعلامیے میں ایران یا یوکرین کی جنگ کا براہِ راست ذکر شامل نہیں تھا۔







