جماعت اسلامی خیبر پختونخوا کے سابق امیر سینیٹر مشتاق احمد خان کے بڑے بھائی شکیل احمد خان کو قتل کردیا گیا ۔ پولیس کا کہنا ہے کہ شکیل احمد خان کو گھر کے باہر نامعلوم افراد نے فائرنگ کرکے قتل کیا ۔
پولیس کے مطابق واقعہ صوابی کے گاؤں احد خان کلے شیخ جانہ میں پیش آیا۔
سوشل میڈیا پر جاری بیان میں سابق سینیٹر مشتاق احمد خان نے گہرے رنج و غم کا اظہار کرتے ہوئے کہا کہ بڑے بھائی شکیل احمد خان کو گاؤں میں گھر کے سامنے شہید کیا گیا۔
مشتاق احمد خان کا کہنا تھا کہ بڑےبھائی مجھے بہت عزیز تھے، یہ میرے دست وبازو تھے، یہ بدترین درندگی ہے۔
مشتاق احمد خان کے بھائی کے قتل پر مختلف شعبوں سے تعلق رکھنے والے افراد نے افسوس اور دکھ کا اظہار کیا ہے۔
ڈی پی او صوابی محمد اظہر کا کہنا ہے کہ شکیل احمد خان پر ہمسائے نے فائرنگ کی ، ملزم نے پہلے اپنے والد کو قتل کیا ، شکیل احمد خان بیچ بچاؤ کرانے کے لیے گئے تھے۔
امیر جماعت اسلامی حافظ نعیم الرحمان نے سینیٹر مشتاق احمد خان سے ٹیلی فون پر رابطہ کیا ہے اور واقعہ پر افسوس کا اظہار کیا ہے، امیرجماعت اسلامی نے حکام سے ملزم کو کیفر کردار تک پہنچانے کا مطالبہ کیا ہے۔
