ترک صدر رجب طیب اردگان نے فرانسیسی ہم منصب ایمانوئل میکرون سے ٹیلیفونک گفتگو میں روس اور یوکرین کے درمیان امن مذاکرات کی میزبانی کی پیشکش کی۔
غیر ملکی خبررساں ادارے ‘ترکیہ ٹوڈے’ کے مطابق صدر رجب طیب اردگان نے فرانسیسی صدر ایمانوئل میکرون کے ساتھ فون پر بات چیت کی، جس میں یوکرین اور روس کے درمیان امن مذاکرات کی میزبانی کے لیے ترکی کی آمادگی کا اظہار کیا۔
کال کے دوران، ترکی اور فرانس کے درمیان دو طرفہ تعلقات کے ساتھ ساتھ علاقائی اور عالمی امور پر تبادلہ خیال کیا گیا۔ صدر اردگان نے اس بات پر زور دیا کہ یوکرین اور روس کے درمیان جنگ کے خاتمے کی کوششوں میں ایک تاریخی موڑ آ گیا ہے، اس موقع سے فائدہ اٹھانا چاہیے۔
اردگان نے گفتگو کے دوران کہا کہ “ہم جنگ بندی اور مستقل امن کو یقینی بنانے کے لیے مذاکرات کی میزبانی سمیت ہر قسم کا تعاون کرنے کے لیے تیار ہیں۔”
ترک رہنما نے یوکرین اور روس کے درمیان مستقل امن مذاکرات شروع کرنے اور یوکرین کی تعمیر نو کے عمل کو احتیاط سے منظم کرنے میں مسلسل تعاون کی اہمیت کو بھی اجاگر کیا۔
مزید پڑھیں: پاکستان، انڈیا جنگ بندی: خطے کی بدلتی صورتحال میں امریکا کی دلچسپی کیوں؟
یہ کال اس تنازعے کے حل کے لیے بڑھتی ہوئی سفارتی کوششوں کے درمیان سامنے آئی ہے جس نے علاقائی استحکام اور عالمی سلامتی کو بری طرح متاثر کیا ہے۔
یوکرین روس تنازعہ کے علاوہ، دونوں رہنماؤں نے ترکی-فرانس دو طرفہ تعلقات کے مختلف پہلوؤں کا جائزہ لیا اور باہمی تشویش کے دیگر علاقائی اور عالمی امور پر تبادلہ خیال کیا۔
