وزیراعلیٰ پنجاب مریم نواز شریف نے کہا ہے کہ مقبوضہ جموں و کشمیر کا مسئلہ سات دہائیوں سے عالمی ضمیر کو جھنجھوڑ رہا ہے، غزہ کے مظلوم مسلمانوں کی حالت زار عالمی یومِ ضمیر منانے والوں کے لیے لمحہ فکریہ ہے۔
عالمی یوم ضمیر کے موقع پر جاری اپنے خصوصی پیغام میں وزیراعلیٰ پنجاب نے کہا کہ انسانیت کی بقاء کے لیے ضروری ہے کہ اقوامِ عالم کا اجتماعی ضمیر زندہ رہے
مریم نوازشریف نے عالمی یوم ضمیر پر اپنے پیغام میں کہا کہ محبت، امن اور رواداری کی روایات برقرار رکھنے کے عزم کا اعادہ کرنے کا دن ہے۔
انہوں نے کہا کہ عالمی یوم ضمیر بنیادی آزادی کے احترام کے افاقی اصولوں پر عمل پیرا ہونے کی یاد دلاتا ہے۔ انسانی فلاح وبہبود کے لیے ہمدردی کااحساس ضمیر میں برقرار رہنا ضروری ہے۔
مریم نواز نے کہا ہے کہ 2025 کے لیے عالمی یوم ضمیرکا تھیم بہتر مستقبل کے لیے ہوش مندانہ فیصلے ہیں۔
انہوں نے کہا کہ مقبوضہ جموں و کشمیر کا مسئلہ 7 دہائیوں سے عالمی ضمیر پر مسلسل دستک دے رہا ہے۔ غزہ کے مظلوم مسلمانوں کی بے چارگی عالمی یوم ضمیر منانے والوں کے لیے لمحہ فکریہ ہے۔ انسانی ضرورتوں کے درمیان ضمیر کے احساس کو برقرار رکھنا ہی انسانیت ہے۔
وزیراعلیٰ پنجاب مریم نواز شریف نے کہا کہ انسانیت کی بقاء کے لیے ساکنان ارض کا ضمیر زندہ رہنا ضروری ہے، اقوام متحدہ کاعالمی یوم ضمیر ہمیں سوچنے کی دعوت دیتا ہے۔
