ڈونلڈ ٹرمپ نے پیر کے روز اعلان کیا کہ روس اور یوکرین جلد جنگ بندی کے لیے مذاکرات کا آغاز کریں گے۔
یہ اعلان انہوں نے روسی صدر ولادیمیر پیوٹن سے فون پر بات چیت کے بعد کیا۔ تاہم، کریملن کا کہنا ہے کہ امن مذاکرات کے آغاز میں وقت لگے گا، اور ٹرمپ نے یہ بھی اشارہ دیا کہ وہ روس پر مزید دباؤ ڈالنے کے لیے یورپی پابندیوں کا ساتھ دینے کے لیے تیار نہیں۔
ٹرمپ نے اپنی سوشل میڈیا پوسٹ میں کہا کہ انہوں نے روسی صدر سے ٹیلیفونک ملاقات کے بعد یوکرینی صدر ولادیمیر زیلنسکی، اور یورپی یونین، فرانس، اٹلی، جرمنی اور فن لینڈ کے رہنماؤں سے گروپ کال میں بات کی۔ اس کال میں انہوں نے بتایا کہ روس اور یوکرین فوری جنگ بندی اور جنگ کے خاتمے کے لیے بات چیت کریں گے۔ بعد ازاں وائٹ ہاؤس میں ٹرمپ نے کہا کہ ان کے خیال میں کچھ پیش رفت ہو رہی ہے۔
یہ بھی پڑھیں: ’یہ بہت زیادہ خطرناک ہے‘، سابق امریکی صدر جو بائیڈن میں پروسٹیٹ کینسر کی تشخیص
روسی صدر پیوٹن نے ٹرمپ کا شکریہ ادا کیا کہ انہوں نے ترکی میں ہونے والی ملاقات کے بعد مذاکرات کی بحالی میں مدد کی۔ انہوں نے کہا کہ روس یوکرین کے ساتھ امن معاہدے کے لیے ایک یادداشت پر کام کرنے کو تیار ہے۔
اگرچہ روس اور یوکرین کے درمیان براہ راست رابطے تین سالہ جنگ کے بعد ایک اہم قدم سمجھے جا رہے ہیں، لیکن پیر کے روز ہونے والی بات چیت کسی بڑی کامیابی کی امیدوں پر پورا نہیں اتری۔
دوسری جانب، جرمنی کے چانسلر فریڈرک مرز نے اعلان کیا کہ یورپی ممالک نے روس پر مزید دباؤ ڈالنے کے لیے نئی پابندیاں لگانے کا فیصلہ کیا ہے۔ تاہم، ٹرمپ نے ان پابندیوں پر عمل کرنے میں ہچکچاہٹ ظاہر کی۔
جب صحافیوں نے ٹرمپ سے پوچھا کہ انہوں نے ماسکو پر مزید دباؤ کیوں نہیں ڈالا، تو ان کا جواب تھا کہ وہ سمجھتے ہیں کہ کچھ پیش رفت ہو سکتی ہے، اور اگر دباؤ ڈالا گیا تو شاید حالات بگڑ سکتے ہیں۔ ٹرمپ نے مزید کہا کہ اگر امن کی طرف پیش رفت نہ ہوئی تو وہ پیچھے ہٹ سکتے ہیں۔ انہوں نے کہا، “یہ میری جنگ نہیں ہے۔”
ٹرمپ نے یہ بھی تسلیم کیا کہ اس عمل میں “کچھ بڑی انا” رکاوٹ بنی ہوئی ہے، اور اگر حالات میں بہتری نہ آئی تو وہ خود کو اس عمل سے علیحدہ کر لیں گے۔
