یوکرین اور امریکا کے وفود نے اتوار کے روز ایک ملاقات میں توانائی کے بنیادی ڈھانچے اور اہم سہولیات کے تحفظ پر بات چیت کی۔ یوکرین کے وزیر دفاع کے مطابق، یہ ملاقات امریکی صدر ڈونلڈ ٹرمپ کی جانب سے تین سال سے جاری جنگ کو ختم کرنے کے سفارتی دباؤ کا حصہ تھی۔
یہ ملاقات سعودی عرب میں ہوئی اور پیر کے روز امریکی اور روسی وفود کی بات چیت سے پہلے منعقد کی گئی۔ امریکی خصوصی ایلچی سٹیو وٹکوف نے کہا کہ وہ اس جنگ کے خاتمے کے امکانات کے بارے میں پرامید ہیں۔ انہوں نے ایک انٹرویو میں کہا کہ انہیں لگتا ہے کہ روسی صدر ولادیمیر پوٹن امن چاہتے ہیں اور پیر کے روز سعودی عرب میں ہونے والی بات چیت میں کچھ اہم پیش رفت دیکھنے کو ملے گی، خاص طور پر بحیرہ اسود میں دونوں ممالک کے درمیان جنگ بندی کے حوالے سے۔
یوکرین کے صدر ولادیمیر زیلنسکی نے کہا کہ ان کے ملک کا وفد تعمیری انداز میں کام کر رہا ہے اور بات چیت کافی مفید رہی۔ تاہم، انہوں نے یہ بھی کہا کہ اصل مسئلہ یہ ہے کہ روسی صدر پوٹن کو حملے روکنے کا حقیقی حکم دینا ہوگا۔ یوکرین کے وفد کی قیادت وزیر دفاع رستم عمروف کر رہے تھے، جنہوں نے کہا کہ یہ بات چیت امن کے قیام اور سیکیورٹی کو مضبوط کرنے کے لیے کی جا رہی ہے۔
گزشتہ ہفتے روسی صدر پوٹن نے ٹرمپ کی اس تجویز کو تسلیم کر لیا تھا کہ روس اور یوکرین 30 دن کے لیے ایک دوسرے کے توانائی کے بنیادی ڈھانچے پر حملے نہ کریں، لیکن یہ جنگ بندی زیادہ دیر تک قائم نہ رہ سکی۔ دونوں ممالک نے ایک دوسرے پر حملوں کے الزامات لگائے۔
اتوار کے روز یوکرائنی حکام نے بتایا کہ روس نے کیف پر بڑے پیمانے پر ڈرون حملہ کیا، جس میں ایک 5 سالہ بچے سمیت کم از کم تین افراد ہلاک ہو گئے۔ حملے سے کئی عمارتوں میں آگ لگ گئی اور دارالحکومت میں کافی نقصان پہنچا۔ دوسری طرف، روسی حکام نے کہا کہ ان کے فضائی دفاع نے 59 یوکرائنی ڈرونز تباہ کیے، جو ملک کے جنوب مغربی علاقوں پر حملہ کر رہے تھے۔ ان حملوں میں روستوف کے علاقے میں ایک شخص ہلاک ہوا۔
یوکرین کے مشرقی علاقوں میں روسی فوج کی مسلسل پیش قدمی کے باعث صدر زیلنسکی نے ٹرمپ کے 30 دن کی جنگ بندی کے مطالبے کی حمایت کی ہے، لیکن عملی طور پر جنگ بندی کی خلاف ورزیاں جاری ہیں۔
