پاکستان انٹرنیشنل ایئرلائنز (پی آئی اے) اور دیگر پاکستانی فضائی کمپنیوں پر عائد پانچ سالہ پابندی کے خاتمے کا فیصلہ آج برطانیہ کے ایئر سیفٹی کمیٹی کی اہم میٹنگ میں کیا جائے گا۔
یہ فیصلہ پاکستان کی فضائی صنعت کے لیے ایک سنگ میل ثابت ہو سکتا ہے جو جولائی 2020 میں جعلی پائلٹ لائسنس اسکینڈل کے بعد سے برطانیہ اور یورپ میں اپنی پروازوں کے لیے بند ہے۔
یورپی اور برطانوی ریگولیٹرز نے اس اسکینڈل کے بعد پی آئی اے اور دیگر پاکستانی ایئرلائنز کی آپریشنز معطل کر دی تھیں جس کی وجہ سے پاکستان اور یورپ کے درمیان براہ راست پروازوں میں کمی آئی اور پاکستانی شہریوں کو سفری مشکلات کا سامنا کرنا پڑا۔
برطانیہ کی ایئر سیفٹی کمیٹی آج اس بات کا جائزہ لے گی کہ آیا پاکستانی ایئرلائنز کو دوبارہ برطانوی ہوائی اڈوں پر پروازوں کی اجازت دی جائے یا نہیں۔
پاکستان سول ایوی ایشن اتھارٹی (سی اے اے) کے حکام اس فیصلے کے بارے میں پُرامید ہیں۔ ایک سی اے اے عہدیدار نے بتایا کہ “یورپ میں پروازوں کی بحالی کے بعد ہم امید کرتے ہیں کہ برطانیہ بھی پاکستانی ایئرلائنز کی پروازوں کی اجازت دے گا۔”
اگر ایئر سیفٹی کمیٹی نے پابندی ختم کرنے کا فیصلہ کیا تو یہ پاکستان کی فضائی صنعت کے لیے ایک اہم کامیابی ہو گی جو براہ راست پروازوں کی بحالی کے ذریعے نہ صرف معیشت کو سہارا دے گی بلکہ پاکستان اور برطانیہ کے درمیان تجارتی تعلقات کو بھی فروغ دے گی۔
آج کا فیصلہ پاکستان کے لیے ایک سنہری موقع ثابت ہو سکتا ہے جس سے نہ صرف پی آئی اے بلکہ دیگر پاکستانی ایئرلائنز کو بھی فائدہ پہنچے گا۔
مزید پڑھیں: ‘ہم نے غزہ پر دوبارہ کارروائیاں شروع کر دی ہیں’ اسرائیلی حکام
