اسلام آباد میں پاکستان اور گلف کوآپریشن کونسل (جی سی سی) کے اشتراک سے انسداد منشیات کانفرنس کا انعقاد کیا گیا، جو کہ ایک اہم علاقائی تعاون کی علامت ثابت ہوا۔ اس پُروقار تقریب کی میزبانی پاکستان نے کی جس میں جی سی سی ممالک کے اعلیٰ سطحی نمائندوں نے شرکت کی۔
تقریب کا آغاز ڈی جی اے این ایف میجر جنرل عبدالمعید کے استقبالیہ خطاب سے ہوا، جنہوں نے معزز مہمانوں کو خوش آمدید کہا اور اس اہم موضوع پر خطے کے ممالک کے درمیان تعاون کی اہمیت کو اجاگر کیا۔ وزیر داخلہ محسن نقوی نے اپنے افتتاحی خطاب میں منشیات کے خلاف ایک مضبوط اور مؤثر علاقائی اتحاد کی ضرورت پر زور دیا۔
کانفرنس کے دوران جی سی سی رکن ممالک نے اپنی پریزنٹیشنز میں مشترکہ چیلنجز، خطرات، اور اب تک حاصل کی گئی کامیابیوں کو پیش کیا۔ ساتھ ہی انٹیلی جنس شیئرنگ، بارڈر کوآرڈینیشن، اور مشترکہ تحقیقاتی اقدامات پر تفصیلی بات چیت کی گئی۔
ماہرین نے انسداد منشیات کی عوامی آگاہی کے لیے مشترکہ مہمات چلانے اور سائنسی بنیادوں پر تحقیق و معلومات کے تبادلے کی تجاویز بھی پیش کیں۔ کانفرنس کے دوران اس بات پر زور دیا گیا کہ منشیات کی اسمگلنگ روکنے کے لیے عملی اقدامات اور موثر منصوبہ بندی ناگزیر ہے۔
یہ کانفرنس علاقائی سطح پر تعاون کو فروغ دینے، حکمت عملی طے کرنے اور مشترکہ مؤقف اپنانے کے عزم کے ساتھ منعقد کی گئی، جس سے ظاہر ہوتا ہے کہ پاکستان اور جی سی سی ممالک منشیات کے خلاف ایک مضبوط اور یکجا محاذ بنانے کے لیے پرعزم ہیں۔
